ចក្រភពអង់គ្លេសនិងប្រទេសបារាំងកំពុងដឹកនាំការប៉ុនប៉ងដើម្បីបង្កើត«កងកម្លាំងប្រតិបត្តិការណ៍» អឺរ៉ុបដែលមានកងទ័ពចំនួនតិចជាង៣ម៉ឺននាក់ដើម្បីការពារប្រទេសអ៊ុយក្រែនបន្ទាប់ពីមានកិច្ចព្រមព្រៀងឈប់បាញ់គ្នាណាមួយជាមួយប្រទេសរុស្ស៊ី។ នេះបើតាមបណ្តាញសារព័ត៌មានរបស់ចក្រភពអង់គ្លេសដែលផ្សព្វផ្សាយកាលពីថ្ងៃព្រហស្បតិ៍ម្សិលមិញហើយត្រូវបានដកស្រង់ដោយទីភ្នាក់ងារសារព័ត៌មាន AFP។
ថ្លែងទៅកាន់ទីភ្នាក់ងារសារព័ត៌មាន AFP ប្រភពពីមន្ត្រីបារាំងដែលជិតស្និទ្ធនឹងការពិ ភាក្សាបានបញ្ជាក់មួយផ្នែកពីសេចក្តីរាយការណ៍ទាំងនោះដោយនិយាយថាបារាំងបានធ្វើការជាមួយប្រទេសនានានៅអឺរ៉ុបដើម្បីធ្វើឱ្យប្រាកដពីការធានាសន្តិសុខសម្រាប់អ៊ុយក្រែននៅក្នុងពេលមានកិច្ចព្រមព្រៀងឈប់បាញ់គ្នា។
សំណើរបស់ចក្រភពអង់គ្លេសនិងបារាំងដែលនិយាយយោងទៅលើពួកមន្ត្រីលោកខាងលិចដែលមិនប្រាប់ឈ្មោះ ទំនងនឹងផ្តោតលើប្រព័ន្ធការពារដែនអាកាសនិងនាវាចរណ៍ ដោយមានកងកម្លាំងថ្មើជើង«តិចតួច»និងគ្មានកងទ័ពដាក់ពង្រាយនៅជិតសមរភូមិផ្នែកខាងកើតទេ។ នេះបើតាមសេចក្តីរាយការណ៍របស់កាសែត Guardian។
កាសែត Times បានរាយការណ៍ថាការគាំទ្ររបស់សហរដ្ឋអាមេរិកក្នុងទម្រង់ការពារពី«ដែនអាកាស»នឹងមានសារៈសំខាន់ដល់ផែនការដែលនឹងស្វះស្វែងរកការទប់ទល់រុស្ស៊ីកុំឱ្យរំលោភលើកិច្ចព្រមព្រៀងណាមួយ។
កាសែត Financial Times បានដកស្រង់សម្តីមន្ត្រីប្រទេសលោកខាងលិចម្នាក់មកចុះផ្សាយថា«វិស័យមួយដែលយើងមានប្រៀបខ្លាំងជាងប្រទេសរុស្ស៊ីគឺសមត្ថភាពដែនអាកាសរបស់យើងដើម្បីឆ្លើយតបដល់ការរំលោភទាំងកម្រោលលើបទឈប់បាញ់គ្នា»។
គេមិនទាន់ដឹងច្បាស់ថាតើការពិចារណានេះ នឹងបំពេញចិត្តរដ្ឋាភិបាលអ៊ុយក្រែនឬត្រូវទទួលយកបានដោយរដ្ឋាភិបាលក្រុងមូស្គូដែរឬទេ។
ប្រភពបារាំងមួយដែលជិតស្និទ្ធនឹងការពិភាក្សានេះបានប្រាប់ទីភ្នាក់ងារព័ត៌មាន AFP ក្នុងលក្ខខណ្ឌមិនប្រាប់ឈ្មោះថា«យើងកំពុងពិភាក្សាអំពីការដាក់ពង្រាយកងកម្លាំងដែលនឹងកើតឡើងបន្ទាប់ពីបទឈប់បាញ់គ្នា»។
ប្រភពនោះនិយាយថាបារាំងនឹងស្ថិតនៅក្នុងតួនាទីគាំទ្រនោះ។
ប្រភពនោះនិយាយទៀតថាបេសកកម្មនេះ នឹងទាក់ទិនកងកម្លាំងមកពីប្រទេសបារាំង ចក្រភពអង់គ្លេសនិងប្រទេសផ្សេងៗទៀតរួមមានដាណឺម៉ាកនិងប្រទេសនានានៅតំបន់បាល់កង់៕
វេទិកាបញ្ចេញមតិ