Umanyano weSouthern African Development Community (SADC) ukhangelelwe ukuba uzaqhuba umhlangano ngoLwesihlanu wokuhlolisisa impi eyesabekayo kweleDemocratic Repunlic of Congo ngesikhathi kukhanya kulokuxabana phakathi kuka Mongameli Cyril Ramaphosa loMongameli Paul Kagame.
Umhlangano lo uqhutshwa kulandela ukuhlasela ngamandla kwabahlamuki beMarch 23 (M23) edolobheni leGoma eDRC. Kucatshangelwa ukuba abahlamuki laba basekelwa nguKagame, ophoselane aqatha loRamaphosa enkundleni yokuxhumana eyeX ngodaba lolu.
UKagame uthi uRamaphosa kakwazi akwenzayo ngoba kukhanya engani usekela uMongameli Felix Tshisekedi kakhulu empini le njalo uqamba amanga ngomhlangano abawuqhube bobabili.
Kodwa uRamaphosa uyakuphika lokhu esithi kulengxenye yebutho lika Kagame elilwisana lebutho leDRC. UTshisekede, owale ukungena umhlangano obuqoqwe nguMongameli William Ruto, kubikwa ukuba uthi umkhokheli wakweleAngola hatshi abantu abanjengo Ramaphosa nguye ongalungisa udaba lolu.
EleSouth Africa selilahlekelwa ngamasotsha alitshumi lantathu – 13 empini ekweleDRC.
UMongameli Emmerson Mnangagwa ukhangelelwe ukuba uzakhokhela umhlangano we-Extraordinary Summit ngoLwesihlanu eHarare ngoba nguye umgcinisihlalo weSADC.
Ukuhlaziya loludaba, sixoxe lomhleli wezindaba uMnu. Dumisani Muleya, oweNewsHawks othi kumele inkokheli yeSADC iluphathe kuhle udaba lolu ukwenzela ukuphuma lesinqumo esizamisa impi le eqhubekela phambili eGoma.
Forum