ប្រធានាធិបតីអ៊ុយក្រែនលោក Volodymyr Zelenskyy បានអំពាវនាវកាលពីថ្ងៃចន្ទឲ្យមាន «សន្តិភាពពិតប្រាកដនិងយូរអង្វែង» ក្នុងឆ្នាំនេះ ពេលមេដឹកនាំបណ្តាប្រទេសអឺរ៉ុបបានជួបប្រជុំគ្នាក្នុងទីក្រុងកៀវនៅខួបឆ្នាំទី ៣ នៃការឈ្លានពានរបស់រុស្ស៊ីលើអ៊ុយក្រែន។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AFP។
រុស្ស៊ីថាខ្លួននឹងបញ្ឈប់សង្គ្រាមនេះក្នុងករណីណាដែលកិច្ចព្រមព្រៀងមួយអាចសម្រេចបានដែល «ត្រូវនឹង» ផលប្រយោជន៍របស់ខ្លួនតែប៉ុណ្ណោះ និងបានចោទអឺរ៉ុបថាចង់ពន្យារពេលសង្គ្រាមនេះ។
លោក Zelenskyy បានថ្លែងទៅកាន់មេដឹកនាំក្រុមប្រទេសដែលគាំទ្រអ៊ុយក្រែនក្នុងទីក្រុងកៀវថា៖ «ឆ្នាំនេះគួរតែជាឆ្នាំនៃការចាប់ផ្តើមសន្តិភាពដ៏ពិតប្រាកដនិងយូរអង្វែងហើយ»។
លោក Zelenskyy បានបន្ថែមថា៖ «[ប្រធានធិបតីរុស្ស៊ី] លោក Putin នឹងមិនផ្តល់សន្តិភាពដល់យើងទេ ឬបើផ្តល់ឲ្យយើងគឺផ្ដល់ជាថ្នូរនឹងអ្វីមួយ។ យើងត្រូវតែទទួលបានសន្តិភាពតាមរយៈភាពរឹងមាំ គតិបណ្ឌិត និងសាមគ្គីភាព»។
លោក Zelenskyy ថ្លែងដូច្នេះ ស្របពេលសហរដ្ឋអាមេរិកអំពាវនាវកាលពីថ្ងៃចន្ទឲ្យអ៊ុយក្រែននិងរុស្ស៊ីគាំទ្រផែនការរបស់ខ្លួនក្នុងការបញ្ចប់សង្គ្រាមនេះ។
ឯកអគ្គរដ្ឋទូតអាមេរិកប្រចាំអង្គការសហប្រជាជាតិអ្នកស្រី Dorothy Shea បាននិយាយថា៖ «សេចក្ដីព្រាងនៃសេចក្ដីសម្រេចដែលសហរដ្ឋអាមេរិកបានដាក់ជូនមានចែងអំពីចំណុចនេះ។ សេចក្ដីព្រាងនោះស្នើឲ្យមានការបញ្ចប់ជាបន្ទាន់នូវសង្គ្រាមនេះ និងជំរុញបន្ថែមឲ្យមានសន្តិភាពយូរអង្វែងរវាងអ៊ុយក្រែននិងរុស្ស៊ី។ នេះជាអ្វីដែលត្រូវការនៅពេលឥឡូវនេះ ហើយយើងជំរុញប្រទេសជាសមាជិកអង្គការសហប្រជាជាតិទាំងអស់ រួមទាំងអ៊ុយក្រែននិងរុស្ស៊ីផងដែរ ឲ្យចូលរួមជាមួយយើងក្នុងកិច្ចប្រឹងប្រែងនេះ»៕
វេទិកាបញ្ចេញមតិ