Ibandla leZanu PF koBulawayo kanye labasakhulayo eMatabeleland North basekela labo abathi uMongameli Emmerson Mnangagwa kumele eqhubeke esembusweni kungafika umnyaka ka2028, okugqitshwa khona umbuso wakhe.
Umkhankaso lo koBulawayo ukhokhelwa ngumngcinisihlalo webandla leli uMnu. Jabulani Sibanda, otshele amalunga eZanu PF izolo ukuba uMnangagwa kumele ahlale embusweni kuze kufike u2030 ngoba uqhube inhlelo ezilohlonzi.
Abatsha labo esabelweni seMatabeleland North bayakusekela lokhu. Kodwa banengi abakubandla leZanu PF abakuphikisayo abathi kumele uMnangagwa asuke esikhundleni ngo2028 kungagqitshwa isikhathi sombuso wakhe. UMnangagwa yena usetshele uzulu ukuba kafisi ukuqhubeka esembusweni kungafika umnyaka ka2028.
Zinengi izabelo ezisekela ukuba uMnangagwa ahlale embusweni loba isisekelo sombuso welizwe sikubeka sobala ukuthi osesikhundleni sikamongameli okwamanje engasebenza iminyaka elitshumi akumelanga akhethwe nguzulu kungedlula iminyaka le.
Kungaguqulwa isisekelo sombuso na ukuze uMnangagwa ahlale esikhundleni?
Ukuhlaziya loludaba sixoxe loMnu. Nqobani Sithole igqwetha elilwela ilungelo loluntu lizimele othi kunengi okumele kwenziwe ukuze uMnangagwa eqhubeke esembusweni.
Forum