គូស្រករស្រឡាញ់ភេទដូចគ្នារាប់រយគូបានរៀបអាពាហ៍ពិពាហ៍នៅប្រទេសថៃកាលពីថ្ងៃទី២៣ ខែមករា នៅពេលដែលព្រះរាជាណាចក្រមួយនេះបានក្លាយជាតំបន់ទី៣នៅទ្វីបអាស៊ីដែលផ្ដល់ភាពស្របច្បាប់សម្រាប់គូស្រករដែលមានភេទដូចគ្នា។ ការសម្រេចចិត្តឱ្យមានច្បាប់នេះបង្កើតនូវសក្ដានុពលសេដ្ឋកិច្ចយ៉ាងធំសម្រាប់ប្រទេសនេះ។
ច្បាប់ថ្មីនេះបានចូលជាធរមាននៅថ្ងៃទី២៣ ខែមករាកន្លងទៅ គឺបន្ទាប់ពីកោះតៃវ៉ាន់ និងប្រទេសនេប៉ាល់ដែលសុទ្ធតែនៅក្នុងទ្វីបអាស៊ី។ ច្បាប់នេះក៏ធ្វើឱ្យប្រទេសថៃក្លាយជាប្រទេសទី១នៅតំបន់អាស៊ីអាគ្នេយ៍ដែលទទួលស្គាល់អាពាហ៍ពិពាហ៍មនុស្សភេទដូចគ្នា នៅក្នុងតំបន់មួយដែលមានប្រទេសមានអ្នកកាន់សាសនឥស្លាសមភាគច្រើន ចាត់ទុកការស្រឡាញ់ភេទដូចគ្នាគឺជារឿងល្មើសច្បាប់សាសនា។
បច្ចុប្បន្ននេះ ការប្រែប្រួលផ្នែករដ្ឋបាលនាំមកនូវផលវិបាកខ្លាំងមួយ ហើយពាក្យថា «សហព័ទ្ធ» ត្រូវបានប្រើជំនួសលក្ខន្តិកៈជា «ប្ដី» ឬ «ប្រពន្ធ» ដែលបើកផ្លូវឱ្យគូស្រករស្រឡាញ់ភេទដូចគ្នាអាចទទួលបានផលប្រយោជន៍ជាក់ស្ដែង ដែលកាលពីមុនផលប្រយោជន៍នេះមានសម្រាប់តែអាពាហ៍ពិពាហ៍រវាងអ្នកមានភេទផ្ទុយគ្នាប៉ុណ្ណោះ។
ផលប្រយោជន៍ទាំងនោះរួមមានលទ្ធភាពស្មុំកូន ការទទួលកម្ចីទិញផ្ទះរួមគ្នា ការផ្ទេរទ្រព្យសម្បត្តិក្រោយមរណភាព ការទទួលបានឋានៈពីសាច់ញាតិជិតស្និទ្ធ ការទទួលផលប្រយោជន៍នានាពីរដ្ឋ ក៏ដូចជាសិទ្ធិផ្នែកសុខាភិបាលដ៏សំខាន់ដើម្បីយល់ព្រមលើការសម្រេចចិត្តអ្វីមួយក្នុងគ្រាអាសន្នក្នុងនាមជាដៃគូរបស់ខ្លួន។
នៅទូទាំងប្រទេសថៃ រាប់ចាប់ពីកោះ Krabi នៅភាគខាងត្បូងរហូតដល់ទីក្រុងឈៀងម៉ៃនៅភាគខាងជើង គូស្រករជាច្រើនបានរៀបការជាផ្លូវការតាមរយៈពិធីចុះបញ្ជីដែលមានតាំងនៅពិធីតូចនៅការិយាល័យរដ្ឋបាលក្នុងមូលដ្ឋាន រហូតដល់ការរៀបអាពាហ៍ពិពាហ៍ជាក្រុមធំៗនៅហាងលក់ទំនិញទំនើបៗនៅកណ្ដាលទីក្រុងបាងកក។
ជនជាតិថៃឈ្មោះ Rittigiat Subma បានរៀបការជាមួយដៃគូជនជាតិចិនឈ្មោះ Xichen Lin នៅខណ្ឌ Bang Rak ដែលមានភាពមមាញឹកបំផុតសម្រាប់ពិធីអាពាហ៍ពិពាហ៍នៅទីក្រុងបាងកក។ ទង់ពណ៌ឥន្ទធនូតំណាងឱ្យសហគមន៍មនុស្សស្រឡាញ់ភេទដូចគ្នា និងឆត្រត្រូវបានគេបំពាក់នៅលើការិយាល័យ ខណៈពេលដែលក្រុមតន្ត្រីដែលគ្នា៣នាក់កំពុងលេងភ្លេងអបអរពិធីមង្គលការទាំងនោះ។
លោក Rittigiat បានប្រាប់វីអូអេថា៖ «ខ្ញុំសប្បាយចិត្តខ្លាំងណាស់ ខ្ញុំបានរង់ចាំឱកាសនេះជាយូរមកហើយ។ ឥឡូវនេះដៃគូរបស់ខ្ញុំនិងខ្ញុំអាចខ្ចីប្រាក់រួមគ្នាដើម្បីទិញផ្ទះមួយបាន យើងអាចទទួលបានអត្ថប្រយោជន៍ដូចអ្នកដទៃដែរ ហើយយើងអាចសម្រេចចិត្តដ៏ធំផ្នែកសុខាភិបាលសម្រាប់យើងទាំងពីរនាក់»។
«ខ្ញុំអាចទទួលបានទិដ្ឋាការក្នុងនាមជាដៃគូ បន្ទាប់ពីយើងបានចុះបញ្ជីអាពាហ៍ពិពាហ៍នៅទីនេះ ហើយនឹងអាចប្ដូរទីលំនៅទៅអូស្ត្រាលីដើម្បីទៅជាមួយគាត់ដែលធ្វើការនៅទីនោះ»។
គូស្រករដែលមានអាយុ ២៧ ឆ្នាំ ដូចគ្នានេះធ្វើការនៅក្រុមហ៊ុនបច្ចេកវិទ្យាផ្សេងគ្នា។ ដោយមានកាន់សៀវភៅអាពាហ៍ពិពាហ៍នៅក្នុងដៃប្រកបដោយមោទនភាព ដៃគូរបស់លោកឈ្មោះ Xichen Lin និយាយថា ពួកគេចង់រៀបការតែក្នុងរយៈប៉ុន្មានសប្ដាហ៍បន្ទាប់ពីបានជួបគ្នា។
លោកនិយាយថា៖ «ប្រសិនបើសេចក្ដីព្រាងច្បាប់នេះមិនត្រូវបានអនុម័តទេ ទំនាក់ទំនងរវាងពួកយើងប្រហែលជាមិនអាចកើតឡើងទេ ពីព្រោះមូលដ្ឋានគ្រឹះមួយនៃទំនាក់ទំនងរបស់យើងគឺដើម្បីបង្កើតអនាគតមួយជាមួយគ្នា»។
លោកបន្តថា ដោយសារគ្មានលទ្ធភាពផ្នែកច្បាប់សម្រាប់អ្នកស្រឡាញ់ភេទដូចគ្នានៅប្រទេសចិនដែលការស្រឡាញ់ភេទដូចគ្នាគឺជារឿងខុសច្បាប់ ច្បាប់របស់ថៃបានបើកឱ្យមានលទ្ធភាពបែបនេះសម្រាប់លោក។
លោកបន្តថា៖ «ឥឡូវនេះ យើងអាចរស់នៅបានធម្មតាដូចគូស្រករដទៃទៀតអីចឹង។ យើងអាចប្រាប់អ្នកដទៃថា យើងបានរៀបការហើយ យើងអាចចែករំលែកទ្រព្យសម្បត្តិ និងធ្វើជាតំណាងឱ្យគ្នាទៅវិញទៅមកនៅក្នុងកាលៈទេសៈច្បាប់តម្រូវណាមួយ»។
ទោះបីជាមានភាពរីករាយនិងការអបអរសាទរក៏ដោយ អ្នកតស៊ូមតិដើម្បីសិទ្ធិអ្នកស្រឡាញ់ភេទដូចគ្នា (LGBTQ+) បានព្រមានថា កិច្ចប្រឹងប្រែងដើម្បីទទួលបានភាពស្មើគ្នារបស់អ្នកស្រឡាញ់ភេទដូចគ្នាត្រូវតែបន្តទៅទៀត ទោះបីជាច្បាប់នេះត្រូវបានអនុម័តក៏ដោយ។
លោក Tunyawaj Kamolwongwat ដែលជាមេធាវីសម្រាប់គណបក្សប្រជាជនជឿនលឿន និងជាអ្នកតស៊ូមតិឱ្យមានការកែប្រែច្បាប់ បានថ្លែងថា៖ «ច្បាប់នេះអាចចូលជាធរមាននៅថ្ងៃនេះក៏ពិតមែន ប៉ុន្តែវាមិនមែនមានន័យថា ការរើសអើងលើសហគមន៍អ្នកស្រឡាញ់ភេទដូចគ្នាមានការប្រែប្រួលភ្លាមៗនោះទេ»។
លោកបន្តថា៖ «នៅមានផ្លូវត្រូវធ្វើដំណើរវែងឆ្ងាយទៀត បូករួមជាមួយនឹងការអនុវត្តស្របគ្នានឹងច្បាប់ដទៃទៀត។ ឥឡូវនេះ យើងត្រូវដោះស្រាយទៅលើបញ្ហាជាច្រើនទៀត រួមមានការមានផ្ទៃពោះតាមរយៈជំនួយពីបច្ចេកវិទ្យា និងការទទួលបានសញ្ជាតិបរទេសតាមរយៈការរៀបការជាមួយដៃគូដែលជាមនុស្សស្រឡាញ់ភេទដូចគ្នា»។
នាយករដ្ឋមន្ត្រីថៃអ្នកស្រី Paetongtarn Shinawatra ទទួលបានផលចំណេញផ្នែកនយោបាយពីការប្រែប្រួលផ្នែកច្បាប់នេះ ដែលត្រូវបានអនុម័តបន្ទាប់ពីបានពន្យាររាប់ឆ្នាំមកហើយដើម្បីរៀបចំការរៀបការសម្រាប់មនុស្សមានភេទដូចគ្នានេះ។
លោកស្រី Paetongtarn ដែលបានចូលរួមក្នុងវេទិកាសេដ្ឋកិច្ចពិភពលោកទីក្រុង ដាវ៉ូស ប្រទេសស្វ៊ីស ក្នុងអំឡុងនៃការអនុម័តច្បាប់ថ្មីនោះ បានថ្លែងតាមរយៈវីដេអូថតទុកជាមុនថា៖ «ដោយអំណាចនៃក្ដីស្រឡាញ់របស់អ្នកទាំងអស់គ្នា ថ្ងៃនេះ ប្រទេសថៃបង្កើតថ្ងៃប្រវត្តិសាស្ត្រមួយដែលធ្វើឱ្យពិភពលោកបានដឹងថា យើងទទួលយកគ្រប់សេចក្ដីស្រឡាញ់ និង គ្រប់ភេទ ដែលជាមូលដ្ឋានគ្រឹះនៃលទ្ធិប្រជាធិបតេយ្យ»។
ច្បាប់នេះក៏បានផ្ដល់ក្ដីសង្ឃឹមដ៏ធំសម្រាប់ជួយឱ្យសេដ្ឋកិច្ចថៃងើបឡើងផងដែរ ដោយក្រុមហ៊ុនជាច្រើនរាប់ចាប់ពីក្រុមហ៊ុនធានារ៉ាប់រងនិងការកម្ចីទិញផ្ទះរហូតដល់សណ្ឋាគារនានា បានចាប់អារម្មណ៍ក្នុងការរកប្រាក់ពីអ្វីដែលគេហៅថា ប្រាក់បាតពណ៌ផ្កាឈូក ដែលសំដៅទៅលើអំណាចសេដ្ឋកិច្ចរបស់សហគមន៍ស្រឡាញ់ភេទដូចគ្នា។
រដ្ឋាភិបាលរបស់លោកស្រី Paetongtarn បានដាក់ការរៀបការនៃមនុស្សស្រឡាញ់ភេទដូចគ្នាឱ្យស្ថិតនៅក្រោមកិច្ចប្រឹងប្រែង«អំណាចទន់»បន្ថែមទៅលើតន្ត្រីនិងខ្សែភាពយន្តសម័យរបស់ថៃ ដោយមើលឃើញពីឱកាសសេដ្ឋកិច្ចតាមរយៈកេរ្តិ៍ឈ្មោះដែលទទួលបានពីការបើកចំហនិងការរៀបចំពិធីអាពាហ៍ពិពាហ៍ ក៏ដូចជាដំណើរកម្សាន្តក្រោយរៀបការនៅក្នុងប្រទេសដែលជាទិសដៅទេសចរណ៍កំពូលមួយរបស់ពិភពលោក។
ការសិក្សាមួយរបស់គេហទំព័រព័ត៌មានដំណើរកម្សាន្ត Agoda បានលើកឡើងថា ច្បាប់ស្ដីពីភាពស្មើគ្នានៃអាពាហ៍ពិពាហ៍របស់ថៃ អាចទាក់ទាញភ្ញៀវទេសចរបន្ថែមប្រមាណ ៤ លាននាក់ទៀតក្នុងមួយឆ្នាំ និងអាចបង្កើនប្រាក់ចំណូលពីវិស័យទេសចរណ៍ជិត ២ ពាន់លានដុល្លារក្នុងរយៈពេល ២ឆ្នាំបន្ទាប់ច្បាប់នេះត្រូវបានអនុម័ត។
ទិន្នន័យផ្លូវការរបស់ថៃបានបញ្ជាក់ថា ពលរដ្ឋថៃប្រមាណ ៩ ភាគរយ ឬប្រមាណ ៤,៤លាននាក់បានបង្ហាញអត្តសញ្ញាណថាជាមនុស្សស្រឡាញ់ភេទដូចគ្នា ដែលចំនួននេះជះចូលក្នុងទីផ្សារអាពាហ៍ពិពាហ៍ក្នុងស្រុកក្នុងទឹកប្រាក់ប្រហែល ៥០លានដុល្លារ។
Dujruedee Thaithumnus ទីប្រឹក្សាពិធីមង្គលការនៅកោះសាមុយ ដែលជាឋានសួគ៌សម្រាប់ភ្ញៀវទេសចរនៅក្នុងឈូងសមុទ្រថៃ បាននិយាយថា កោះនេះត្រៀមខ្លួនរួចរាល់ហើយសម្រាប់ការទទួលលំហូរនៃគូស្រករមករៀបការ។
Dujruedee និយាយថា៖ «វានឹងជំរុញសេដ្ឋកិច្ចសម្រាប់កោះនេះទាំងមូល រាប់ចាប់ពីតន្ត្រីករដែលលេងភ្លេងការ រហូតដល់សិល្បករផាត់មុខ និងហាងលក់ផ្កា អ្នកថតរូប និង សណ្ឋាគារ។ កោះនេះមានភាពចង្អៀតណែនរួចស្រេចហើយ។ នៅពេលច្បាប់ចូលជាធរមានទៀតនោះ ខ្ញុំមិនអាចស្រមៃថានឹងមានមនុស្សច្រើនប៉ុនណាទេ»៕
អាពាហ៍ពិពាហ៍នៃមនុស្សស្រឡាញ់ភេទដូចគ្នាឥឡូវនេះស្របច្បាប់នៅប្រទេសថៃ
បាងកក —
វេទិកាបញ្ចេញមតិ