Wadansu maharan da ake zaton 'yan Boko Haram ne sun kashe dimbin mutane a ranar Lahadi cikin wani harin da suka kai kan kauyuka uku, da kuma wani harin da suka kai kan masu ibada a wata Majami'ar da ke kimanin tazarar kilomita biyar da garin Chibok inda 'yan kungiyar suka sace 'yan mata dalibai fiye da dari biyu.
Bello Habeeb Galadanchi ya tuntubi wakilin Sashen Hausa a Borno, Haruna Dauda Biu wanda yayi karin bayani kamar haka:
A wani hari na daban kuma da yammacin Jumma'a 'yan ta'addan sun halaka sojoji bakwai a kauyen Goniri, a jahar Yobe a cewar wata majiyar jami'an tsaro da wani shaida.
Maharan sun kai farmakin na ranar Lahadin ne a kusan lokaci guda kan kauyukan uku da ke karamar hukumar Chibok a jahar Borno.
Wani shaida da ya tsira daga harin da suka kai kauyen Kautikiri, Samuel Chibok, ya ce mahara maza kimanin su ishirin ne a cikin wata mota a kori kura samfurin Toyoya, sauran kuma akan babura suka shiga garin, suka yi ruwan harsashai kan mutanen da ke cikin wata Majami'a su na ibada.
