Ibandla leZanu PF lithi kulamalunga alo afuna kubelokuxabana kubandla leli lelizweni lonke jikelele, okukhanya kusekelwa yizitha zikahulumende kaMongameli Emmerson Mnangagwa.
Lamazwi akhulunywe ngoLwesine nguMnu. Chris Mutsvangwa, isikhulumeli sebandla elibusayo, otshele intathelizindaba eHarare ukuba kumele kuphele du okukhulunywa ngowalwa impi yenkululeko, uMnu. Blessed Runesu Geza, labanye bakhe abathi sokumele uMnangagwa asuke embusweni ngoba useyehlulekile ukubusa ngemfanelo eleZimbabwe.
UMutsvangwa uphinde wathi abanye abadunga inxabano nguMnu. Tendai Biti loMnu. Savior Kasukuwere abakhuthaza abamhlophe abathathelwa umhlabathi kusukela ngomnyaka ka2000 ukuba behlamukele uhulumende.
Abatsha labo baqhube umhlangano wabo oweZanu PF Youth League namuhla eHarare lapho abakhulume kabanzi ngookwenziwa nguGeza, osedingwa ngamapholisa afisa ukumethesa amacala agoqela elokuthethisa uMnangagwa.
UBiti utshele iStudio 7 ukuthi kalasikhathi sokukhuluma ngokwethulwe nguMutsvangwa.
Kasenelisanga ukukhuluma loKasukuwere kanye loGeza ngodaba lolu ngoba bebengaphenduli omakhalekhukhwini.
Kulabakubandla leZanu PF abathi kumele kuguqulwe isisekelo sombuso welizwe ukuze uMnangagwa aqhubeke esembusweni kubelabanye njalo abatshaya phansi ngenduku besithi lokhu akusoze kwenzakale.
Ukuhlaziye loludaba, sixoxe loMnu. Fortune Mlalazi olandela ezombusazwe ezimele othi ibandla elibusayo livame ukuxokozela ngesikhathi kukhulunywa ngezombusazwe.
Kodwa uMnu. Malaki Nkomo okubandla leZanu PF uthi ukuxokozela lokhu kuzalungiswa ngemfanelo.
Forum