ប្រទេសរុស្ស៊ីបានវាយប្រហារ «ទ្រង់ទ្រាយធំ» ដោយប្រើដ្រូននិងមីស៊ីលលើរោងចក្រថាមពលរបស់អ៊ុយក្រែនកាលពីថ្ងៃសុក្រ ស្របពេលប្រធានាធិបតីអ៊ុយក្រែនលោក Volodymyr Zelenskyy អំពាវនាវសារជាថ្មីឲ្យបញ្ឈប់ការវាយប្រហារតាមអាកាសទៅវិញទៅមកលើហេដ្ឋារចនាសម្ព័ន្ធសំខាន់ៗ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AFP។
ការអំពាវនាវរបស់លោក Zelenskyy ឱ្យបញ្ឈប់ការវាយប្រហារតាមអាកាសលើរោងចក្រថាមពលនេះគឺផ្ដើមចេញពីវោហារសាស្ត្រកើនឡើងរបស់អ៊ុយក្រែន សហរដ្ឋអាមេរិក និងរុស្ស៊ីអំពីការបញ្ចប់សង្គ្រាមនេះ ដែលឥឡូវនេះឈានចូលដល់ឆ្នាំទី ៤ ហើយ។
លោក Zelenskyy បាននិយាយថា ជំហានដំបូងដើម្បីបង្កើតសន្តិភាពពិតប្រាកដគឺការបញ្ឈប់ការវាយប្រហារតាមអាកាសនិងតាមផ្លូវទឹកទាំងពីរុស្ស៊ីនិងពីអ៊ុយក្រែន។
លោកបានសរសេរនៅលើបណ្ដាញសង្គមអនឡាញថា៖ «អ៊ុយក្រែនត្រៀមរួចរាល់ដើម្បីសន្តិភាព។ អ៊ុយក្រែនចង់បានសន្តិភាពតាំងពីវិនាទីដំបូងនៃសង្គ្រាមនេះម្ល៉េះ។ កិច្ចការដែលត្រូវធ្វើគឺបង្ខំរុស្ស៊ីឱ្យបញ្ឈប់សង្គ្រាមនេះ»។
កងទ័ពជើងអាកាសអ៊ុយក្រែនបានបញ្ជាក់ថារុស្ស៊ីបានបាញ់មីស៊ីលយ៉ាងតិច ៥៨ គ្រាប់និងដ្រូនជិត ២០០ គ្រឿង ដោយធ្វើឱ្យខូចខាតរោងចក្រថាមពលនានានៅទូទាំងប្រទេសអ៊ុយក្រែនតាំងពីតំបន់ Kharkiv នៅភាគខាងកើតរហូតដល់តំបន់ Ternopil នៅភាគខាងលិច៕
វេទិកាបញ្ចេញមតិ