កាលពីថ្ងៃចន្ទ ប្រទេសចិនបានបញ្ជាក់ថាសេចក្ដីថ្លែងការណ៍រួមរបស់សហរដ្ឋអាមេរិកនិងជប៉ុនដែលថ្កោលទោសសកម្មភាពរបស់ខ្លួននៅសមុទ្រចិនខាងត្បូងថាជា «សកម្មភាពបង្កហេតុ» គឺជា «ការវាយប្រហារនិងបង្ខូចកេរ្តិ៍ឈ្មោះ» ខ្លួន។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AFP។
ប្រធានាធិបតីអាមេរិកលោក Donald Trump និងនាយករដ្ឋមន្ត្រីជប៉ុនលោក Shigeru Ishiba បាននិយាយកាលពីថ្ងៃសុក្រសប្ដាហ៍មុននៅក្រោយជំនួបរបស់ពួកគេក្នុងរដ្ឋធានីវ៉ាស៊ីនតោនថា ពួកគេប្រឆាំងនឹង «ការអះអាងទាមទារដែនសមុទ្រខុសច្បាប់ យោធានីយកម្មលើបណ្ដាកោះនានា និងសកម្មភាពគំរាមកំហែងនិងបង្កហេតុនៅសមុទ្រចិនខាងត្បូង»។
អ្នកនាំពាក្យក្រសួងការបរទេសចិនលោក Guo Jiakun បានតបតទៅវិញដោយនិយាយថា៖ «ខ្លឹមសារពាក់ព័ន្ធនឹងចិននៅក្នុងសេចក្ដីថ្លែងការណ៍រួមរវាងសហរដ្ឋអាមេរិកនិងជប៉ុនបានជ្រៀតជ្រែកយ៉ាងជាក់ស្ដែងនៅក្នុងកិច្ចការផ្ទៃក្នុងរបស់ចិន វាយប្រហារនិងបង្ខូចកេរ្តិ៍ឈ្មោះរបស់ចិន និងបំផ្លើសអំពីភាពតានតឹងនៅក្នុងតំបន់»។
លោក Jiakun បានបញ្ជាក់បន្ថែមនៅក្នុងសន្និសីទកាសែតជាប្រចាំថា ចិនបាន «ដាក់ការតវ៉ាជាផ្លូវការ» ជាមួយនឹងប្រទេសទាំងពីរ។
នៅក្នុងរយៈពេលប៉ុន្មានខែថ្មីៗនេះ ចិនបានជំរុញបន្ថែមនូវការទាមទាររបស់ខ្លួននូវដែនសមុទ្រនៅសមុទ្រចិនខាងត្បូង ដែលការទាមទារនេះគឺត្រួតគ្នាជាមួយនឹងការទាមទាររបស់ម៉ាឡេស៊ី វៀតណាម ឥណ្ឌូណេស៊ី ព្រុយណេ ហ្វីលីពីន និងតៃវ៉ាន់៕
វេទិកាបញ្ចេញមតិ