សម្ពន្ធមិត្តក៏ដូចជាគូសត្រូវរបស់សហរដ្ឋអាមេរិក កាលពីថ្ងៃពុធបានរិះគន់សំណើរបស់លោកប្រធានាធិបតី Donald Trump ឱ្យសហរដ្ឋអាមេរិកចូលត្រួតត្រាតំបន់ Gaza Strip ដែលនេះនឹងបង្ខំជនជាតិប៉ាឡេស្ទីន២លានឱ្យនាក់ចាកចេញទៅកាន់ប្រទេសផ្សេង ហើយបន្ទាប់មកអភិវឌ្ឍដែនដីជាប់សមុទ្រមីឌីទែរ៉ាណេនេះឱ្យទៅជា«រមណីយដ្ឋានឆ្នេរសមុទ្រនៃតំបន់មជ្ឈិមបូព៌ា»។
លោកប្រធានាធិបតី Trump ធ្វើសំណើនេះឡើងនៅឯសន្និសីទកាសែតនៅសេតវិមានកាលពីរសៀលថ្ងៃអង្គាររួមជាមួយនាយករដ្ឋមន្ត្រីអ៊ីស្រាអែលលោក Benjamin Netanyahu ហើយប្រតិកម្មរបស់ពិភពលោកដល់ការស្នើនេះមានភ្លាមៗហើយភាគ ច្រើនជារួមជំទាស់នឹងគំនិតរបស់លោកប្រធានាធិបតី Trump ដែលធ្លាប់ជាពាណិជ្ជករខាងអចលនទ្រព្យនៅក្រុង New York។
ចក្រភពអង់គ្លេស ចិន អាល្លឺម៉ង់ អៀឡង់ រុស្ស៊ីនិងប្រទេសអេស្ប៉ាញសុទ្ធតែបាននិយាយថា ពួកគេ បន្តគាំទ្រដំណោះស្រាយរដ្ឋ២គឺការបង្កើតរដ្ឋប៉ាឡេស្ទីនឯករាជ្យមួយដែលនឹងរួមបញ្ចូលទាំងតំបន់ហ្កាហ្សានិងតំបន់ West Bank ដែលត្រូវបានកាន់ កាប់ដោយអ៊ីស្រាអែល នៅមានជាប់នឹងអ៊ីស្រាអែល។
សំណើរដ្ឋ២ដែលមានគោលបំណងបញ្ចប់ជម្លោះនិងសង្គ្រាមនៅតំបន់មជ្ឈិមបូព៌ាអស់រាប់ទសវត្សរ៍បានក្លាយជាឫសគល់មួយនៃគោលនយោបាយការបរទេសសហរដ្ឋអាមេរិកនៅក្នុងតំបន់ ទោះបីរដ្ឋាភិបាលរបស់លោក Netanyahu បានជំទាស់ប្រឆាំងក៏
ដោយ។
ប្រទេសអារ៉ាប់ប៊ីសាអូឌីតជាសម្ពន្ធមិត្តអាមេរិកដែលផលិតប្រេងដ៏សំខាន់មួយបានចេញសេចក្តីថ្លែងការណ៍ដោយប្រើពាក្យធ្ងន់ដ៏ឆាប់រហ័សថា ការអំពាវនាវរបស់ខ្លួន
សម្រាប់រដ្ឋប៉ាឡេស្ទីនឯករាជ្យមួយជា៖ «គោលជំហរម៉ឺងម៉ាត់ មិនប្រែប្រួលនិងមិនងាករេ»។
នាយករដ្ឋមន្ត្រីអូស្ត្រាលីលោក Anthony Albanese បាននិយាយនៅក្នុងការគាំទ្រដំណោះស្រាយរដ្ឋ២ថា៖ «គោលជំហររបស់អូស្ត្រាលីគឺនៅដដែលដូចដែលខ្លួនមាននៅព្រឹកមិញនេះ ដូចដែលខ្លួនមានកាលពីឆ្នាំទៅនិងកាលពី១០ឆ្នាំដែរ»៕
វេទិកាបញ្ចេញមតិ