Livuliwe ngoLwesibili idale lephalamende kungelampawu eziveza ukuba kuzaguqulwa isisekelo sombuso welizwe ukuze uMongameli Emmerson Mnangagwa aqhubeke esembusweni kungafika umnyaka ka2028, okugqitshwa khona umbuso wakhe. Kulemithetho ezabunjwa kusigaba sedale lephalamende lesi okugoqela owe-Private Voluntary Organizations Amendment Bill ozalawula ukusebenza kwenhlanganiso ezizimeleyo.
Sixoxe ngokungabikhona komthetho ozabunjwa owokuguqula isisekelo sombuso welizwe loNkosazana Nonhlanhla Mlotshwa okhokhela idale leSenate ekucele lebandla leCitizens Coalition for Change elikhokhelwa nguMnu. Welshman Ncube othi kabavumelani lalabo abafuna ukuthi uMnangagwa eqhubeke esembusweni.
UNkosazana Mlotshwa uthi, “Sizakuphikisa lokhu ngamandla ethu wonke ngoba akjulunganga ukwephula isisekelo sombuso ukuze umuntu oyedwa aqhubeke esembusweni.”
Siphinde saxoxa ngodaba lolu loMnu. Malaki Nkomo owakewamela isigaba seInsiza South edale lephalamende ekubandla leZanu PF othi kuzalandelwa imithetho yelizwe uma kumele kuguqulwe isisekelo sombuso welizwe.
“Kuzakwenziwa kulandelwa imithetho yelizwe njengalokhu okuvame okwenzakala edale lephalamende,” kutsho uNkomo.
Kulabanye abakubandla leZanu PF abaphikisa imizamo yokwengeza isikhathi sombuso kaMnangagwa abathi sokumele adedele omunye ngoba usehlale esikhundleni ngendlela elawulwa yisisekelo sombuso welizwe.
Abalwa impi yenkululeko labo sebelwisana ngodaba lolu.
Forum