ទីភ្នាក់ងារព័ត៌មាន AP រាយការណ៍ថា ខ្យល់ព្យុះទីហ្វុង Molave ដែលមន្ត្រីវៀតណាមនិយាយថាមានកម្លាំងខ្លាំងបំផុត ក្នុងរយៈពេល ២០ ឆ្នាំនេះ បានរសាត់ចេញពីប្រទេសវៀតណាមហើយ កាលពីថ្ងៃព្រហស្បតិ៍ បន្ទាប់ពីធ្វើឲ្យបាក់ដីលិចទូកជាច្រើន និងកាត់ផ្តាច់ចរន្តអគ្គិសនី ដែលធ្វើឲ្យប៉ះពាល់ដល់ពលរដ្ឋវៀតណាមយ៉ាងហោចណាស់ ១,៧ លាននាក់នោះ។
មនុស្សយ៉ាងហោចណាស់ចំនួន ៣៥ នាក់ បានស្លាប់និង ៥០ ផ្សេងទៀតបានបាត់ខ្លួន ដោយសារខ្យល់ព្យុះមួយនេះ។ នេះបើតាមការផ្សាយឲ្យដឹងរបស់ប្រព័ន្ធផ្សព្វផ្សាយរដ្ឋវៀតណាម។
អ្នកជួយសង្គ្រោះបានផ្តោតសកម្មភាពជាបន្ទាន់ទៅលើភូមិអ្នកស្រុកចំនួន ៣ នៅក្នុងតំបន់ភាគកណ្តាលប្រទេសវៀតណាម ដែលនៅទីនោះព្យុះនេះបានសម្លាប់មនុស្សអស់ ១៩ នាក់ និងត្រូវបានគេសង្ស័យថា បានកប់មនុស្សជាង ៤០ នាក់ផ្សេងទៀត ក្នុងគំនរបាក់បែកនិងដីភក់ដ៏ក្រាស់នោះ។
ឧបនាយករដ្ឋមន្ត្រីវៀតណាមលោក Trinh Dinh Dung បានធ្វើដំណើរទៅកាន់ទីតាំងដែលមានដីបាក់មួយកន្លែង ដែលនៅទីនោះកងទ័ពកំពុងធ្វើការកាយចេញគំនរបាក់បែក ហើយលោកបានបញ្ជាឲ្យបញ្ជូនកងទ័ពមកជួយបន្ថែមទៀតជាបន្ទាន់។
ទីភ្នាក់ងារព័ត៌មាន AFP បានរាយការណ៍ថា ខ្យល់ព្យុះ Molave នេះ បានបោកបក់ចំភូមិនានានៅពេលដែលវាបានធ្វើដំណើរមកដល់ប្រទេសវៀតណាម កាលពីថ្ងៃពុធ។ ខ្យល់ព្យុះនេះបានបំប៉ើងដំបូលផ្ទះ និងធ្វើឲ្យមានការធ្លាក់ភ្លៀងខ្លាំងនៅតំបន់ដែលបានរងការប៉ះពាល់ខ្លាំងរួចទៅហើយដោយសារទឹកជំនន់ក្នុងពេលប៉ុន្មានសប្តាហ៍កន្លងមកនេះ។
អ្នកជួយសង្គ្រោះរាប់រយនាក់បានខិតខំព្យាយាមស្វែងរកអ្នកនៅរស់រានមានជីវិត បន្ទាប់ពីមានជំនន់បាក់ដីជាច្រើនកន្លែងមក៕
