ការសម្រេចរបស់សហរដ្ឋអាមេរិកដើម្បីផ្អាកការផ្តល់ថវិការជំនួយបរទេសរបស់ខ្លួនកំពុងបង្ខំឱ្យទីភ្នាក់ងារនានារបស់អង្គការសហ្រជាជាតិបញ្ឈប់ការងាររបស់មនុស្សរាប់ពាន់នាក់។ នេះបើតាមពួកមន្ត្រីអង្គការសហប្រជាជាតិហើយត្រូវបានរាយការណ៍ដោយទីភ្នាក់ងារសារព័ត៌មាន AFP។
ការព្រមាននៃការបន្តកាត់បន្ថយបុគ្គលិកកើតមាន នៅពេលដែលអង្គការទេសន្តរប្រវេសន៍ (IOM)បានបញ្ជូនការជូនដំណឹងអំពីការបណ្តេញបុគ្គលិកទៅឱ្យបុគ្គលិក៣ពាន់នាក់នៃបុគ្គលិកទាំងអស់២ម៉ឺន២ពាន់នាក់នៅទូទាំងពិភពលោក។ នេះបើតាមព្រឹត្តិប័ត្រផ្ទៃក្នុងមួយដែលទីភ្នាក់ងារសារព័ត៌មាន AFP បានឃើញ។
មានសេចក្តីរាយការណ៍ថាជាងពាក់កណ្តាលនៃបុគ្គលិក៥ពាន់នាក់កំពុងធ្វើការនៅកម្មវិធីការតាំងទីលំនៅថ្មីរបស់ជនភៀសខ្លួននៅសហរដ្ឋអាមេរិក។
ឧត្រមស្នងការទទួលបន្ទុកជនភៀសខ្លួនរបស់អង្គការសហប្រជាជាតិឬ UNHCR បានប្រាប់ទីភ្នាក់ងារសារព័ត៌មាន AFP នៅសប្តាហ៍នេះថាខ្លួនមានផែនការកាត់បន្ថយ«ការងារបុគ្គលិកចំនួន៦រយកន្លែង»នៃបុគ្គលិកបម្រើការងារទូទាំងសាកលលោកប្រហែល២ម៉ឺនកន្លែងដែលការងារភាគច្រើននៅមូលដ្ឋាន។
អ្នកនាំពាក្យទីភ្នាក់ងារ UNHCR បាននិយាយថាខ្លួនបានផ្តល់អាទិភាពលើការងារជួយសង្គ្រោះជីវិតរបស់យើងហើយនិងកាត់បន្ថយការចំណាយ»នៅពេលដែលខ្លួនស្វែងយល់ផលប៉ះពាល់ទាំងស្រុងនៃការបញ្ឈប់ជំនួយរបស់សហរដ្ឋអាមេរិកនេះ។
ទីភ្នាក់ងារនេះបានបញ្ឈប់សកម្មភាពនានាដែលមានផលប៉ះពាល់ផ្ទាល់ខ្លាំងឡើងដោយសារការផ្អាកជំនួយថវិការបស់សហរដ្ឋអាមេរិក។ក្នុងនោះ រួមមានការតាំងទីលំនៅថ្មីរបស់ជនភៀសខ្លួននៅសហរដ្ឋអាមេរិក ដោយការបាត់បង់ការងារ ហើយបានធ្វើឲ្យប៉ះពាល់មនុស្សដែលកំពុងធ្វើការលើកម្មវិធីទាំងនោះ។
មុនពេលជំនួយបានផ្អាក សហរដ្ឋអាមេរិកជាម្ចាស់ជំនួយធំបំផុតដល់ទីភ្នាក់ងារ UNHCR និងអង្គការ IOM។
ការកាត់ជំនួយនេះកើតមានឡើងទើបតែប៉ុន្មានសប្តាហ៍បន្ទាប់ពីប្រធានាធិបតីសហរដ្ឋអាមេរិកលោក Donald Trump នៅថ្ងៃទី១នៃការត្រឡប់ចូលកាន់តំណែងរបស់លោកវិញបានចេញបទបញ្ជាប្រធានាធិបតីបញ្ឈប់ការផ្តល់ថវិកាជំនួយបរទេសរបស់សហរដ្ឋអាមេរិក។
ក្នុងឆ្នាំសារពើពន្ធ២០២៤ ជនភៀសខ្លួនជាង១សែននាក់បានតាំងទីលំនៅនៅក្នុងសហរដ្ឋអាមេរិក ជាចំនួនច្រើនបំផុតក្នុងរយៈពេល៣ទសវត្សរ៍៕
វេទិកាបញ្ចេញមតិ