ប្រធានអង្គការសុខភាពពិភពលោក បាននិយាយកាលពីថ្ងៃព្រហស្បតិ៍ម្សិលមិញថា «ឱសថសង្គ្រោះជីវិត» ជាតម្រូវការចាំបាច់នៅក្នុងប្រទេសអ៊ុយក្រែន។
អគ្គនាយកអង្គការសុខភាពពិភពពិភពលោក លោក Tedros Adhanom Ghebreyesus ថ្លែងថា៖ «ការអូសបន្លាយជម្លោះ មិនបានផ្តល់ផលប្រយោជន៍ដល់នរណាម្នាក់ឡើយហើយនឹងអូសបន្លាយការឈឺចាប់ដល់អ្នកដែលងាយទទួលរងគ្រោះបំផុត»។ លោកបានថ្លែងដូច្នេះប្រាប់សម័យប្រជុំបន្ទាន់របស់ក្រុមប្រឹក្សាសន្តិសុខអង្គការសហប្រជាតិស្តីពីស្ថានភាពមនុស្សធម៌ដែលកាន់តែអាក្រក់ឡើងៗនៅក្នុងប្រទេសអ៊ុយក្រែនដែលកំពុងស្ថិតក្រោមការវាយប្រហារពីលើអាកាសនិងការបាញ់ផ្លោងរបស់កងទ័ពរុស្ស៊ី អស់រយៈពេល៣ សប្តាហ៍កន្លងទៅ។
លោកTedros បានប្រាប់សម័យប្រជុំនោះថា អង្គការសុខភាពពិភពលោក បានផ្ទៀងផ្ទាត់ពីការវាយប្រហារចំនួន៤៣លើកទៅលើកន្លែងថែទាំសុខភាពដែលបានសម្លាប់មនុស្សរាប់សិបនាក់ហើយនិងរបួសប្រមាណ៣៤នាក់។
ប្រធានអង្គការសុខភាពពិភពលោករូបនេះ ក៏បាននិយាយផងដែរថា អង្គការ WHO កំពុងធ្វើការជាមួយក្រសួងសុខាភិបាលអ៊ុយក្រែនហើយរហូតមកដល់ពេលនេះ ខ្លួនបានបញ្ជូនបរិក្ខារពេទ្យប្រមាណ១០០តោនទៅដល់ប្រទេសនេះហើយ។
លោកបន្តទៀតថា៖ «យើងបានបង្កើតបណ្តាញផ្គត់ផ្គង់ពីឃ្លាំងផ្ទុកសម្ភារៈនៅក្នុងទីក្រុង Lviv ទៅកាន់ទីក្រុងជាច្រើនផ្សេងទៀតនៅក្នុងប្រទេសអ៊ុយក្រែន ប៉ុន្តែនៅតែប្រឈមនឹងការលំបាកក្នុងការចូលទៅដល់ទីតាំងដែលត្រូវផ្តល់នោះ។ ទីក្រុង Lviv ស្ថិតនៅភាគខាងលិចអ៊ុយក្រែនដែលពេលនេះកំពុងមានសុវត្ថិភាពគួរសម។
ចាប់តាំពីកងទ័ពរុស៊្សីចូលឈ្លានពានប្រទេសអ៊ុយក្រែនកាលពីថ្ងៃទី២៤ កុម្ភៈមក អង្គការសហប្រជាជាតិ បានផ្ទៀងផ្ទាត់ការសម្លាប់ជនស៊ីវិលប្រមាណ៧២៦នាក់ ដែលក្នុងនោះ៥២នាក់ជាកូនក្មេង។ ជនស៊ីវិលប្រមាណជាង១.០០០នាក់ផ្សេងទៀត បានរងរបួស។ អង្គការសហប្រជាជាតិនិយាយថាចំនួនពិតប្រាកដទំនងជាអាចខ្ពស់ខ្លាំងលើសពីនេះ។
ឯកអគ្គរដ្ឋទូតអាមេរិកប្រចាំនៅអង្គការសហប្រជាជាតិលោកស្រី Linda Thomas-Greenfield និយាយថា៖ «រុស្ស៊ីត្រូវទទួលខុសត្រូវលើអំពើឃោរឃៅរបស់ខ្លួន។ មានវិធីតែមួយប៉ុណ្ណោះដែលអាចបញ្ចប់នូវសកម្មភាពដ៏ឆ្កួតលីលានេះបាន គឺប្រធានាធិបតីរុស៊្សីលោក Vladimir Putin ត្រូវបញ្ឈប់ការសម្លាប់ហើយត្រូវដកខ្លួននិងកងទ័ពរបស់ខ្លួនទាំងអស់ចេញពីប្រទេសអ៊ុយក្រែន»៕
អង្គការសហប្រជាជាតិថា ស្ថានភាពមនុស្សធម៌នៅអ៊ុយក្រែនកំពុងតែអាក្រក់ឡើងៗជារៀងរាល់ថ្ងៃ
អង្គការសហប្រជាជាតិ —
