កងកម្លាំងនុយក្លេអ៊ែររបស់រុស្ស៊ី កំពុងស្ថិតក្នុងការប្រុងប្រៀបខ្លួនមុនសម័យប្រជុំគ្រាអាសន្នពិសេសរបស់មហាសន្និបាតអង្គការសហប្រជាជាតិនៅថ្ងៃចន្ទនេះ ដែលកោះធ្វើឡើងដើម្បីបង្កើនការដាក់សម្ពាធខាងការទូតលើរដ្ឋាភិបាលក្រុងមូស្គូទាក់ទិននឹងការឈ្លានពានរបស់រុស្ស៊ីលើប្រទេសអ៊ុយក្រែន។
ប្រធានាធិបតីរុស្ស៊ីលោក Vladimir Putin បានប្រាប់រដ្ឋមន្ត្រីការពារជាតិរុស្ស៊ីឲ្យដាក់កងកម្លាំងនុយក្លែអ៊ែរឱ្យ«ស្ថិតក្នុងការបំពេញភារកិច្ចប្រយុទ្ធពិសេស»កាលពីថ្ងៃអាទិត្យ ដោយនិយាយថា អង្គការអូតង់បានធ្វើសេចក្តីថ្លែងការណ៍«ដ៏គឃ្លើន» ហើយបានដាក់ទណ្ឌកម្មហិរញ្ញវត្ថុចំពោះការឈ្លានពានរបស់រុស្ស៊ីលើអ៊ុយក្រែន។
បន្ទាប់ពីការបោះឆ្នោតសម្រាប់សម័យប្រជុំពិសេសដ៏កម្រមួយរបស់អង្គការសហប្រជាជាតិ ឯកអគ្គរដ្ឋទូតសហរដ្ឋអាមេរិកប្រចាំនៅអង្គការសហប្រជាជាតិលោកស្រី Linda Thomas-Greenfield បាននិយាយថា រុស្ស៊ី«មិនបានរងការគំរាមកំហែងពីអង្គការអូតង់ដែលជាសម្ព័ន្ធភាពការពារខ្លួនដែលនឹងមិនប្រយុទ្ធនៅក្នុងប្រទេសអ៊ុយក្រែននោះទេ។ នេះជាវិធានការបង្កើនភាពតានតឹងនិងមិនចាំបាច់ដែលគំរាមកំហែងយើងទាំងអស់គ្នា។ យើង ជំរុញឲ្យរុស្ស៊ីបន្ថយវោហារសាស្ត្រប្រកបដោយគ្រោះថ្នាក់របស់ខ្លួនចំពោះអាវុធនុយក្លេអ៊ែរនេះ»។
មន្ត្រីការពារជាតិជាន់ខ្ពស់ម្នាក់របស់សហរដ្ឋអាមេរិក បានប្រាប់ពួកអ្នកយកព័ត៌មានថា ការ សម្រេចចិត្តរបស់រុស្ស៊ីក្នុងការដាក់កងកម្លាំងកំញ៉ើញនុយក្លេអ៊ែររបស់ខ្លួនឲ្យស្ថិតក្នុងការប្រុងប្រៀបនោះ ជា«ការមិនចាំបាច់»និង«ជាការបង្កើន»ភាពតានតឹង។
មន្ត្រីរូបនោះបានបដិសេធពុំព្រមពិភាក្សាអំពីកងកម្លាំងនុយក្លេអ៊ែររបស់ភាគីសហរដ្ឋអាមេរិកទេ។
លោកបានថ្លែងទៀតថា៖ « យើងមានទំនុកចិត្តថា យើងមានសមត្ថភាពការពារមាតុភូមិនិងការពារសម្ព័ន្ធមិត្តនិងដៃគូរបស់យើង ហើយការណ៍នេះរួមបញ្ចូលទាំងតាមរយៈការកំញ៉ើញតាមបែបយុទ្ធសាស្ត្រផងដែរ»។
រុស្ស៊ី បានបោះឆ្នោតប្រឆាំងសម័យប្រជុំពិសេសនៅថ្ងៃចន្ទនេះរបស់មហាសន្និបាតអង្គការសហប្រជាជាតិដែលមានសមាជិក១៩៣ប្រទេស ក៏ប៉ុន្តែ មិនអាចអនុវត្តអំណាចវ៉េតូលើការបោះឆ្នោតតាមនីតិវិធី។ ប្រទេសចិន អេមីរ៉ាតអារ៉ាប់រួម និងឥណ្ឌា បានបោះឆ្នោតអនុប្បវាទ។
ឯកអគ្គរដ្ឋទូតចិនប្រចាំនៅអង្គការសហប្រជាជាតិលោក Zhang Jun បានពន្យល់ពីការបោះឆ្នោតអនុប្បវាទរបស់ចិនថា រដ្ឋាភិបាលក្រុងប៉េកាំងជឿថា អាទិភាពកំពូលនៅពេលឥឡូវនេះ គឺគ្រប់ភាគីទាំងអស់ត្រូវអនុវត្តនូវភាពអត់ធ្មត់ដើម្បីរារាំងស្ថានភាពនេះកុំឲ្យកាន់តែអាក្រក់ឡើងៗ។
សហភាពអឺរ៉ុបកំពុងបញ្ជូន «យន្តហោះចម្បាំង» ទៅកាន់ប្រទេសអ៊ុយក្រែនដើម្បីទប់ទល់យោធារុស្ស៊ី។ ប្រធានកិច្ចការនយោបាយរបស់សហភាពអឺរ៉ុបលោក Josep Borrell បានប្រាប់ពួកអ្នកយកព័ត៌មានកាលពីថ្ងៃអាទិត្យថា៖ «យើងនឹងមិននិយាយតែអំពីគ្រាប់រំសេវប៉ុណ្ណោះទេ។ យើងកំពុងផ្តល់អាវុធសំខាន់ៗលើសនេះទៀត ដើម្បីទៅធ្វើសង្គ្រាម»។
ក្នុងខណៈនោះដែរ ប្រធានាធិបតីអ៊ុយក្រែនលោក Volodymyr Zelensky បានយល់ព្រមបញ្ជូនគណៈប្រតិភូទៅកាន់ព្រំដែនប្រទេសបេឡារុសដើម្បីចាប់ផ្តើមចរចាសន្តិភាពជាមួយរុស្ស៊ីដោយគ្មានលក្ខខណ្ឌ។
ការិយាល័យរបស់លោកបានបញ្ចាក់នៅក្នុងសេចក្តីថ្លែងការណ៍ថា៖ «យើងបានយល់ព្រមថា គណប្រតិភូអ៊ុយក្រែន នឹងជួបជាមួយគណៈប្រតិភូរុស្ស៊ីដោយគ្មានលក្ខខណ្ឌជាមុននៅព្រំដែនអ៊ុយក្រែននិងបេឡារុស្សនៅជិតទន្លេ Pripyat»៕
