ប្រទេស​ថៃ​បដិសេធ​ថា​មិន​បាន​ធ្វើបាប​មហាសេដ្ឋី​ល្បែង​ស៊ីសង​ដែល​ចិន​​និង​កម្ពុជា​ស្នើ​ធ្វើ​បត្យាប័ន​មក​វិញ

ប្រទេស​ថៃ​បាន​បដិសេធថា​ខ្លួន​មិន​បាន​ធ្វើ​បាប​មហាសេដ្ឋី​ល្បែងស៊ីសង​ចិន​ដែល​កំពុង​ជាប់​ឃុំ​ក្នុង​ពន្ធនាគារ​នៅ​ថៃ​ ហើយ​ព្យាយាម​ប្រឆាំង​នឹង​ការ​ធ្វើ​បត្យាប័ន​បញ្ជូន​ត្រឡប់​ទៅ​ប្រទេស​ចិន​វិញ ដោយ​អាជ្ញាធរចិន​បានចោទប្រកាន់​ថាលោក​បាន​ដំណើរការការល្បែង​ស៊ីសង​អនឡាញ​ខុស​ច្បាប់​នៅ​អាស៊ីអាគ្នេយ៍។ នេះ​បើ​តាម​ប្រសាសន៍​របស់​រដ្ឋមន្ត្រី​យុត្តិធម៌​ថៃ​កាល​ពី​ថ្ងៃ​អង្គារ​ ដែល​ត្រូវ​រាយការណ៍​ដោយ​ទី​ភ្នាក់ងារ​សារព័ត៌មាន Reuters។

លោក She Zhijiang (ស្ហ៊ ជីជាំង) ដែល​មាន​ដើម​កំណើត​នៅ​ប្រទេស​ចិន បាន​អះអាង​ថាលោកបាន​រង​អំពើ​អមនុស្សធម៌​នៅ​ក្នុង​ពន្ធនាគារ​ថៃ ដោយ​មាន​ការ​ប្រើអំពើ​ហិង្សា​ដែល​បាន​បណ្តាល​ឱ្យ​លោក​ក្រោក​ឈរ​លែង​កើត។ នេះ​បើ​តាម​ខ្លឹមសារ​ក្នុង​សំបុត្រ​ដែល​មេធាវី​លោក​បាន​ផ្ញើ​ទៅ​កាន់​ប៉ូលិស​អន្តរជាតិ Interpol ដែល​ត្រូវ​បាន​ឃើញ​ដោយReuters។

រដ្ឋមន្ត្រី​យុត្តិធម៌​ថៃ​លោក Tawee Sodsong បាន​ថ្លែង​ទៅ​កាន់​អ្នក​សារព័ត៌មាន​នៅ​វិមាន​រដ្ឋាភិបាល​ថៃ​ក្នុង​ក្រុង​បាងកក​ថា៖ «ការ​ប្រព្រឹត្ត​របស់​យើង​ចំពោះ​លោក គឺ​ដូច​គ្នានឹង​ចំពោះ​អ្នក​ជាប់​ពន្ធនាគារ​ដទៃ​ទៀត​ដែរ ដែល​អាច​មេធាវី​តំណាង​ជា​ទូទៅ‍»។

លោក Tawee ថាពន្ធនាគារ​មាន​កាមេរ៉ា​សន្តិសុខដែល​បង្ការ​អំពើ​បំពាន​ឬ​ការ​ធ្វើ​ទារុណកម្ម​ណា​មួយ​លើ​អ្នក​ជាប់​ឃុំ។

រដ្ឋមន្ត្រី​ថៃ​រូប​នេះ​មិន​បាន​ធ្វើអត្ថាធិប្បាយ​ចំពោះ​ការ​ចោទ​ប្រកាន់ក្នុង​សំបុត្រ​មេធាវី​លោក She ទៅ​កាន់​ប៉ូលិស​ Interpol ដែល​ថា មន្ត្រី​ស្ថានទូត​ចិន​បាន​ទៅ​ជួប​មហា​ សេដ្ឋី​នោះ​ក្នុងពន្ធនាគារ ដែល​ផ្ទុយ​ពី​បំណង​លោក ហើយ​ព្យាយាម​បញ្ចុះបញ្ចូល​លោក​ឱ្យ​ត្រឡប់​ទៅ​ប្រទេស​ចិន​វិញ។

មហា​សេដ្ឋី​ល្បែងស៊ីសង​រូប​នេះ ដែល​ចោទ​ថាសំណុំ​រឿង​ប្រឆាំង​នឹង​លោក​មាន​ចេត នា​នយោបាយ​នោះ ត្រូវ​បាន​ចាប់​ខ្លួន​នៅ​ក្នុង​ក្រុង​បាងកក​កាល​ពី​ឆ្នាំ​២០២២ តាម​រយៈ​ដីកា​អន្តរជាតិ​មួយ​និង​និវេទក្រហម​របស់​ប៉ូលិស​អន្តរជាតិInterpol ដែល​ស្នើ​ដោយរដ្ឋាភិបាល​ក្រុង​ប៉េកាំង។

លោក Tawee និយាយ​ថា​ប្រទេស​កម្ពុជា ក៏​បាន​ស្នើ​សុំ​ធ្វើ​បត្យាប័ន​យក​លោក​ដែរ ដោយ​សារ​លោក​មាន​សញ្ជាតិ​កម្ពុជា។ រដ្ឋមន្ត្រី​យុត្តិធម៌​ថៃ​និយាយ​ថាប្រទេស​គោល ដៅ​ធ្វើ​បត្យាប័ន​លោក She នឹង​ត្រូវ​សម្រេច​ដោយ​សាលាឧទ្ធរណ៍​ថៃ។

បើ​តាម​សេចក្តី​រាយការណ៍​ព័ត៌មាន​នានា លោក She គឺ​ជា​ប្រធាន​នៃ​ក្រុមហ៊ុនYatai International Holdings Group ដែល​បាន​វិនិយោគ​ក្នុង​ផ្នែក​ល្បែង​ស៊ីសង​នៅ​ក្នុង​ប្រទេស​កម្ពុជា ហ្វីលីពីន ហើយ​ពេល​ថ្មីនេះ​នៅ​រមណីយដ្ឋាន​ទេសចរណ៍​និង​កម្សាន្ត Shwe Kokko នៅ​រដ្ឋ Karen ក្នុង​ប្រទេស​មីយ៉ាន់ម៉ា។

ក្រសួង​ការបរទេសចិន​បាន​ថ្លែង​ប្រាប់​ទីភ្នាក់ងារ​សារព័ត៌មាន​ Reuters ក្នុង​សេចក្ដី​ថ្លែង​ការណ៍​មួយ​កាល​ពី​ថ្ងៃ​អាទិត្យ​ថា លោក She ជា​ពលរដ្ឋ​ចិន និង​ជា​«បុគ្គល​គន្លឹះ​ម្នាក់​នៅ​ក្នុង ឧក្រិដ្ឋកម្ម​បន្លំ​ខាង​ល្បែង​ស៊ីសង​និង​ទូរគមនាគមន៍‍» ដោយ​ថា​មាន​ភស្តុតាង​‍«ជាក់​ច្បាស់‍»​ប្រឆាំង​នឹង​លោក។

តំបន់​អាស៊ីអាគ្នេយ៍ ជាពិសេស​តំបន់​ព្រំដែន​រវាង​ប្រទេស​ថៃ មីយ៉ាន់ម៉ា ឡាវ និង​កម្ពុជា បាន​ក្លាយ​ជា​មជ្ឈមណ្ឌល​សម្រាប់​ឧក្រិដ្ឋកម្ម​បោកប្រាស់​តាម​អនឡាញ ចាប់​តាំង​ពី​សម័យកាល​រាតត្បាត​ជំងឺ​កូវីដ១៩​មក។ នេះ​បើ​តាម​អង្គការ​សហប្រជាជាតិ ដែល​ថា​មាន​មនុស្ស​រាប់​សែន​នាក់​ត្រូវ​បាន​ជួញដូរ​បង្ខំ​ឱ្យ​ធ្វើ​ការ​នៅ​ក្នុង​តំបន់​ឆបោក ឬ scam ​ទាំង​នេះ៕