Kuyaxokozela kubandla leZanu PF okulamalunga athakazelela umsekeli kaMongameli Constantino Chiwenga abahlabele ingoma namuhla zokumkhukhumeza ngesikhathi kungcwatshwa iqhawe lelizwe uJustin Mupamhanga eNational Heroes Acre eHarare.
Ngakwelinye icele bebethule zwi abasekeli baka Mongameli Emmerson Mnangagwa abesifazana akade begqoke izembatho zokumkhankasela ukuba ahlale esikhundleni kungagqitshwa umbuso wakhe ngomnyaka ka2028.
Bebecula, begida njalo beqolotsha abalandeli baka Chiwenga emathuneni la besithi akumelanga ahlukuluzwe umsekeli kamongameli. Amanye amalunga ebandla leZanu PF abegqoke izembatho eziveza ukuba bafuna uMnangagwa eqhubeke esembusweni bebehlezi emathuneni la bethule zwi.
Abasekela uChiwenga bebebahoza. UChiwenga okhulume emathuneni la uthe kulabanye eZimbabwe abazibiza ngokuthi zimbinga abenza santando.
"Sonke safunga ukuba sisebenze ndawonye ukuze wonke umuntu abeyingxenye yalokhu okutholakala eZimbabwe. Okokudlithidlithiza lokhu okwenzakalayo esivumelani lakho. Esikhuluma ngakho okwevision 2030 ngokomuntu wonke hatshi laba okuthiwa zimbinga. Sakwala lokhu ngesikhathi sempi yenkululeko ngoba sasisithi ngokwezigananda, labo abalezisu ezinkulu abadla konke njalo abenza santando bengalandeli imithetho yelizwe.”
Kusenzakala lokhu eNational Heroes Acre, kulabalwa impi yenkululeko abaqoqe umhlangano lentathelizindaba namuhla eHarare bethula umbiko othi uMnangagwa useyehlulekile ukubusa ngakho-ke sokumele esuke esikhundleni. Omunye wabakhulume labezindaba ngumkhokheli wenhlanganiso yeZimbabwe National Liberation War Veterans Association, uMnu. Ethan Matibela, yena othi okwenziwa ngabasekeli baka Mnangagwa kuphambana isisekelo sombuso welizwe.
‘’UMnangagwa uphazamisa isisekelo sombuso. Thina esikubonayo yikuba usefuna ukwenza intando yakhe lobanje kusobala ukuba inengi labantu elizweni alisamfuni. Sizazama okusemandleni ethu ukuba ame yukubusa kungafikau2028."
Lokhu yikho kanye okukhulunywe izolo nguMnu. Blessing Geza owalwa impi yenkululeko ekuviyo leZANLA njalo okudale leZanu PF Central Committee.
‘’Kumele uMnangagwa asuke embusweni. Useyehlulekilie ukubusa. Elizweni kulendubo ezinengi ngeke aqhubeke ebusa kuze kuyefika u2030 thina sizamliswa’’
Sehlulekile ukuxoxa ngodaba lolu lesikhulumeli sebandla leZanu PF uMnu. Farai Marapira obengaphenduli umakhalekhukhwini. Ilunga lebandla elibusayo uMnu. Tendai Ncube yena uthi kavumelani lokwethulwe nguMatibela, uGeza labanye abalwa impi yenkululeko.
‘’Abakukhulumayo lokhu ngokwamakhanda abo ama warvet, thina njengebandla siyamthanda. Asiboni ukuba kumele amiswe uMOngameli kumele ak=qhubeke ebusa kungafika u2030’’
Ingcwethi kwezombusazwe esebenza ekolotshini yeUniversity of Zimbabwe, uMnu. John Ncube, uthi sekusobala ukuba kuyaliwa kubandla leZANU PF. Uthi uChiwenga kukhanya engani usefuna isikhundla sika Mnangagwa.
“Sekusegcekeni ukuba kuyaliwa lapha. Kumele baluingise indaba zabo zokuba ngubani ozabusa nxa uMnangagwa engaphuma. Bengehluleka ukzwenza lokhu kuzakuba ngokunye ngoba sekuliwa ku ZANU ngesikubone namhlanje.”
UMnangagwa yena uthi kafisi ukuqhubeka esembusweni kungagqitshwa umbuso wakhe ngo2028. Kulamalunga edale lephalamende akhokhelwa nguMnu. Energy Mutodi, omele iBikita West edale lephalamende, abafuna ukuguqula isisekelo sombuso welizwe kunyanga ezayo okuzakwethulwa umthetho ozakwenza ukuthi uMnangagwa eqhubeke esembusweni okwesikhathi abazasivumelana edale leli.
Bafuna njalo ukuba amalunga edale lephalamende lawo eqhubeke esezikhundleni okweminyaka ezengezwa okufana lezafakelwa uMnangagwa. Isisekelo sombuso welizwe sikubeka sobala ukuba osesikhundleni sikamongameli okwamanje angeke engine embusweni loba kungaguqulwa imithetho yokubusa eleZimbabwe.
Forum