០០:០៩
៤.១១.២០២២
ថ្ងៃព្រហស្បតិ៍ ទី ៣ ខែវិច្ឆិកា៖
- ការវាយប្រហារដោយគ្រាប់មីស៊ីលរបស់រុស្ស៊ីបានចំទៅលើហេដ្ឋារចនាសម្ព័ន្ធថាមពលនៅក្នុងតំបន់ Zaporizhzhia និងតំបន់ Dnipropetrovsk របស់អ៊ុយក្រែនកាលពីយប់ថ្ងៃពុធ ដែលធ្វើឱ្យដំណើរការប្រព័ន្ធថាមពលរបស់អ៊ុយក្រែនកាន់តែជួបបញ្ហាធ្ងន់ធ្ងរ។ នេះបើតាមការបញ្ជាក់របស់ក្រុមហ៊ុនថាមពលអ៊ុយក្រែន Ukrenergo នៅថ្ងៃព្រហស្បតិ៍នេះ។ ការវាយប្រហាររបស់រុស្ស៊ីបានធ្វើឱ្យខូចខាតហេដ្ឋារចនាសម្ព័ន្ធថាមពលអ៊ុយក្រែនប្រមាណ៤០ភាគរយ។ នេះបើតាមការលើកឡើងរបស់ប្រធានាធិបតីអ៊ុយក្រែនលោក Volodymyr Zelenskiyy ហើយដែលត្រូវបានរាយការណ៍ដោយទីភ្នាក់ងារព័ត៌មា Reuters។
- ប្រទេសអ៊ុយក្រែនមិនដែលមានចិត្តអនុវត្តហួសពីខ្លឹមសារនៃកិច្ចព្រមព្រៀងនាំចេញគ្រាប់ធញ្ញជាតិរបស់ខ្លួនតាមសមុទ្រខ្មៅ ដែលត្រូវបានចុះហត្ថលេខាកាលពីខែកក្កដានោះឡើយ បន្ទាប់ពីការចូលឈ្លានពានរបស់រុស្ស៊ីមក។ នេះបើតាមការបញ្ជាក់របស់អ្នកនាំពាក្យក្រសួងការបរទេសអ៊ុយក្រែននៅថ្ងៃព្រហស្បតិ៍នេះ។ អ្នកនាំពាក្យក្រសួងការបរទេសអ៊ុយក្រែនលោក Oleg Nikolenko បានសរសេរនៅលើហ្វេសប៊ុកថា ប្រទេសអ៊ុយក្រែនមិនដែលប្រើប្រាស់ច្រករបៀងដឹកជញ្ជូនគ្រាប់ធញ្ញជាតិក្នុងសមុទ្រខ្មៅដើម្បីបម្រើគោលបំណងយោធានោះឡើយ ហើយក៏គ្មានបំណងនឹងធ្វើដូចនេះដែរ។ នាវាដឹកផលិតផលកសិកម្មចំនួន៧គ្រឿងបានចាកចេញពីកំពង់ផែអ៊ុយក្រែនក្នុងសមុទ្រខ្មៅនៅថ្ងៃព្រហស្បតិ៍នេះ គឺមួយថ្ងៃបន្ទាប់ពីមានការព្រមព្រៀងបន្តអនុវត្តឡើងវិញនូវកិច្ចព្រមព្រៀងក្នុងការបើកឱ្យអ៊ុយក្រែននាំចេញស្បៀងអាហារទៅកាន់ទីផ្សារបរទេសនោះ។ នេះបើតាមការបញ្ជាក់របស់ក្រសួងហេដ្ឋារចនាសម្ព័ន្ធអ៊ុយក្រែន ដែលត្រូវបានរាយការណ៍ដោយទីភ្នាក់ងារព័ត៌មាន Reuters។
- ឯកអគ្គរាជទូតចក្រភពអង់គ្លេសប្រចាំរុស្ស៊ីបានទៅដល់ក្រសួងការបរទេសរុស្ស៊ីហើយនៅព្រឹកថ្ងៃព្រហស្បតិ៍។ នេះបើតាមការចេញផ្សាយរបស់ទីភ្នាក់ងារព័ត៌មាន Reuters ដែលបានដកស្រង់ពីទីភ្នាក់ងារព័ត៌មាន RIA Novosti របស់រុស្ស៊ី។ ឯកអគ្គរាជទូតអង់គ្លេសរូបនេះត្រូវបានក្រសួងការបរទេសរុស្ស៊ីកោះហៅឱ្យចូលបំភ្លឺពីការអះអាងរបស់រុស្ស៊ីដែលថា ចក្រភពអង់គ្លេសមានជាប់ពាក់ព័ន្ធនឹងការវាយប្រហារដោយយន្តហោះដ្រូនរបស់អ៊ុយក្រែនទៅលើកងនាវារបស់រុស្ស៊ីនៅក្នុងសមុទ្រខ្មៅក្នុងតំបន់ Crimea នោះ។
- ក្រុមរដ្ឋមន្ត្រីការបរទេសនៃប្រទេស G-7 ដែលរួមមានប្រទេសមានលទ្ធិប្រជាធិបតេយ្យជឿនលឿន ជួបប្រជុំពិភាក្សាគ្នាដើម្បីស្វែងរកវិធីកាន់តែប្រសើរបំផុត ក្នុងការសម្របសម្រួលដល់ការជួយគាំទ្របន្ថែមទៀតដល់ប្រទេសអ៊ុយក្រែន នៅពេលជួបប្រជុំគ្នានៅថ្ងៃព្រហស្បតិ៍នេះនៅក្នុងប្រទេសអាល្លឺម៉ង់ បន្ទាប់ពីមានការវាយប្រហាររបស់រុស្ស៊ីក្នុងពេលថ្មីៗនេះ ទៅលើហេដ្ឋារចនាសម្ព័ន្ធថាមពលរបស់អ៊ុយក្រែន ដែលបណ្តាលឱ្យមានការកាត់ផ្តាច់ចរន្តអគ្គិសនីជាច្រើនកន្លែងនោះ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។ ការចូលឈ្លានពានរបស់រុស្ស៊ីលើប្រទេសអ៊ុយក្រែនត្រូវគេរំពឹងថា ជាប្រធានបទដ៏សំខាន់នៅក្នុងកិច្ចប្រជុំរយៈពេល២ថ្ងៃរបស់រដ្ឋមន្ត្រីការបរទេសសហរដ្ឋអាមេរិក លោក Antony Blinken ជាមួយសមភាគីរបស់លោកនៃក្រុមប្រទេស G-7 ក្នុងទីក្រុង Muenster ភាគខាងលិចប្រទេសអាល្លឺម៉ង់នោះ។ ទោះជាយ៉ាងណា បញ្ហាតួនាទីដ៏គឃ្លើនរបស់ប្រទេសចិនដែលកំពុងតែកើនឡើង និងបញ្ហាការប្រឆាំងតវ៉ានៅក្នុងប្រទេសអ៊ីរ៉ង់ក៏ជារបៀបវារៈសំខាន់ផងដែរនៅក្នុងកិច្ចប្រជុំនោះ។
- ក្រុមប្រឹក្សាសន្តិសុខអង្គការសហប្រជាជាតិបានបោះឆ្នោតទាត់ចោលដោយសំឡេងលើសលប់ប្រឆាំងការព្យាយាមរបស់រុស្ស៊ីចង់បង្កើតគណៈកម្មការមួយដើម្បីស៊ើបអង្កេតការចោទប្រកាន់ដែលគ្មានមូលដ្ឋានរបស់រុស្ស៊ីដែលថា ប្រទេសអ៊ុយក្រែននិងសហរដ្ឋអាមេរិកកំពុងអនុវត្តនូវ«សកម្មភាពយោធាជីវសាស្ត្រ» ដែលជាការរំលោភបំពានទៅនឹងអនុញ្ញាហាមប្រាមការប្រើប្រាស់អាវុធជីវសាស្ត្រនោះ។ នេះបើតាមសេចក្តីរាយការណ៍របស់ទីភ្នាក់់ងារព័ត៌មាន AP។ ប្រទេសរុស្ស៊ីបានទទួលសំឡេងឆ្នោតគាំទ្រតែមួយប៉ុណ្ណោះពីប្រទេសចិនទៅលើសេចក្តីសម្រេចចិត្តរបស់ខ្លួន ហើយសហរដ្ឋអាមេរិក ចក្រភពអង់គ្លេសនិងប្រទេសបារាំងបានបោះឆ្នោតបដិសេធ ហើយប្រទេស១០ផ្សេងទៀតបានបោះឆ្នោតអនុប្បវាទ។
- សភាប្រទេសហុងគ្រីនឹងធ្វើការសម្រេចចិត្តថា តើខ្លួននឹងបើកការប្រជុំពិភាក្សានៅពេលណាស្តីពីការផ្តល់សច្ចាប័នសម្រាប់សំណើរបស់ប្រទេសហ្វាំងឡង់ និងប្រទេសស៊ុយអែតសុំចូលជាសមាជិករបស់អង្គការអូតង់នោះ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters នៅថ្ងៃព្រហស្បតិ៍នេះ ដែលបានស្រង់សម្តីរបស់រដ្ឋមន្ត្រីការបរទេសហុងគ្រីលោក Peter Szijjarto ដែលបាននិយាយនៅក្នុងសន្និសីទសារព័ត៌មានមួយ។ លោក Szijjarto បាននិយាយថា រដ្ឋាភិបាលហុងគ្រីបានធ្វើការងាររបស់ខ្លួនរួចហើយ ដោយបញ្ជូនសេចក្តីស្នើច្បាប់នេះទៅសភា។ ប្រទេសហុងគ្រី និងប្រទេសតួកគីជាសមាជិករបស់អង្គការអូតង់តែ២គត់ ដែលមិនទាន់ផ្តល់ការយល់ព្រមទៅលើសំណើរបស់ប្រទេសហ្វាំងឡង់ និងប្រទេសស៊ុយអែតសុំចូលជាសមាជិកអង្គការអូតង់។
២១:៥២
២.១១.២០២២
ថ្ងៃពុធ ទី ២ ខែវិច្ឆិកា៖
- ប្រទេសរុស្ស៊ីនៅថ្ងៃពុធនេះនិយាយថា ខ្លួនបានបន្តចូលរួមអនុវត្តឡើងវិញហើយនូវកិច្ចព្រមព្រៀងមួយ ដែលជួយសម្រួលឱ្យមានការដឹកគ្រាប់ធញ្ញជាតិរបស់អ៊ុយក្រែនតាមសមុទ្រខ្មៅ។ ក្រសួងការពារជាតិរុស្ស៊ី ដែលបានបញ្ជាក់នៅក្នុងសេចក្តីថ្លែងការណ៍មួយថា៖ «សហព័ន្ធរុស្ស៊ីពិចារណាថា ការធានារបស់អ៊ុយក្រែនដែលខ្លួនទទួលបាន មានលក្ខណៈគ្រប់គ្រាន់ហើយនៅពេលនេះ ហើយខ្លួនបន្តការអនុវត្តនូវកិច្ចព្រមព្រៀងនោះឡើងវិញ»។ប្រធានាធិបតីអ៊ុយក្រែនលោក Volodymyr Zelenskyy បានថ្លែងនៅក្នុងសុន្ទរកថាពេលរាត្រីរបស់លោកកាលពីថ្ងៃអង្គារថា ច្រករបៀងដឹកជញ្ជូនគ្រាប់ធញ្ញជាតិនោះ ចាំបាច់ត្រូវធានាឱ្យមានការពារក្នុងរយៈពេលយូរដ៏ទុកចិត្តមួយ»។ ទីភ្នាក់ងារព័ត៌មាន AFP រាយការណ៍ថា ប្រទេសរុស្ស៊ីបានប្រកាសផ្អាកអនុវត្តកិច្ចព្រមព្រៀងនេះកាលពីថ្ងៃអាទិត្យ ដោយចោទប្រកាន់ប្រទេសអ៊ុយក្រែនថា បានប្រើប្រាស់ផ្លូវដឹកជញ្ជូនដែលមានសុវត្ថិភាពនេះ ដើម្បីធ្វើការវាយប្រហារទៅលើនាវារបស់រុស្ស៊ីនៅក្នុងតំបន់ Crimea។ រដ្ឋាភិបាលក្រុងកៀវបានបដិសេធការចោទប្រកាន់របស់រុស្ស៊ី ថាជាលេសមួយ ដើម្បីដកខ្លួនចេញពីកិច្ចព្រមព្រៀងនេះ។
- ប្រទេសរុស្ស៊ីនឹងកោះហៅឯកអគ្គរដ្ឋទូតចក្រភពអង់គ្លេសប្រចាំទីក្រុងមូស្គូឱ្យពន្យល់ជុំវិញអ្វីដែលរុស្ស៊ីនិយាយថា ជាការពាក់ព័ន្ធរបស់អ្នកជំនាញអង់គ្លេស នៅក្នុងការវាយប្រហារតាមយន្តហោះដ្រូនរបស់អ៊ុយក្រែន ទៅលើនាវារបស់រុស្ស៊ីនៅក្នុងសមុទ្រខ្មៅក្នុងពេលកន្លងទៅនោះ។ នេះបើតាមការលើកឡើងរបស់ក្រសួងការបរទេសរុស្ស៊ីនៅថ្ងៃពុធនេះ។ ក្រសួងការពារជាតិរុស្ស៊ីនិយាយថាការវាយប្រហារតាមយន្តហោះដ្រូននោះ ត្រូវបានធ្វើឡើងនៅក្រោមការណែនាំនិងដឹកនាំរបស់អ្នកជំនាញការកងទ័ពជើងទឹកចក្រភពអង់គ្លេស ដែលការចោទប្រកាន់នេះត្រូវបានចក្រភពអង់គ្លេសបដិសេធថាមិនពិតនោះឡើយ។
- ក្រុមប្រឹក្សាសន្តិសុខអង្គការសហប្រជាជាតិ មានគម្រោងនឹងបោះឆ្នោតនៅថ្ងៃពុធនេះលើសេចក្តីសម្រេចមួយ ជុំវិញការអះអាងរបស់រុស្ស៊ីទៅលើអាវុធជីវសាស្ត្ររបស់អ៊ុយក្រែន។ នេះបើតាមសេចក្ដីរាយការណ៍របស់ទីភ្នាក់ងារព័ត៌មាន AP។ ប្រទេសរុស្ស៊ីបានផ្តល់ឯកសារកម្រាស់ចំនួន ៣១០ទំព័រ ដល់ក្រុមប្រឹក្សាសន្តិសុខអង្គការសហប្រជាជាតិ ដែលនិយាយលម្អិតពីសកម្មភាពអាវុធជីវសាស្ត្រ ដែលអ៊ុយក្រែនកំពុងអនុវត្ត ដោយមានការជួយជ្រោមជ្រែងពីក្រសួងការពារជាតិសហរដ្ឋអាមេរិកផងដែរ។ ការអះអាងរបស់រុស្ស៊ីនោះ ត្រូវបានសហរដ្ឋអាមេរិក ប្រទេសអ៊ុយក្រែន ក៏ដូចក្រុមអ្នកវិទ្យាសាស្ត្របានបដិសេធចោល។ ក្រុមប្រឹក្សាសន្តិសុខអង្គការសហប្រជាជាតិ នឹងធ្វើការបោះឆ្នោតទៅលើសេចក្តីសម្រេចមួយ ដែលនឹងបង្កើតនូវគណៈកម្មការមួយ ដើម្បីធ្វើការស៊ើបអង្កេតជុំវិញការចោទប្រកាន់របស់រុស្ស៊ីនៅក្នុងរឿងនេះ។
- ក្រុមអាជ្ញាធរនៅក្នុងរដ្ឋធានីកៀវ ប្រទេសអ៊ុយក្រែន កំពុងរៀបចំបង្កើតទីតាំងផ្តល់កម្តៅប្រមាណជាង១ពាន់កន្លែង នៅជុំវិញទីក្រុងនេះ ដើម្បីបង្ការក្រែងប្រព័ន្ធផ្តល់កម្តៅរបស់ក្រុងមួយនេះ ត្រូវបានកាត់ផ្តាច់ដោយការវាយប្រហារ ដែលកំពុងបន្តកើតមានឡើងពីសំណាក់កងកម្លាំងរុស្ស៊ី។ នេះបើតាមទីភ្នាក់ងារព័ត៌មាន Reuters ដែលបានស្រង់សម្តីអភិបាលទីក្រុងកៀវនៅថ្ងៃពុធនេះ។ ការវាយប្រហារដោយគ្រាប់មីស៊ីលនិងយន្តហោះដ្រូនរបស់រុស្ស៊ី បានធ្វើឱ្យហេដ្ឋារចនាសម្ព័ន្ធថាមពលអ៊ុយក្រែនប្រមាណចំនួន៤០ភាគរយ ទទួលរងនូវការខូចខាត ហើយបានធ្វើឱ្យផ្នែកជាច្រើនរបស់រដ្ឋធានីកៀវ គ្មានចរន្តអគ្គិសនីនិងទឹកប្រើប្រាស់ ដែលជំរុញឱ្យមានការដាក់កំហិតលើការផ្តល់ថាមពលប្រើប្រាស់។
- សហភាពអឺរ៉ុបកំពុងរិះរកវិធីផ្សេងៗដើម្បីបង្កើនការជួយដល់ប្រទេសអ៊ុយក្រែន ក្នុងផ្នែកថាមពល បន្ទាប់ពីទទួលរងការវាយប្រហារដ៏ឃោរឃៅនឹងអមនុស្សធម៌ពីសំណាក់កងកម្លាំងរុស្ស៊ី ដែលបណ្តាលឱ្យមានការកាត់ផ្តាច់ចរន្តអគ្គិសនីជាច្រើនកន្លែង។ នេះបើតាមការចេញផ្សាយរបស់ទីភ្នាក់ងារព័ត៌មាន Reuters ដែលបានស្រង់សម្តីលោកស្រី Kadri Simson ដែលជាប្រធានថាមពលសហភាពអឺរ៉ុប។ នៅក្នុងអំឡុងពេលនៃដំណើរទស្សនកិច្ចរបស់លោកស្រីទៅកាន់រដ្ឋធានីកៀវកាលពីម្សិលមិញ លោកស្រី Simson និយាយថា ក្រុមហ៊ុនបរទេសនានា គួរត្រូវបានជំរុញឱ្យបង្កើនអាទិភាពក្នុងការបញ្ជូនឧបករណ៍ថាមពលទៅកាន់ប្រទេសអ៊ុយក្រែនឱ្យបានឆាប់រហ័ស។ លោកស្រីនិយាយថា ប្រទេសអ៊ុយក្រែនត្រូវការឧបករណ៍និងសម្ភារចាំបាច់នានា ដើម្បីជួសជុលការខូចខាតហេដ្ឋារចនាសម្ព័ន្ធថាមពលរបស់ខ្លួន ហើយលោកស្រីបានប្រាប់ទៅប្រធានាធិបតីអ៊ុយក្រែនលោក Zelenskyy ថា សហភាពអឺរ៉ុប «កំពុងធ្វើទំនាក់ទំនងទៅកាន់ដៃគូរបស់ខ្លួន ដើម្បីផ្តល់នូវការគាំទ្រចាំបាច់នានា សម្រាប់ប្រទេសអ៊ុយក្រែន»។
- សារព័ត៌មាន The Kyiv Independent រាយការណ៍ថា កងកម្លាំងអ៊ុយក្រែនបានបាញ់ទម្លាក់យន្តហោះដ្រូនរបស់រុស្ស៊ីចំនួន ១២ គ្រឿងកាលពីយប់មិញ។ កងកម្លាំងទ័ពអាកាសអ៊ុយក្រែនបានឱ្យដឹងថា កងទ័ពអ៊ុយក្រែនបានបាញ់ទម្លាក់យន្តហោះដ្រូនប្រភេទ Shahed-136 ដែលផលិតក្នុងប្រទេសអ៊ីរ៉ង់ចំនួន១២គ្រឿងក្នុងចំណោម១៣គ្រឿង ដែលរុស្ស៊ីបានប្រើប្រាស់ដើម្បីធ្វើការវាយប្រហារលើប្រទេសអ៊ុយក្រែនកាលពីយប់។
២១:៥២
១.១១.២០២២
ថ្ងៃអង្គារ ទី ១ ខែវិច្ឆិកា៖
- ក្រុមអាជ្ញាធររុស្ស៊ីដែលកំពុងគ្រប់គ្រងតំបន់អ៊ុយក្រែនភាគខាងត្បូងបាននិយាយនៅថ្ងៃអង្គារថា មនុស្សជាច្រើនម៉ឺននាក់នឹងត្រូវជម្លៀសចេញពីតំបន់ Kherson ខណៈកងកម្លាំងអ៊ុយក្រែនកំពុងធ្វើការវាយបកយ៉ាងខ្លាំងក្លា។ នេះបើតាមការចេញផ្សាយរបស់ទីភ្នាក់ងារព័ត៌មាន AFP។ មេដឹកនាំតំបន់ Kherson លោក Vladimir Saldo ដែលត្រូវបានតែងតាំងដោយរុស្ស៊ី បាននិយាយថា មនុស្សប្រមាណ៧ម៉ឺននាក់ ដែលរស់នៅតាមដងទន្លេ Dnipro ត្រើយខាងកើតចម្ងាយប្រមាណ១៥គីឡូម៉ែត្រ នឹងត្រូវធ្វើការជម្លៀសចូលជ្រៅមកក្នុងតំបន់នេះ ឬចូលទៅក្នុងប្រទេសរុស្ស៊ី។ លោក Vladimir Saldo បាននិយាយនៅក្នុងបទសម្ភាសន៍លើបណ្ដាញ Solovyov Live YouTube ដែលបានផ្សាយផ្ទាល់ថា«យើងបានចាប់ផ្តើមការងារនេះហើយ»។ លោកបន្ថែមថា ការជម្លៀសប្រជាជននេះត្រូវបានធ្វើឡើង ដោយសារតែពួកគេអាចប្រឈមនឹងគ្រោះថ្នាក់នៃការវាយប្រហារដោយគ្រាប់មីស៊ីលពីកម្លាំងកងទ័ពអ៊ុយក្រែន ទៅលើទំនប់ទឹកមួយកន្លែងនៅទីនោះ។
- ការផ្គត់ផ្គង់ទឹកនិងអគ្គិសនីត្រូវបានស្តារឡើងវិញហើយ នៅក្នុងរដ្ឋធានីកៀវប្រទេសអ៊ុយក្រែន គឺមួយថ្ងៃបន្ទាប់ពីមានការវាយប្រហារយ៉ាងខ្លំាងដោយគ្រាប់មីស៊ីលរបស់រុស្ស៊ីនោះ។ នេះបើតាមការចេញផ្សាយរបស់ទីភ្នាក់ងារព័ត៌មាន AFP នៅថ្ងៃអង្គារនេះ ដែលបានស្រង់សម្តីរបស់អភិបាលក្រុងកៀវ។ កងកម្លាំងយោធាអ៊ុយក្រែននិយាយថា រុស្ស៊ីបានធ្វើការវាយប្រហារដោយគ្រាប់មីស៊ីល cruise ចំនួន៥៥គ្រាប់ និងគ្រាប់ដទៃជាច្រើនទៀតនៅទូទាំងប្រទេសអ៊ុយក្រែន កាលពីថ្ងៃចន្ទ។ ទីប្រឹក្សាប្រធានាធិបតីអ៊ុយក្រែន លោក Oleksiy Arestovich នៅថ្ងៃអង្គារនេះ បានហៅការវាយប្រហាររបស់របស់កងកម្លាំងរុស្ស៊ីនោះ ថាជាការវាយប្រហារ«ដ៏ធំបំផុតមួយទៅលើទឹកដីរបស់ប្រទេសអ៊ុយក្រែន»។
- កងកម្លាំងរុស្ស៊ីបានបាញ់គ្រាប់មីស៊ីលចំនួន៤គ្រាប់ទៅលើទីក្រុងកំពង់ផែ Mykolaiv នៅភាគខាងត្បូងអ៊ុយក្រែនកាលពីយប់មិញ ដោយបំផ្លាញអគារលំនៅដ្ឋានមួយកន្លែង និងមានពលរដ្ឋអ៊ុយក្រែនម្នាក់បានស្លាប់នៅក្នុងការវាយប្រហារនោះ។ ការវាយប្រហារបានកើតឡើងតែមួយថ្ងៃប៉ុណ្ណោះ បន្ទាប់ពីរុស្ស៊ីបានធ្វើការវាយប្រហារដោយគ្រាប់មីស៊ីលយ៉ាងខ្លាំង ទៅលើទីក្រុងនានារបស់អ៊ុយក្រែន ដោយរួមទាំងរដ្ឋធានីកៀវរបស់ប្រទេសនេះផងដែរ។ ក្រុមអ្នកជួយសង្គ្រោះបានរកឃើញសាកសពស្ត្រីវ័យចំណាស់ម្នាក់ពីគំនរបាក់បែកនៃអគារលំនៅដ្ឋាននោះកាលពីព្រឹកថ្ងៃអង្គារនេះ។ នេះបើតាមសាក្សីមួយចំនួនដែលបានប្រាប់ទីភ្នាក់ងារព័ត៌មាន Reuters។
- រដ្ឋមន្ត្រីការពារជាតិប្រទេសតួកគីលោក Hulusi Akar បានប្រាប់រដ្ឋមន្ត្រីការពារជាតិនិងហេដ្ឋារចនាសម្ព័ន្ធអ៊ុយក្រែនថា ការរក្សាទុកនូវកិច្ចព្រមព្រៀងដឹកជញ្ជូនគ្រាប់ធញ្ញជាតិតាមសមុទ្រខ្មៅ គឺមានសារៈសំខាន់ ហើយថា ដោយសារវាជាគំនិតផ្តួចផ្តើមមនុស្សធម៌មួយនោះ បញ្ហានេះគួរត្រូវបានចាត់ទុកដាច់ដោយឡែកពីជម្លោះនៅក្នុងប្រទេសអ៊ុយក្រែន។ ការលើកឡើងរបស់រដ្ឋមន្ត្រីការពារជាតិតួកគីរូបនេះ ត្រូវបានផ្សព្វផ្សាយដោយក្រសួងការពារជាតិតួកគីនៅថ្ងៃអង្គារនេះ បន្ទាប់ពីរុស្ស៊ីបានផ្អាកការអនុវត្តកិច្ចព្រមព្រៀងនេះ ដែលផ្តួចផ្តើមឡើងដោយអង្គការសហប្រជាជាតិ និងប្រទេសតួកគីកាលពីខែកក្កដាកន្លងទៅ ក្នុងបំណងរក្សាការហូរចូលនូវទំនិញស្បៀងអាហារនៅលើទីផ្សារសាកលលោក។ រដ្ឋមន្ត្រីការពារជាតិតួកគីរូបនេះ ក៏បានប្រាប់សមភាគីរុស្ស៊ីរបស់លោកផងដែរកាលពីថ្ងៃចន្ទដែលថា រដ្ឋាភិបាលក្រុងមូស្គូគួរពិចារណាឡើងវិញ លើសេចក្តីសម្រេចផ្អាកកិច្ចព្រមព្រៀងរបស់ខ្លួននោះ។ នេះបើតាមទីភ្នាក់ងារព័ត៌មាន Reuters។
- ប្រធានាធិបតីរុស្ស៊ីលោក Vladimir Putin និយាយថា ការវាយប្រហាររបស់រុស្ស៊ីទៅលើប្រព័ន្ធហេដ្ឋារចនាសម្ព័ន្ធរបស់អ៊ុយក្រែន ក៏ដូចជាការសម្រេចចិត្តផ្អាកកិច្ចព្រមព្រៀងស្តីពីកម្មវិធីនាំចេញគ្រាប់ធញ្ញជាតិក្នុងសមុទ្រខ្មៅនោះ គឺជាការឆ្លើយតបទៅនឹងការវាយប្រហារដោយយន្តហោះដ្រូនមួយ ទៅលើនាវារបស់រុស្ស៊ីនៅក្នុងតំបន់ Crimea ដែលលោក Putin បានស្តីបន្ទោសទៅលើអ៊ុយក្រែនថាជាអ្នកនៅពីក្រោយនៃការវាយប្រហារនោះ។ នេះបើតាមការចេញផ្សាយរបស់ទីភ្នាក់ងារព័ត៌មាន Reuters។
- ក្រុមមន្ត្រីអ៊ុយក្រែនបានអំពាវនាវឱ្យទុករុស្ស៊ីនៅឯកោពីក្រុមអង្គការអន្តរជាតិនានា បន្ទាប់ពីកងកម្លាំងរុស្ស៊ីបានធ្វើការវាយប្រហារទៅលើគោលដៅហេដ្ឋារចនាសម្ព័ន្ធនានានៅក្នុងទីក្រុងជាច្រើនក្នុងប្រទេសអ៊ុយក្រែនមក។ អ្នកនាំពាក្យក្រសួងការបរទេសអ៊ុយក្រែន លោក Oleg Nikolenko បាននិយាយនៅថ្ងៃអង្គារនេះថា រុស្ស៊ីគួរត្រូវបានគេបណ្តេញចេញពីក្រុមប្រទេសដែលមានឧស្សាហកម្មជឿនលឿនទាំង២០ ឬ G-20 ហើយការអញ្ជើញប្រធានាធិបតីរុស្ស៊ីលោក Vladimir Putin ទៅចូលរួមក្នុងកិច្ចប្រជុំកំពូល G-20 ក្នុងប្រទេសឥណ្ឌូណេស៊ីនៅក្នុងខែនេះ គួរត្រូវដកចេញវិញ។
២២:៣០
២៨.១០.២០២២
ថ្ងៃសុក្រ ទី២៨ ខែតុលា៖
- មន្ត្រីតួកគីម្នាក់បាននិយាយប្រាប់ទីភ្នាក់ងារព័ត៌មានបារាំង AFP នៅថ្ងៃសុក្រថា ប្រធានអង្គការអូតង់លោក Jens Stoltenberg នឹងទៅបំពេញទស្សនកិច្ចនៅប្រទេសតួកគីនៅថ្ងៃទី៤ ខែវិច្ឆិកា ដើម្បីចរចាស្តីពីដំណើរការជិតបញ្ចប់របស់ប្រទេសហ្វាំងឡង់និងស៊ុយអែតដើម្បីចូលរួមក្នុងសម្ព័ន្ធមិត្តយោធានេះ។ លោកStoltenbergមានគម្រោងជួបជាមួយប្រធានាធិបតីតួកគីលោក Recep Tayyip Erdogan ដែលបានព្រមានថា ប្រទេសរបស់លោកនឹងមិនយល់ព្រមដល់សមាជិកភាពរបស់ប្រទេសទាំង២នេះទេរហូតទាល់តែ «ប្រទេសទាំង២ធ្វើទៅតាមការសន្យារបស់ខ្លួនសិន»។ លោក Erdogan បានចោទប្រកាន់ប្រទេសហ្វាំងឡង់និងស៊ុយអែតថា បានផ្តល់ទីជម្រកដល់ពួកជនសម្ពន្ធប្រយុទ្ធ Kurds ខុសច្បាប់ដែលត្រូវបានចាត់ទុកដោយរដ្ឋាភិបាលក្រុងអង់ការ៉ាថាជា«ភេរវជន»។ កាលពីខែមិថុនា តួកគី ស៊ុយអែតនិងហ្វាំងឡង់បានធ្វើកិច្ចព្រមព្រៀងមួយដែលមានរួម ខចែងពីការធ្វើបត្យាប័ននិងចែកចាយព័ត៌មាន។ កាលពីថ្ងៃពុធ លោក Stoltenberg បានប្រកាសផែនការអំពីដំណើរទស្សនកិច្ចទៅកាន់ប្រទេសតួកគីខណៈដែលសរសើរអំពី«ទំនាក់ទំនងដ៏ជិតស្និទ្ធ»ដែលរដ្ឋាភិបាលស៊ុយអែតនិងហ្វាំងឡង់មានជាមួយរដ្ឋាភិបាលក្រុងអង់ការ៉ា«នៅគ្រប់កម្រិត»។
- សាច់ញាតិរបស់ពួកអ្នកទោសសង្គ្រាមជាតិអ៊ុយក្រែនមានគម្រោងជួបពួកអ្នកតំណាងរបស់អង្គការសហប្រជាជាតិនិងកាកបាទក្រហមនៅក្នុងទីក្រុងហ្សឺណែវ នៅថ្ងៃព្រហស្បតិ៍ដើម្បីស្វះស្វែងឱ្យពួកគេជួយដើម្បីឱ្យបានទៅដល់មនុស្សជាទីស្រឡាញ់របស់ខ្លួន។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។ ស្ត្រី៤នាក់ជាភរិយា កូនស្រីឬម្តាយរបស់ពួកឈ្លើយសឹកដែលត្រូវបានឃុំខ្លួនដោយរុស្ស៊ីនៅក្នុងសង្គ្រាមនៅក្នុងប្រទេសអ៊ុយក្រែន ត្រូវបានអមដំណើរដោយលោកស្រី Hanna Zamazieieva តំណាងអ៊ុយក្រែននៅឯក្រុមប្រឹក្សាអឺរ៉ុបដែលជាអង្គការសិទ្ធិមនុស្សនាំមុខមួយរបស់ទ្វីបនោះ។ ស្ត្រី៤នាក់ដែលសុំមិនប្រាប់ឈ្មោះដោយសារតែបញ្ហាសន្តិសុខមានគម្រោងជួបជាមួយពួកអ្នកតំណាងមកពីការិយាល័យសិទ្ធិមនុស្សរបស់អង្គការសហប្រជាជាតិនិងគណៈកម្មាធិការកាកបាទក្រហមអន្តរជាតិ (ICRC)។ លោកស្រី Zamazieieva បានប្រាប់ពួកអ្នកយកព័ត៌មានតាមរយៈអ្នកបកប្រែភាសាម្នាក់របស់បេសកកម្មអ៊ុយក្រែនប្រចាំនៅអង្គការសហប្រជាជាតិក្នុងទីក្រុងហ្សឺណែវថា«ការណ៍នេះនឹងធ្វើឱ្យពួកគេដឹងអំពីរឿងរ៉ាវរបស់ពួកគេហើយនឹងអំពាវនាវដល់ពួកគេឱ្យចាត់វិធានការ»។
- ប្រធានឧបទ្វីប Crimea ដែលគ្រប់គ្រងដោយរដ្ឋាភិបាលក្រុងមូស្គូបាននិយាយថា ការចាកចេញរបស់ជនស៊ីវិលពីតំបន់ Kherson ដែលរៀបចំឡើងដោយកងទ័ពរុស្ស៊ីនៅពេលមានការវាយបកពីកងទ័ពអ៊ុយក្រែនបាន«បញ្ចប់» បន្ទាប់ពីលោកបានចុះទៅពិនិត្យមើលតំបន់នោះជាមួយលោក Sergei Kiriyenko ប្រធានកិច្ចការក្នុងស្រុករបស់រដ្ឋាភិបាលវិមានក្រឹមឡាំង។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។ លោក Sergei Aksyonov ប្រធានឧបទ្វីបCrimeaដែលតែងតាំងដោយរដ្ឋាភិបាលក្រុងមូស្គូបាននិយាយតាម Telegram កាលពីយប់ថ្ងៃព្រហស្បតិ៍ថា៖ «ការងារដើម្បីរៀបចំឱ្យពួកអ្នកស្រុកចាកចេញពីត្រើយខាងឆ្វេងនៃទន្លេ Dnipro ទៅកាន់តំបន់ដែលមានសុវត្ថិភាពក្នុងប្រទេសរុស្ស៊ីបានចប់សព្វគ្រប់ហើយ»។ ពួកអាជ្ញាធរដែលត្រួតត្រាដោយរដ្ឋាភិបាលក្រុងមូស្គូនៅក្នុងតំបន់ភាគខាងត្បូងប្រទេសអ៊ុយក្រែនបានជំរុញឱ្យពួកអ្នកស្រុកឆ្លងទៅកាន់ត្រើយខាងស្តាំនៃទន្លេ Dnipro នៅពេលដែលកងទ័ពអ៊ុយក្រែនបានរុលទៅមុខនៅតំបន់ភាគខាងត្បូង។ រដ្ឋាភិបាលក្រុងកៀវបានប្រៀបធៀបការជម្លៀសមនុស្សនេះថាដូចទៅនឹង«ការនិរទេស»ប្រជាជនក្នុងសម័យសហភាពសូវៀត។
- នាយិកាមូលនិធិរូបិយវត្ថុអន្តរជាតិលោកស្រី Kristalina Georgieva កាលពីថ្ងៃព្រហស្បតិ៍បាននិយាយថា ការសន្យាផ្គត់ផ្គង់ហិរញ្ញវត្ថុដល់ប្រទេសអ៊ុយក្រែនដោយសហរដ្ឋអាមេរិកនិងអឺរ៉ុបនឹងមានគ្រប់គ្រាន់សម្រាប់រដ្ឋាភិបាលក្រុងកៀវរហូតដល់ឆ្នាំ២០២៣ ដោយសន្មតថាសង្គ្រាមនេះនឹងមិនរីកកាន់តែធំឡើង។ លោកស្រី Georgieva បានប្រាប់ទីភ្នាក់ងារព័ត៌មាន AFPនៅខាងក្រៅសន្និសីទដែលបានរៀបចំឡើងដោយគណៈកម្មការអឺរ៉ុបដែលជាសាខានីតិបញ្ញត្តិនៃសហភាពអឺរ៉ុបថា «យើងនឹងមានប្រាក់គ្រប់គ្រាន់ដល់ឆ្នាំ ២០២៣ដើម្បីជួយប្រទេសអ៊ុយក្រែន»។ ស្ថានភាពហិរញ្ញវត្ថុរបស់អ៊ុយក្រែនមានការលំបាកពីព្រោះតែការឈ្លានពានរបស់រុស្ស៊ីហើយប្រធានាធិបតីអ៊ុយក្រែនលោក Volodymyr Zelensky បានអំពាវនាវដល់ពួកអ្នកគាំទ្រអន្តរជាតិឱ្យបំពេញភាពច្រឡោះប្រហោងនៃថវិកាចំនួន៣៨ពាន់លានដុល្លាររបស់ប្រទេសលោកសម្រាប់ឆ្នាំ២០២៣។ មហាអំណាចប្រទេសលោកខាងលិចទទូចថា ការធ្វើឱ្យប្រទេសដែលហែកហួរដោយសង្គ្រាមនេះមានស្ថិរភាពជាការសំខាន់ជាប្រវត្តិសាស្ត្រ ដោយអធិការបតីអាល្លឺម៉ង់លោក Olaf Scholz បានអំពាវនាវឱ្យមានផែនការ Marshall ថ្មីមួយសម្រាប់សតវត្សរ៍ទី២១នៅឯសន្និសីទស្តីពីប្រទេសអ៊ុយក្រែននៅដើមសប្តាហ៍នេះ៕