ប្រធានាធិបតីសហរដ្ឋអាមេរិកលោក Donald Trump បាននិយាយកាលពីថ្ងៃសុក្រថាលោកកំពុង «ពិចារណាខ្លាំងក្លា» លើការដាក់ទណ្ឌកម្មនិងពន្ធគយលើរុស្ស៊ីរហូតទាល់តែដល់ពេលដែលបទឈប់បាញ់និងកិច្ចព្រមព្រៀងសន្តិភាពត្រូវបានសម្រេចឡើងជាមួយនឹងអ៊ុយក្រែន។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន Reuters។
លោក Trump ក៏បានផ្អាកជំនួយយោធានិងការចែករំលែកព័ត៌មានសម្ងាត់ដល់អ៊ុយក្រែនផងដែរដើម្បីដាក់សម្ពាធលើអ៊ុយក្រែនឲ្យទទួលយកកិច្ចព្រមព្រៀងបទឈប់បាញ់ បន្ទាប់ពីមានការជជែកគ្នាតឹងសរសៃកជាមួយនឹងប្រធានាធិបតីអ៊ុយក្រែនលោក Volodymyr Zelenskyy កាលពីមួយសប្ដាហ៍មុនមក។
លោក Trump បាននិយាយថា៖ «ផ្អែកលើការពិតដែលថារុស្ស៊ីវាយប្រហារពេញទំហឹងលើអ៊ុយក្រែននៅសមរភូមិនៅពេលឥឡូវនេះ ខ្ញុំកំពុងពិចារណាខ្លាំងក្លាលើការដាក់ទណ្ឌកម្មទ្រង់ទ្រាយធំលើវិស័យធនាគារនិងពន្ធគយលើរុស្ស៊ីរហូតទាល់តែបទឈប់បាញ់និងកិច្ចព្រមព្រៀងសន្តិភាពចុងក្រោយសម្រេចបាន។ សម្រាប់រុស្ស៊ីនិងអ៊ុយក្រែន ត្រូវតែចូលតុចរចាឥឡូវនេះមុនពេលវាយឺតពេលពេក។ អរគុណ!!!»។
លោក Trump បានប្រឈមនឹងការរិះគន់សម្រាប់ការបង្កើនការដាក់សម្ពាធលើអ៊ុយក្រែន ដែលក្នុងនោះរួមមានទាំងការលើកឡើងរបស់លោកកាលពីខែមុនដែលថាអ៊ុយក្រែន មិនមែនរុស្ស៊ីទេ ដែលទទួលខុសត្រូវចំពោះការចាប់ផ្ដើមសង្គ្រាម។
ការគំរាមរបស់លោក Trump ក្នុងការដាក់ទណ្ឌកម្មនិងពន្ធគយលើរុស្ស៊ីនេះបានធ្វើឡើងក្នុងពេលប៉ុន្មានថ្ងៃក្រោយមកបន្ទាប់ពីទីភ្នាក់ងារសារព័ត៌មាន Reuters បានរាយការណ៍ថាសេតវិមានបានរៀបចំផែនការក្នុងការដែលអាចមានលទ្ធភាពលើកលែងទណ្ឌកម្មចំពោះរុស្ស៊ីដើម្បីជាផ្នែកមួយនៃការជំរុញរបស់រដ្ឋបាលលោក Trump ក្នុងការបញ្ចប់សង្គ្រាមនិងលើកកម្ពស់ទំនាក់ទំនងការទូតនិងសេដ្ឋកិច្ចជាមួយនឹងរុស្ស៊ី៕
វេទិកាបញ្ចេញមតិ