Sebesethuselwa abanye abakubandla leZanu PF abaphikisa ukuba uMongameli Emmerson Mnangagwa aqhubeke esembusweni kungafika umnyaka ka2028, okuzaqhitshwa umbuso wakhe.
Abafuna ukuba aqhubeke esembusweni bathi abakuphikisayo lokhu ngabasekelwa ngabazonda uhulumende kaMnangagwa, okuthiwa uqhuba kahle ihlelo ezitshiyeneyo zelizwe. Abaphikisa lokhu bathi sebesesaba ukukhuluma ngodaba lolu emphakathini ngoba balakho ukususelwa amanqe ngabasekeli bakamongameli.
Ukuhlaziya loludaba, sixoxe loMnu. Malaki Nkomo, ilunga lebandla leZanu PF, othi udaba lolu luzabanjwa ngemfanelo libandla lakhe.
UNkomo uthi, “Kangikholwa ukuba kungachitheka igazi ngenxa yodaba lolu. Kuyabe kubangwani? Ibandla leZanu PF lizakulungisa lokhu.”
Kodwa uMnu. Fortune Mlalazi, olandela ezombusazwe ezimele, uthi kuyethusa okwenzakala kubandla leli okwethuselwa abaphikisa ukuba uMnangagwa aqhubeke esembusweni ngo2028.
“Kuvele kuyaziwa ukuthi lakudala kwakuxokozela kubandla leli amanye amalunga alo acine ebulalawa. Kuzachitheka igazi ngodaba lolu,” kutsho uMlalazi.
Okwamanje uMnu. Blessed Runesu Geza, owalwa impi yenkululeko othi uMnangagwa kumele asuke embusweni ngoba wehluleka ukubusa eleZimbabwe, udingwa ngamapholisa athi kumele etheswe icala lokuthethisa umongameli welizwe.
Akwaziwa ukuba uGeza ungaphi labanye bakhe abathi sesifikile isikhathi sokuthi asuke embusweni hatshi ukuthi kumelelwe umhlangano weCongress ozaqhutshwa kungakenziwa ukhetho ngo2028.
Kulabafisa ukuba isikhundla sikamongameli siphathwe ngumsekeli wakhe, uMnu. Constantino Chiwenga, ababambisana ngo2017 kususwa esikhundleni owayengumongameli uRobert Mugabe.
Kodwa bakhona njalo abathi uMangagwa loChiwenga zimbila zantabanye ngakho-ke kumele kudingwe omunye umuntu ozakhokhela eleZimbabwe ukwenzela ukuthi lithuthuke ngemfanelo.
Emhlnganweni weAnnual National People’s Conference owaqhutshwa nyakenye, kwathathwa isinqumo sokuthi uMnangagwa kumele aqhubeke esembusweni kungafika umnyaka ka2028. Banengi abangazange bethakazelele isinqumo lesi. Isisekelo sombuso welizwe sikubeka sobala ukuba umongameli uhlala esikhundleni okweminyaka elitshumi kuphela.
Forum