អ៊ីស្រាអែលនិងក្រុមហាម៉ាស់គ្រោងនឹងដោះដូរចំណាប់ខ្មាំងជាមួយអ្នកទោសបន្ថែមទៀតនៅថ្ងៃសៅរ៍នេះ ប៉ុន្តែប្រតិកម្មប្រឆាំងខ្លាំងក្លាចំពោះសំណើរបស់ប្រធានាធិបតីអាមេរិកលោក Donald Trump ដែលចង់ឲ្យសហរដ្ឋអាមេរិកគ្រប់គ្រងតំបន់ហ្កាហ្សាបានធ្វើឲ្យមានភាពស្រពិចស្រពិលចំពោះអនាគតនៃកិច្ចព្រមព្រៀងដ៏ផុយស្រួយនេះ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AFP។
កាលពីថ្ងៃសុក្រ ក្រុមយុទ្ធនាការមួយរបស់អ៊ីស្រាអែលបានជំរុញរដ្ឋាភិបាលអ៊ីស្រាអែលឲ្យប្រកាន់ខ្ជាប់តាមបទឈប់បាញ់តំបន់ហ្កាហ្សាមុនការដោះដូរចំណាប់ខ្មាំងជាមួយអ្នកទោសនៅជុំទី ៥ ចូលមកដល់ ទោះបីជាការលើកឡើងរបស់លោក Trump បានបង្កឲ្យមានការតវ៉ានៅទូទាំងតំបន់មជ្ឈិមបូព៌ានិងតំបន់ផ្សេងទៀតក៏ដោយ។
តាំងពីពេលដែលលោក Trump ប្រកាសដូច្នេះក្នុងអំឡុងទស្សនកិច្ចរបស់នាយករដ្ឋមន្ត្រីអ៊ីស្រាអែលលោក Benjamin Netanyahu នៅរដ្ឋធានីវ៉ាស៊ីនតោនមក អ៊ីស្រាអែលបានបញ្ជាយោធារបស់ខ្លួនឲ្យត្រៀមលក្ខណៈសម្រាប់ការផ្លាស់ទីលំនៅ «ដោយស្ម័គ្រចិត្ត» របស់ពលរដ្ឋតំបន់ហ្កាហ្សា។ ចំណែកឯក្រុមហាម៉ាស់វិញបានប្រឆាំងនឹងផែនការរបស់លោក Trump នេះថា «មិនអាចទទួលយកបានទាំងស្រុង»។
ក្រុមហាម៉ាស់និងអ៊ីស្រាអែលគ្រោងនឹងធ្វើការដោះដូរចំណាប់ខ្មាំងជាមួយអ្នកទោសនៅជុំទី ៥ នៅថ្ងៃសៅរ៍នេះក្រោមបទឈប់បាញ់ថ្ងៃទី ១៩ ខែមករា។
ក្រុមយុទ្ធនាការ Hostage and Missing Families Forum របស់អ៊ីស្រាអែលបានបញ្ជាក់នៅក្នុងសេចក្ដីថ្លែងការណ៍មួយកាលពីថ្ងៃសុក្រថា៖ «ប្រទេសជាតិទាំងមូលទាមទារចង់ឃើញចំណាប់ខ្មាំងត្រឡប់មកផ្ទះវិញ។...ឥឡូវនេះគឺជាពេលដើម្បីធានាថាកិច្ចព្រមព្រៀងនេះត្រូវបានបំពេញរួចរាល់រហូតដល់ចុងក្រោយបំផុត»។
អ៊ីស្រាអែលនិងក្រុមហាម៉ាស់បានធ្វើការដោះដូរចំណាប់ខ្មាំងជាមួយអ្នកទោស ៤ លើកមកហើយនៅក្រោមដំណាក់កាលដំបូងនៃកិច្ចព្រមព្រៀងបទឈប់បាញ់នេះ៕
អ៊ីស្រាអែលនិងក្រុមហាម៉ាស់គ្រោងដោះដូរចំណាប់ខ្មាំងជាមួយអ្នកទោសនៅជុំទី ៥
វេទិកាបញ្ចេញមតិ