Abalwa impi yenkululeko abaphikisa imizamo yokuqhelisa umbuso kaMongameli Emmerson Mnangagwa bathi abasoze bavume ukwethuselwa ngamapholisa, wona athi afuna ukubopha omunye wabo uMnu Blessed Geza.
Amapholisa athi adinga uGeza phezu kwamacala abalisa elokuthuka uMnangagwa, elokutshotshozela udlakela kanye lelokuntshontsha imota ezintathu.
UGeza uyisikhulumeli selinye lamacele enhlanganiso yabalwa impi abakubandla leZanu PF abathi akumelanga uMnangagwa avunyelwe ukuqhubeka esembusweni isikhathi sakhe sokusuka singafika ngomnyaka ka2028 ngoba usebulele ilizwe njalo ukhohlakele.
Omunye wabalwa impi yenkululeko osekela uGeza, uMnu Ethan Matibela utshele iStudio 7 ukuthi abasoze bathule ngokuchothoza uMnangagwa.
UGeza wethule amazwi kunsukwana ezedluleyo esithi akusensuku zatshwala ukuthi uMnangagwa asuswe embusweni.
Isikhulumeli samapholisa uMnu Paul Nyathi uthi ololwazi phezu kokuthi uGeza ungaphi kumele ayetshela amapholisa njalo uxwayise labo abangaba bemfihlile ukuthi bazabotshwa.
Abanye bathi ukudingwa kukaGeza ngamapholisa akulani lokwephulwa komthetho kodwa kulokwenza lokulwisana kubandla leZanu PF phakathi kwalabo abafuna uMnangagwa abuse kuze kube naphakade lalabo abathi kumele adedele umsekeli wakhe uMnu Constantino Chiwenga.
Igqwetha uMnu Pardon Tapfumaneyi utshele iStudio 7 ukuthi ngempela amacala etheswa uGeza akhanya ephathelane lezombusazwe.
Isikhulumeli sebandla leZanu PF uMnu Farai Marapira yena uthi kumele uGeza abotshwe nxa ephule umthetho.
Forum