Kulungiselelwa umhlangano omkhulo owenkokheli yeSouthern African Development Community (SADC) le-East Africa Community owokuhlolisisa impi yomvukela kweleDemocratic Republic of Congo (DRC), okulabantu abedlula amakhulu ayisikhombisa asebefile kulandela ukuhlasela ngamandla kwabahlamuki beMarch 23 (M23) Movement edolobheni leGoma.
UMongameli weKenya uMnu. William Ruto, okhokhela umanyano weEast Africa Community, wethule umbiko enkundleni yeX ngoLwesibili othi asebevume ukuya emhlanganweni lo ngumgcinisihlalo weSADC uMongameli Emmerson Mnangagwa, uMongameli Cyril Ramaphosa, Mongameli Paul Kagame, Mongameli Felix Tshisekedi loMongameli Samia Suluhu Hassan wakweleTanzania, okuzaqhutshelwa umhlangano lo ngoLwesihlanu.
URamaphosa loKagame bake baphoselana aqatha ngempi le njalo uTshisekedi kadlelani kuhle loKagame, amethesa umlandu wokutshotshozela impi le okubulewe amabutho akweleSouth Africa, Malawi, Tanzania leUraguay abelondoloza ukuthula eGoma.
IM23 yethule umbiko ngoLwesibili othi sebeme kancane ukuhlasela ibutho lakweleDRC ukuze kuncedwe abantu abakhahlanyezwe yimpi le abedlula inkulungwane ezingamakhulu amathathu – 300,000.
Ukuhlaziya loludaba sixoxe loMnu. Rejoice Ngwenya ingcwethi kwezombusazwe ezimeleyo othi kumele inkokheli yeSADC leEAC itshelane iqiniso ngokwenzakala eDRC.
Forum