ក្រសួងព័ត៌មានកាលពីថ្ងៃចន្ទ បានចេញសេចក្ដីជូនដំណឹងមួយហាមអ្នកពាក់ព័ន្ធមិនឲ្យផលិត និងចាក់ផ្សាយវីដេអូដែលបង្ហាញពីការប្រើប្រាស់គ្រឿងស្រវឹងដើម្បីបំបាត់ទុក្ខ ដោយថា ជាការធ្វើឲ្យប៉ះពាល់ដល់សីលធម៌ និងសណ្ដាប់ធ្នាប់សង្គម។ ប្រធានសមាគមភាពយន្តលើកឡើងថា ក្រសួងគួរពិភាក្សាជាមួយអ្នកផលិត ដើម្បីស្វែងយល់ពីបញ្ហា និងផលប៉ះពាល់ជាមុន ជៀសវាងធ្វើឲ្យប៉ះពាល់ដល់វិស័យមួយនេះ។
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានណែនាំម្ចាស់ស្ថានីយ៍វិទ្យុ ទូរទស្សន៍ និងម្ចាស់ផលិតកម្មភាពយន្ត វីដេអូ ឲ្យបញ្ឈប់ការផលិត និងចាក់ផ្សាយវីដេអូ ឬចម្រៀងដែលយកគ្រឿងស្រវឹងធ្វើជាការដោះស្រាយវិបត្តិ។ នេះបើតាមសេចក្ដីជូនដំណឹងរបស់ក្រសួងព័ត៌មានដែល VOA បានទទួល។
សេចក្ដីជូនដំណឹង ដែលចេញដោយលោក ខៀវ កាញារីទ្ធ កាលពីថ្ងៃចន្ទ បញ្ជាក់ថា ការផលិតខ្សែភាពយន្ត ឬវីដេអូខារ៉ាអូខេដែលជ្រើសយកគ្រឿងស្រវឹងជាគុណសម្បត្តិក្នុងការដោះស្រាយបញ្ហាវិបត្តិស្នេហា ឬទុក្ខកង្វល់ផ្សេងៗ បាននាំឲ្យយុវជនដែលពុំទាន់មានមូលដ្ឋានក្នុងការពិចារណា មានការភាន់ច្រឡំ និងយកតម្រាប់តាម។
លោកបន្ថែមក្នុងលិខិតនោះថា ការយល់ច្រឡំ និងយកតម្រាប់តាមរបស់យុវជន បានធ្វើឲ្យពួកគេប្រើប្រាស់គ្រឿងស្រវឹងរហូតបាត់បង់សតិ ឈានទៅរកការប្រើប្រាស់គ្រឿងញៀន និងការប្រព្រឹត្តអំពើហិង្សា ដែលធ្វើឲ្យប៉ះពាល់ដល់កិត្តិយស សេចក្ដីថ្លៃថ្នូរ និងសណ្ដាប់ធ្នាប់សង្គម។
លោក ខៀវ កាញារីទ្ធ បានសរសេរបន្ថែមក្នុងសេចក្ដីជូនដំណឹងនោះតាមសម្រង់ន័យដើមថា៖
«ដើម្បីជៀសវាងផលអវិជ្ជមានខាងលើ ក្រសួងព័ត៌មានសូមធ្វើការណែនាំដល់ម្ចាស់ស្ថានីយ៍វិទ្យុ ទូរទស្សន៍ និងម្ចាស់ផលិតកម្មភាពយន្ត វីដេអូ ដែលតែងនិពន្ធបទចម្រៀង ឬភាពយន្ត វីដេអូ សាច់រឿងតួអង្គមានវិបត្តិផ្លូវចិត្ត សូមបង្ហាញនូវវិធីដោះស្រាយសមស្រប ឬការអប់រំផ្លូវចិត្ត ឬការតាំងសមាធិធ្វើជាមធ្យោបាយដោះស្រាយបញ្ហា ប្រសើរជាងការបង្ហាញរូបភាពប្រើប្រាស់គ្រឿងស្រវឹង ដើម្បីដោះស្រាយបញ្ហាបំបាត់ទុក្ខសោករបស់តួអង្គ»។
លោក ខៀវ កាញារីទ្ធ បានបន្ថែមក្នុងលិខិតនោះដោយព្រមានបញ្ឈប់ឲ្យចាក់ផ្សាយបទចម្រៀង ឬសាច់រឿងដែលបង្ហាញពីការប្រើប្រាស់គ្រឿងស្រវឹងបែបនោះក្នុងប្រព័ន្ធផ្សព្វផ្សាយ ប្រសិនបើម្ចាស់ស្ថានីយ៍វិទ្យុ ទូរទស្សន៍ ឬម្ចាស់ផលិតកម្មណាមិនអនុវត្តតាម។
លោក ឆាយ បូរ៉ា ប្រធានសមាគមភាពយន្ត ប្រាប់ VOA នារសៀលថ្ងៃអង្គារនេះថា សេចក្ដីជូនដំណឹងរបស់ក្រសួងព័ត៌មានក្នុងគោលបំណងទប់ស្កាត់យុវជនមិនឲ្យប្រើប្រាស់គ្រឿងស្រវឹង គឺជាគំនិតល្អ ប៉ុន្តែ លោកថា ការផលិតភាពយន្ត ឬវីដេអូ តែងឆ្លុះបញ្ចាំងពីតថភាពជាក់ស្ដែងក្នុងសង្គម ដូច្នេះលោកថា ការជូនដំណឹងឲ្យបញ្ឈប់ដោយមិនយល់ពីយន្តការនៃការផលិត នឹងធ្វើឲ្យប៉ះពាល់ដល់វិស័យនេះ។
លោកមានប្រសាសន៍ថា៖
«ឧទាហរណ៍ថាយើងចង់អប់រំយុវជនពីរឿងអ្វីមួយ ប៉ុន្តែយុវជនហ្នឹងគាត់ដើរផ្លូវខុស ដើរផ្លូវខុសរបស់យុវជនវាមានអីខ្លះ? គឺសេពគ្រឿងស្រវឹង សេពគ្រឿងញៀន ដើរដេកផ្ទះសំណាក់ គេចសាលារៀន វាយតប់ ក្រុមបងធំបងតូច។ អាហ្នឹងយើងត្រូវឆ្លុះបញ្ចាំងហើយ នៅក្នុងវគ្គមួយ ប៉ុន្តែគុណធម៌របស់វាមាននៅចុងបញ្ចប់តើវាស្អីគេ? ដល់ពេលគាត់មើលសេចក្ដីរឿងអត់អស់ ហើយគ្រាន់តែឃើញឈុតស្រវឹងមកភ្លាម គាត់ថាអាហ្នឹងក្រសួងហាមហើយ អត់ឲ្យបញ្ចាំងទេ។ ចុះអាខ្លឹមសារដែលគេបកស្រាយទៅខាងក្រោយហ្នឹងយ៉ាងម៉េច?»។
លោក ឆាយ បូរ៉ា បន្ថែមថា ក្រសួងព័ត៌មានគួរមានវិធានការឲ្យបានស្មើភាពក្នុងការទប់ស្កាត់ការផ្សាយពាណិជ្ជកម្មគ្រឿងស្រវឹង ដែលតែងត្រូវបានផ្សព្វផ្សាយឲ្យមានការប្រើប្រាស់គ្រឿងស្រវឹងនៅគ្រប់ប្រព័ន្ធផ្សព្វផ្សាយក្នុងពេលបច្ចុប្បន្ន។ លោកថា ក្រសួងគួរមានការជួបពិភាក្សាជាមួយភាគីពាក់ព័ន្ធដើម្បីស្វែងយល់ពីបញ្ហា និងផលប៉ះពាល់ជាមុន។
លោកបញ្ជាក់ថា៖
«មុននឹងចេញអ្វីមួយអញ្ចឹងគួរតែហៅវិស័យឯកជនទៅអង្គុយជជែកពិភាក្សា តើលិខិតហាមប្រាមហ្នឹងមួយវាប៉ះពាល់អ្វីខ្លះដល់អ្នកផលិត? តើខ្លឹមសាររបស់ក្រសួងដែលចេញមកហ្នឹង សេចក្ដីហាមប្រាមហ្នឹងវាមានព្រំដែនកំណត់ប៉ុណ្ណា? ខ្ញុំបារម្ភខ្លាចដល់ពេលយើងផលិតទៅ ស្រាប់ហើយគេយកតែសេចក្ដីប្រកាសមួយហ្នឹងមក មកវិនិច្ឆ័យការងារយើងហើយស្រាប់តែបិទការផ្សាយរបស់យើង ឬស្នាដៃរបស់យើង វានាំឲ្យផលិតករក្នុងវិស័យឯកជនហ្នឹង គាត់ខាតបង់»។
លោក សន ជ័យ នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លើកឡើងថា ស្ថាប័នពាក់ព័ន្ធទាំងអស់ សុទ្ធតែមានតួនាទីក្នុងការកាត់បន្ថយការប្រើប្រាស់គ្រឿងស្រវឹង។ ទោះយ៉ាងណា លោកថា ក្រសួងព័ត៌មាន គួរតែហាមឃាត់សកម្មភាពនៃការផ្សព្វផ្សាយពាណិជ្ជកម្មគ្រឿងស្រវឹងគ្រប់ប្រភេទ ឲ្យបានតឹងរ៉ឹងជាមុន។
លោកបញ្ជាក់ថា៖
«កន្លងមកយើងឃើញហើយថាវិធានការរបស់ក្រសួងព័ត៌មានហាក់បីដូចជាពុំសូវមានប្រសិទ្ធភាព ហើយរហូតមកដល់ពេលនេះការផ្សព្វផ្សាយគ្រឿងស្រវឹង ក្នុងហ្នឹងមានស្រាបៀ មានស្រាអីហ្នឹង ប្រហែលជាការផ្សព្វផ្សាយមួយបែបទាក់ទាញ ហើយមានការចាក់ផ្សាយតាមកញ្ចក់ទូរទស្សន៍ ក្នុងហ្នឹងមានទូរទស្សន៍ខ្សែកាបដែរ ដែលជារបៀបនៃការទាក់ទាញខ្លាំង។ អញ្ចឹងសម្រាប់ខ្ញុំ ខ្ញុំយល់ថា ការចាប់ផ្ដើមមុនគេគឺការរឹតត្បិតទៅលើការផ្សព្វផ្សាយពាណិជ្ជកម្មដែលមានទម្រង់ទាក់ទាញខ្លាំង»។
លោក សន ជ័យ បន្ថែមថា ការហាមប្រាម ឬការព្រមានរបស់ក្រសួងព័ត៌មាននាពេលកន្លងមក តែងទទួលបានប្រសិទ្ធភាពតិចតួចប៉ុណ្ណោះ ដោយលោកថា ក្រសួងព័ត៌មានគួរតែសហការជាមួយក្រសួងមហាផ្ទៃ ដើម្បីអនុវត្តផ្លូវច្បាប់ឲ្យបានតឹងរ៉ឹង។
កន្លងមក ក្រសួងព័ត៌មាន បានហាមមិនឲ្យមានការផ្សព្វផ្សាយគ្រឿងស្រវឹងតាមកញ្ចក់ទូរទស្សន៍ចាប់ពីម៉ោង៦ល្ងាច ដល់ម៉ោង៨យប់។ ក្រសួងក៏បានហាមគ្រប់សា្ថនីយ៍វិទ្យុ និងទូរទស្សន៍ទាំងអស់ មិនឲ្យផ្សាយពាណិជ្ជកម្មទាក់ទងនឹងគ្រឿងស្រវឹង ដោយភ្ជាប់នឹងការប្រឡងប្រជែង ឬប្រកាសផ្ដល់រង្វាន់ជូនដល់អតិថិជនជាដើម៕
