Uhlangothi lukahulumende weMelika olubona ngezimali olweU.S. Treasury Department ngoLwesine lwethese izijeziso zenotho uMnu. James Kabarebe, umphathintambo wohlangothi lukahulumende weRwanda olubona ngokudlelana lamanye amazwe, okuthiwa utshotshozela impi yomvukela kweleDRC ephakathi kukahulumende kaMongameli Felix Tshisekedi labahlamuki beMarch 23 (M23).
Omunye njalo owetheswe izijeziso lezi nguMnu. Lawrence Kanyuka Kingston, ilunga leCongo River Alliance njalo okunhlanganiso yeM23.
Ababili laba kucatshangelwa ukuba bayingxenye yabahlasela abantu makhaza edolobheni leGoma leleBukavu, asehluthunwe yiM23, ezama ukuhluthuna amanye aseduzane lawo.
UTshisekedi uthi amasotsha akhe lokhu elwisana leM23 eBukavu. UMongameli Paul Kagame wakweleRwanda ucatshangelwe ukuba usekela abahlamuki laba okuthiwa bazondwa nguhulumende kaTshisekedi. UKagame uyakuphika lokhu.
Kukhanya iyehlula imizamo yenhlanganiso ezigoqela eyeSouthern African Development Community, African Union leye-East African Community eyokuzama ukumisa impi le eqhubekela phambili ngamandla.
Ukuhlaziya loludaba, sixoxe loMnu. Effie Dlela Ncube ingcwethi kwezombusazwe ezimeleyo othi kumele inkokheli yamazwe wonke abhekane lempi le akhulume iqiniso ngakwenza kweleDRC ukuze kumiswe ukulwisana kukahulumende keTshisekedi leM23, esibulele amabutho akweleSouth Africa, Malawi, Urugauy lamanye amazwe alondoloza ukuthula kulelolizwe.
EleBurundi selisuse ibutho ebelisekela uhulumende weDRC.
Forum