Umongameli welizwe uMnu Emmerson Mnangagwa wazise ukuthi uhulumende uzaphathisa ekubekweni kwabantu abangamatshumi amabili lana abafele engozini yebhasi eBeitbridge ngoLwesithathu ekuseni.
Kumbiko wakhe othunyelwe intathelizindaba, uMnangagwa uthe uzwe ubuhlungu kakhulu ngokufa kwabantu laba. Uthe kumele kuthathwe amanyathelo okumisa ukufa kwabantu engozini zemigwaqweni
Abantu abangamatshumi amabili lane, 24, laba babhubhele engozini yokungqikilana kwebhasi yako-Urban Connect legonyethi emgwaqweni osuka eBeitbridge usiya eMasvingo.Lingozi yenzakalele duzane lentuba yeLutumba Tollgate.
Kumbiko wakhe, isikhulumeli samapholisa uCommissioner Paul Nyathi uthe umtshayeli webhasi ubezama ukwedlula eyinye imota wasesiyatshayana legonyethi.
Inhlanganiso ezimela izihambi zona zithi okubangela ingozi ezinengi yimigwaqo emibi kanye lenkohlakalo ekuthathweni kwamalicence okutshayela.
Uluhlu lweWorld of Statistics luveza ukuba eleZimbabwe liphakathi kwamazwe alenani eliphezulu labantu abafela engozini zemigwaqweni.
Kuluhlu lolu eleZimbabwe ngelesibili, ledlulwa kuphela ngele Dominican Republic.
Umnu. Paul Makiwa ongunobhala jikelele wenhlanganiso emela izihambi eyeZimbabwe Passengers’ Association uthi kumele kuguqulwe imithetho ukuze kwenqatshelwe ingozi ezifana lale.
Forum