នៅក្នុងរយៈពេលមួយសប្តាហ៍ចុងក្រោយនេះ មានការពិភាក្សាច្រើនពីសារណជនពាក់ព័ន្ធនឹងក្រមសីលធម៌វិជ្ជាជីវៈរបស់ប៉ូលិសចរាចរណ៍ ខណៈអ្នកតាមដានបញ្ហាសង្គមបានជំរុញឲ្យមានការពង្រឹងក្រមសីលធម៌បន្ថែមលើប៉ូលិសចរាចរណ៍ខ្លះ ដែលចុះធ្វើការតាមដងផ្លូវសាធារណៈ។
លោក យ៉ង់ គឹមអេង ប្រធានមជ្ឈមណ្ឌលប្រជាជនដើម្បីអភិវឌ្ឍន៍និងសន្តិភាព សម្តែងការងឿងឆ្ងល់ចំពោះប៉ូលិសចរាចរណ៍ដែលជាញឹកញាប់បានបង្ករឿងឈ្លោះជាមួយប្រជាពលរដ្ឋ ព្រោះពួកគេគួរជាអ្នកអនុវត្តច្បាប់ ហើយចេះសម្របសម្រួលជាមួយពលរដ្ឋដោយពាក្យសម្តីបែបជាអ្នកមានវិជ្ជាជវៈ និងជាអ្នកដែលទទួលបានការបណ្តុះបណ្តាលជាមន្ត្រីអនុវត្តច្បាប់។
លោកថ្លែងថា៖ «ប៉ូលិសចរាចរណ៍ភាគច្រើនតាំងខ្លួនជាភាគីនៃជម្លោះជាមួយប្រជាពលរដ្ឋដែលជាអ្នកប្រព្រឹត្តបទល្មើសផ្សេងៗ ឬចរាចរណ៍ ឬនៅក្នុងការពិនិត្យអីផ្សេងៗ។ គាត់ចាត់ទុកថា គាត់ជាភាគីនៃជម្លោះហើយស្រេច។ អ៊ីចឹងហើយធ្វើឲ្យមានបញ្ហាកើតឡើង។ បើគាត់ចាត់ទុកខ្លួនគាត់ត្រឹមតែជាមន្ត្រីអនុវត្តច្បាប់ ហើយគិតថា អ្នកដែលបានប្រព្រឹត្តខុសនោះ គឺខុសទៅនឹងច្បាប់ ជាអ្នកដែលមានទំនាស់ទៅនឹងច្បាប់ អាហ្នឹងគាត់គឺជាអ្នកដែលអនុវត្តច្បាប់។ អាហ្នឹងគឺអត់សូវមានបញ្ហាប្រទូស្ត ដែលគាត់ត្រូវប្រើសម្តីអសុរោះអស់ហ្នឹងទេ គឺគាត់ត្រូវតែប្រើសម្តីសមរម្យ សីលធម៌ មានវិជ្ជាជីវៈ»។
លោក យ៉ង់ គឹមអេង បន្តថា ការប្រើអាកប្បកិរិយាមិនសមរម្យបែបនេះមិនសមជាមន្ត្រីដែលស៊ីប្រាក់ខែពីរាស្ត្រឡើយ។ លោកថ្លែងបន្ថែមថា បើពួកគេនិយាយពាក្យធម្មតា ក៏អាចដាក់ពិន័យចំពោះប្រជាពលរដ្ឋដែលល្មើសច្បាប់ដែរ។
លោកថ្លែងថា៖ «គាត់ចាំបាច់ទៅធ្វើឡូឡា អាកប្បកិរិយាច្រងេងច្រងាងធ្វើអី? អាហ្នឹងគឺជារឿងមួយដែលមិនសក្តិសមជាមន្ត្រីដែលបម្រើពលរដ្ឋ មន្ត្រីដែលទទួលបានប្រាក់ខែពីពលរដ្ឋទេ។ នេះគឺជារឿងមួយសំខាន់ ដែលជាការបង្ហាញអំណាចមួយដែលខុសច្បាប់»។
កាលពីពេលថ្មីៗនេះ មានប៉ះទង្គិចគ្នារវាងប៉ូលិសចរាចរណ៍ជាមួយនឹងលោក សុខ ទូច ប្រធានរាជបណ្ឌិត្យសភាកម្ពុជានៅក្នុងខណ្ឌសែនសុខ រហូតនាំឲ្យប៉ូលិសចំនួន២នាក់ត្រូវបានព្យួរការងារ។
ទីប្រឹក្សាគណបក្សកម្លាំងជាតិលោក រ៉ុង ឈុន ប្រាប់វីអូអេថា លោកទទួលបានព័ត៌មានច្រើនពីប្រជាពលរដ្ឋពាក់ព័ន្ធនឹងកង្វះក្រមសីលធម៌របស់ប៉ូលិសចរាចរណ៍។ លោកជំរុញឲ្យក្រសួងមហាផ្ទៃ និងថ្នាក់ដឹកនាំស្ថាប័ននគរបាលពង្រឹងក្រមសីលធម៌វិជ្ជាជីវៈរបស់ប៉ូលិសចរាចរណ៍ទាំងនោះ។
លោកថ្លែងថា៖ «កន្លែងខ្លះ ប្រជាពលរដ្ឋគាត់មិនបានស៊ីជម្រៅទៅលើបញ្ហាច្បាប់ត្រូវហៅគាត់មកអប់រំ ណែនាំ និងអាចអនុគ្រោះឲ្យគាត់ទៅៗ។ យើងកុំឃើញដូចពាក្យចាស់ថា ប៉ះដៃយកដៃ ប៉ះជើងយកជើង។ យើងក៏ត្រូវមានវិធីសាស្ត្រគ្រប់បែបយ៉ាងប្រើឥរិយាបថធ្វើម៉េចឲ្យបានសមរម្យមកលើប្រជាពលរដ្ឋ»។
អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ លោក ជួន ណារិន បដិសេធមិនផ្តល់ការអត្ថាធិប្បាយដោយឲ្យអ្នកយកព័ត៌មានឲ្យសំឡេងសហរដ្ឋអាមេរិក (វីអូអេ) ទាក់ទងទៅអ្នកនាំពាក្យរបស់លោកវិញ។ វីអូអេមិនទាន់អាចសុំការអត្ថាធិប្បាយពីលោក សំ វិច្ឆិកា អ្នកនាំពាក្យស្នងការរាជធានីភ្នំពេញបាននៅឡើយទេ។
បន្ទាប់ពីករណីរិះគន់លើក្រមសីលធម៌ពីប្រជាពលរដ្ឋលើប៉ូលិសចរាចរណ៍ ស្នងការរងនគរបាលរាជធានីភ្នំពេញ លោក តឹង សុធី បានដឹកនាំកម្លាំងអន្តរាគមន៍ពិសេស ចូលរួមប្រជុំជួរត្រួតពិនិត្យ និងពង្រឹងវិន័យកងកម្លាំង ត្រូវមានអាកប្បកិរិយាទន់ភ្លន់ ម៉ឺងម៉ាត់ក្នុងការអនុវត្តច្បាប់ និងមានក្រមសីលធម៌ប្រកបដោយវិជ្ជាជីវៈ និងផ្សព្វផ្សាយនូវបទវិន័យកងកម្លាំងនគរបាលជាតិ៕
វេទិកាបញ្ចេញមតិ