ប្រធានាធិបតីសហរដ្ឋអាមេរិកលោក Donald Trump ថាជនជាតិប៉ាឡេស្ទីននឹងគ្មានសិទ្ធិវិលត្រឡប់ទៅតំបន់ហ្កាហ្សាវិញទេក្រោមផែនការរបស់លោកក្នុងការឲ្យអាមេរិកជាអ្នកគ្រប់គ្រងតំបន់នោះ។ លោក Trump បានលើកឡើងបែបនេះក្នុងបទសម្ភាសន៍មួយដែលបានចេញផ្សាយកាលពីថ្ងៃចន្ទ ដោយលោកបានហៅផែនការនោះថាជា «គម្រោងអភិវឌ្ឍន៍អចលនទ្រព្យសម្រាប់អនាគត»។
លោក Trump បានប្រាប់ទូរទស្សន៍ Fox News ថា៖ «ខ្ញុំនឹងធ្វើម្ចាស់គម្រោងនេះ» និងថាអាចមានទីតាំងផ្សេងៗរហូតដល់ទៅ ៦ កន្លែងសម្រាប់ឲ្យជនជាតិប៉ាឡេស្ទីនរស់នៅក្រៅតំបន់ហ្កាហ្សាតាមផែនការរបស់លោក។ កន្លងមក បណ្ដាប្រទេសអារ៉ាប់បានប្រឆាំងនឹងផែនការរបស់លោកនេះ។
នៅពេលសួរថាតើជនជាតិប៉ាឡេស្ទីននឹងអាចវិលត្រឡប់ទៅកាន់តំបន់ដែលខ្ទេចខ្ទីដោយសារសង្គ្រាមនោះបានដែរឬទេ លោក Trump បានឆ្លើយថា៖ «ទេ ពួកគេនឹងមិនអាចទេ ព្រោះពួកគេនឹងមានផ្ទះល្អជាងមុនឆ្ងាយណាស់»។
លោក Trump បានបន្ថែមថា៖ «និយាយម្យ៉ាងទៀត ខ្ញុំកំពុងនិយាយអំពីការសាងសង់ទីកន្លែងអចិន្ត្រៃយ៍ឲ្យពួកគេ ព្រោះបើពួកគេវិលត្រឡប់ពេលនេះ វានឹងត្រូវចំណាយពេលរាប់ឆ្នាំទម្រាំពួកគេអាច [មានកន្លែងរស់នៅបាន ដោយសារពេលនេះ] វាជាកន្លែងដែលមិនអាចរស់នៅបាន»។
លោក Trump បានលាតត្រដាងជាលើកដំបូងនូវផែនការដ៏គួរឲ្យភ្ញាក់ផ្អើលអំពីតំបន់ហ្កាហ្សានេះក្នុងអំឡុងពេលធ្វើសន្និសីទកាសែតរួមគ្នាជាមួយនាយករដ្ឋមន្ត្រីអ៊ីស្រាអែលលោក Benjamin Netanyahu នៅក្នុងរដ្ឋធានីវ៉ាស៊ីនតោនកាលពីថ្ងៃអង្គារសប្តាហ៍មុន ដោយនាំឲ្យមានការខឹងសម្បាពីជនជាតិប៉ាឡេស្ទីន។ លោក Trump ក៏បានជំរុញឲ្យមានការយកជនជាតិប៉ាឡេស្ទីនចេញពីតំបន់ហ្កាហ្សាដែលខ្ទេចខ្ទីដោយសារសង្គ្រាមផងដែរ ហើយឲ្យប្រទេសអេហ្ស៊ីបនិងហ្ស៊កដានីទទួលយកពួកគេ។
កាលពីថ្ងៃអាទិត្យ លោក Trump បានបញ្ជាក់ជាថ្មីអំពីការប្ដេជ្ញារបស់លោកថាសហរដ្ឋអាមេរិកនឹងគ្រប់គ្រងតំបន់ហ្កាហ្សា ហើយជនជាតិប៉ាឡេស្ទីននឹងត្រូវផ្លាស់ទីលំនៅ។
លោកបានថ្លែងថា៖ «ខ្ញុំប្តេជ្ញាថានឹងទិញនិងធ្វើជាម្ចាស់តំបន់ហ្កាហ្សា។ ពេលយើងសាងសង់វាឡើងវិញ យើងអាចប្រគល់តំបន់នោះទៅឲ្យប្រទេសដទៃក្នុងតំបន់មជ្ឈិមបូព៌ាឲ្យសាងសង់ផ្នែកខ្លះ។ អ្នកដទៃអាចធ្វើដូច្ចោះបានតាមរយៈអធិបតីភាពរបស់យើង។ តែយើងប្តេជ្ញាថានឹងធ្វើជាម្ចាស់តំបន់នោះ...និងធ្វើឲ្យប្រាកដថាក្រុមហាម៉ាស់មិនអាចត្រឡប់ទៅទីនោះវិញបាន»៕
វេទិកាបញ្ចេញមតិ