Baqhubekela phambili abalwa impi yenkululeko besithi uMongameli Emmerson Mnangagwa kumele esuke embusweni ngoba wehlulela ukubusa eleZimbabwe ngemfanelo.
Abalwa impi yenkululeko abakunhlanganiso yeZimbabwe National Liberation War Veterans’ Association batshele abezindaba izolo eHarare ukuba bayazisola ngokufaka uMnangagwa esikhundleni abakwenza besusa embusweni owayengumongameli uRobert Mugabe ngo2017.
Omunye wabazisolayo nguMnu. Blessed Geza otshele iphephandaba leNewsDay ukuthi kusobala ukuba uMnangagwa usegonjolozelwe yizigebengu njalo umbuso wakhe usezandleni zemuli yakhe. Ibutho lathi lisusa uMugabe embusweni lakhuluma okufanayo.
Kodwa kulabanye abakunhlanganiso le ekhokhelwa nguMnu. Cephas Ncube abathi uGeza labanye bakhe bakhuluma ize ngoba uMnangagwa wakhethwa nguzulu.
Amalunga ebandla leZanu PF kwezinye izabelo athi asekela labo abathi uMnangagwa kumele eqhubeke esembusweni kuze kuyefika umnyaka ka2030. Banengi njalo abaphikisa lokhu.
Ukuhlaziya loludaba, sixoxe loMnu. Partson Sibanda, ilunga lebandla leZanu PF, othi abantu bonke balelungelo lokukhuluma abakufunayo ngoMnangagwa.
Sixoxe njalo loMnu. Nhlanhla Moses Ncube unobhala jikelele wenhlanganiso yeFreedom Alliance othi abalwa impi yenkululeko kukhanya engani benza abakuthakazelelayo hatshi okumele bekwenzele uzulu.
Forum