ក្រុមប្រជាពលរដ្ឋប្រមាណជាង៣០០គ្រួសារ ដែលជាក្រុមទីបីមិនទាន់ទទួលបានសំណងពីរដ្ឋាភិបាល និងក្រុមហ៊ុនស្ករអំពៅ ដែលមានសមាជិកព្រឹទ្ធសភាជាតំណាង នៅខេត្តកោះកុង បានឲ្យដឹងថា ពួកគាត់នឹងឡើងមកតវ៉ានៅរាជធានីភ្នំពេញ ចំពោះវិវាទដីធ្លីរ៉ាំរ៉ៃរបស់ពួកគាត់ ដែលត្រូវបានរដ្ឋាភិបាល និងក្រុមហ៊ុនស្ករអំពៅមើលរំលង មិនបានដោះស្រាយ។
គម្រោងតវ៉ារបស់ក្រុមប្រជាពលរដ្ឋ៣០០គ្រួសារនៅខេត្តកោះកុងនេះ បានធ្វើឡើងបន្ទាប់ពីកាលពីថ្ងៃទី២២ ខែខែមីនា ឆ្នាំ២០១៨ រដ្ឋាភិបាលបានប្រកាសជោគជ័យក្នុងការបញ្ចប់វិវាទដីធ្លីរបស់ប្រជាពលរដ្ឋជាង៣០០គ្រួសារផ្សេងទៀត ដែលក្រុមមន្ត្រីសិទ្ធិមនុស្សអះអាងថា ជាក្រុមទីមួយ និងទីពីរ ដែលមានទំនាស់ដីធ្លីជាមួយក្រុមហ៊ុនស្ករអំពៅចំនួនពីរនៅខេត្តកោះកុង។
អ្នកស្រី ស គឹមសុន វ័យ៥០ឆ្នាំ តំណាងប្រជាពលរដ្ឋ៩៧គ្រួសារ ក្នុងចំណោមប្រជាពលរដ្ឋជាង៣០០គ្រួសារ ដែលមិនទាន់ទទួលបានសំណង បានប្រាប់ VOA ថា អ្នកស្រីបានទៅជួបលោកអភិបាលស្រុកស្រែអំបិលដើម្បីសួរអំពីការដែលក្រុមរបស់អ្នកស្រីមិនត្រូវបានលើកយកមកដោះស្រាយ ក្រោយការផ្តល់ព័ត៌មានរួចរាល់ ពាក់ព័ន្ធនឹងក្បាលដីដែលប្រជាពលរដ្ឋបានកាន់កាប់។
អ្នកស្រី ស គឹមសុន ដែលអះអាងថា មានដីចំនួន៣ហិកតាជាប់ក្នុងជម្លោះ បានថ្លែងបន្តថា លោកអភិបាលស្រុក ទួន សិលា បានស្នើឲ្យប្រជាពលរដ្ឋថតចម្លងសាលាកប័ត្របញ្ជាក់ពីព័ត៌មានកាន់កាប់ដីដែលធ្វើរួចកន្លងមក ទៅអាជ្ញាធរម្តងទៀត ដើម្បីអាជ្ញាធរស្រុកពិនិត្យឡើងវិញ និងបញ្ជូនទៅសាលាខេត្តកោះកុង។ តែអ្នកស្រីថា ការចម្លងសាលាកប័ត្រឡើងវិញគឺជារឿងអត់ប្រយោជន៍ ហើយថា អ្នកស្រីនឹងកោះប្រជុំជាមួយប្រជាពលរដ្ឋ មុននឹងអ្នកស្រីធ្វើសេចក្តីជូនដំណឹងទៅសាលាខេត្តអំពីការចេញតវ៉ាម្តងទៀត។
អ្នកស្រីថ្លែងយ៉ាងដូច្នេះ៖
«ខ្ញុំចង់និយាយថា ខ្ញុំទៅសួរហើយ ប៉ុន្តែខ្សាលាញុំចង់និយាយថា ធ្វើលិខិត សេចក្តីជូនដំណឹងមួយទៅ សាលាខេត្តហើយ ខ្ញុំនឹងឡើងទៅក្រសួងដែនដីតែម្តង»។
អ្នកស្រីបានពន្យល់អំពីការលេចឮពាក្យពេចន៍ដែលថា មកពីក្រុមរបស់អ្នកស្រីមិនធ្វើសកម្មភាពតវ៉ា ទើបក្រុមរបស់អ្នកស្រីមិនបានទទួលដំណោះស្រាយនោះ។ អ្នកស្រីថ្លែងថា វាជារឿងមិនពិត ដោយហេតុថា ក្រុមរបស់អ្នកស្រីធ្លាប់ចូលរួមតវ៉ាជាមួយប្រជាពលរដ្ឋទាំងអស់នោះដែរ ក្នុងនោះមានក្រុមអ្នកស្រី ផាវ ញឺង ដែលតំណាងឲ្យប្រជាពលរដ្ឋ១៧៥គ្រួសារ។ អ្នកស្រីបានថ្លែងបញ្ជាក់ទៀតថា ការបោះបង់ចោលការតវ៉ារបស់ក្រុមអ្នកស្រីគឺដោយសារមានបញ្ហាលុយកាក់ ខណៈដែលប្រជាពលរដ្ឋខ្លះបានទៅធ្វើការនៅប្រទេសថៃ ដើម្បីរកប្រាក់ដោះបំណុល។
អ្នកស្រីមានប្រសាសន៍ថា៖
«ខ្ញុំចង់និយាយថា អីចេះ មុនដំបូងហ្នឹងដាក់ជាមួយគ្នាទេ។ ក្រុម៥៣៨គ្រួសារដើរដាក់ញ្ញត្តិតាំងពីក្រសួងដែនដី ក្រសួងកសិកម្ម ក្រសួងអ្ហឺ... ធ្វើគ្រប់....គ្រប់ទាំងអស់ ហើយដល់ហើយអីចឹង គាត់ ពួកគាត់១៧៥គ្រួសារហ្នឹង គាត់ ពួកគាត់ឡើងទៅតវ៉ា ទៅតវ៉ាដេកនៅភ្នំពេញហ្នឹងរាប់យូរអីចឹង ដល់ពេលហ្នឹង ពួកខ្ញុំ អ្នកខ្លះហ្នឹងគាត់អត់បានទៅ បានអីផង ហើយដាច់ៗ អីចឹងទៅ។ ដល់អីចឹងគាត់ទៅឆ្ពោះទៅចំណាកស្រុក ទៅរកស៊ីនៅថៃ នៅអី ជំពាក់លុយធនាគារអីចឹង ហើយដល់ហើយអីចឹងអត់បានឡើងតវ៉ាអី ទៅស្រែក ទៅអីចឹងទៅ»។
អ្នកស្រី មិថុនា ភូថង អភិបាលខេត្តកោះកុង សុំមិនទាន់ធ្វើការអធិប្បាយ ដោយសារមមាញឹកនឹងការងារនៅថ្ងៃច័ន្ទនេះ។
កាលពីថ្ងៃទី ២២ ខែមីនា ក្រសួងរៀបចំដែនដី នគរូបនីយកម្ម និងសំណង់ បានប្រកាសថា ប្រជាពលរដ្ឋចំនួន៣៧៥គ្រួសារដែលមានវិវាទជាមួយក្រុមហ៊ុនKoh Kong Plantation Co.,Ltd ក្រុមហ៊ុន Koh Kong Sugar Industry Co.,Ltd បានចូលរួមកិច្ចប្រជុំនៅទីស្តីការក្រសួងរៀបចំដែនដី ដោយមានលោក ជា សុផារ៉ា រដ្ឋមន្ត្រីក្រសួងរៀបចំដែនដីជាប្រធានអង្គប្រជុំ និងមានការចូលរួមពីលោក សាយ សំអាល់ រដ្ឋមន្ត្រីក្រសួងបរិស្ថាន លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងអ្នកស្រី មិថុនា ភូថង អភិបាលខេត្តកោះកុង។ លោក George Edgar ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា និង អ្នកឧកញ៉ា លី យ៉ុងផាត់ ក៏បានចូលរួមក្នុងជំនួបនោះដែរ។
សេចក្តីប្រកាសរបស់ក្រសួងដែលបានចេញផ្សាយនៅថ្ងៃទី២២ ខែមីនានោះ ក៏បានប្រកាសឲ្យដឹងពីលទ្ធផល ដោយបានសរសេរក្នុងន័យដើមថា៖
«ជាលទ្ធផល ក្រុមហ៊ុន និងប្រជាពលរដ្ឋបានព្រមព្រៀងគ្នាបញ្ចប់ករណីវិវាទនេះជាស្ថាពរ ដោយក្រុមប្រជាពលរដ្ឋ១៧៥គ្រួសារយល់ព្រមទទួលយកដំណោះស្រាយជាដីទំហំ៣ហិកតា និងថវិកាចំនួន២៥០០ដុល្លារ ក្នុងមួយគ្រួសារ។ ប៉ុន្តែមិនដោះស្រាយចំពោះប្រជាពលរដ្ឋដែលបានដោះស្រាយរួចហើយនោះទេ ហើយក្រុមប្រជាពលរដ្ឋ២០០គ្រួសារផ្សេងទៀតយល់ព្រមទទួលយកដំណោះស្រាយជាដីទំហំ១,៥ហិកតាក្នុងមួយគ្រួសារ»។
សេចក្តីប្រកាសរបស់ក្រសួងរៀបចំដែនដីបានសរសេរបន្តថា ភាគីក្រុមហ៊ុនយល់ព្រមឲ្យរដ្ឋកាត់ដីទំហំ «៨២៥ហិកតា» ស្ថិតក្នុងឃុំ ជីខលើ ស្រុកស្រែអំបិល ខេត្តកោះកុង ចេញពីដីសម្បទានសេដ្ឋកិច្ចដែលក្រុមហ៊ុនបានទទួលសិទ្ធិវិនិយោគពីរាជរដ្ឋាភិបាល ដើម្បីឲ្យរដ្ឋធ្វើប្រទានកម្មជាកម្មសិទ្ធិជូនប្រជាពលរដ្ឋខាងលើ និងផ្តល់ថវិកាតាមចំនួនខាងលើ ជូនក្រុមប្រជាពលរដ្ឋ១៧៥គ្រួសារ តាមសំណូមពរ។
យ៉ាងណាក៏ដោយ លោក ញៀប សំអឿន មន្ត្រីសិទ្ធិមនុស្សរបស់សមាគមការពារសិទ្ធិមនុស្សអាដហុក ប្រចាំនៅខេត្តកោះកុង បានប្រាប់ VOA នៅថ្ងៃច័ន្ទនេះថា ការដោះស្រាយខាងលើមិនបានបញ្ចប់ទំនាស់ទាំងស្រុងនោះទេ ហើយថា ការណ៍នេះបញ្ជាក់ថា រដ្ឋាភិបាលបានបរាជ័យក្នុងការបញ្ចប់វិបត្តិដីធ្លីនេះ។
លោកមានប្រសាសន៍ថា៖
«ជោគជ័យសម្រាប់ការដោះស្រាយជាមួយនឹងប្រជាពលរដ្ឋ៣៧៥គ្រួសារ ប៉ុន្តែការណ៍មិនបានជោគជ័យ គឺមិនជោគជ័យជាមួយប្រជាពលរដ្ឋ៣១៦គ្រួសារផ្សេងទៀត ដែលគាត់កំពុងតែទាមទារ ហើយការទាមទារនេះគឺ..យើងមិនដឹងថា មូលហេតុអីបានជាការធ្វើសលាកប័ត្ររួចហើយ អាជ្ញាធរបែរជាទុកចោលពួកគាត់ទៅវិញ»។
លោក ញៀប សំអឿន អះអាងថា មានប្រជាពលរដ្ឋ១០នាក់ បានទៅជួបលោក ទួន សិលា អភិបាលស្រុកស្រែអំបិលនៅព្រឹកថ្ងៃច័ន្ទ ដើម្បីសួរនាំអំពីសលាកប័ត្របញ្ជាក់ពីព័ត៌មានកាន់កាប់ដី ដែលពួកគេបានធ្វើរួចទៅហើយ ហើយរដ្ឋាភិបាល និងក្រុមហ៊ុនមិនព្រមដោះស្រាយ។ យ៉ាងណាក៏ដោយ លោកថា លោកអភិបាលស្រុកស្រែអំបិល បានប្រាប់ឲ្យប្រជាពលរដ្ឋដាក់សលាប័ត្រម្តងទៀត តែប្រជាពលរដ្ឋបានប្រកែក ហើយថា ពួកគេនឹងធ្វើការតវ៉ាឆាប់ៗនេះ នៅទីក្រុងភ្នំពេញ។
VOA ព្យាយាមសុំការអធិប្បាយពីលោក ទួន សិលា អភិបាលស្រុកស្រែអំបិល តែមិនទាន់អាចទាក់ទងបានទេ។
អ្នកស្រីផាវ ញឺង តំណាងប្រជាពលរដ្ឋ១៧៥គ្រួសារ បានបញ្ជាក់ឲ្យ VOA ដឹងនៅយប់ថ្ងៃច័ន្ទថា អាជ្ញាធរបានចេញសលាកប័ត្រឲ្យដល់ប្រជាពលរដ្ឋ កាលពីខែកញ្ញាឆ្នាំ២០១៧។ ប្រជាពលរដ្ឋទាំងអស់នោះមានវិវាទជាមួយក្រុមហ៊ុនស្ករអំពៅដែលដើមឡើយកាន់កាប់ដោយលោក លី យ៉ុងផាត់ សមាជិកព្រឹទ្ធសភាគណបក្សប្រជាជនកម្ពុជា។ អ្នកស្រីមិនបានដឹងទេថា មូលហេតុអ្វី បានជាប្រជាពលរដ្ឋជាង៣០០គ្រួសារផ្សេងទៀត មិនត្រូវបានរដ្ឋាភិបាល និងភាគីពាក់ព័ន្ធគិតគូរនោះ។ អ្នកស្រីបានបញ្ជាក់ឲ្យដឹងបន្ថែមថា ប្រជាពលរដ្ឋដែលព្រមព្រៀងជាមួយនឹងក្រុមហ៊ុន និងរដ្ឋាភិបាល ដោយព្រមទទួលយកសំណង ត្រូវបានស្នើឲ្យផ្តិតមេដៃលើលិខិតបញ្ជាក់ថា ពួកគេនឹងឈប់តវ៉ាទៅពេលខាងមុខ ក្រោយការស្រុះស្រួលគ្នាកាលពីថ្ងៃទី ២២ខែមីនា។
កាសែតដែលផ្សាយជាភាសាអង់គ្លេស ឌឹ ភ្នំពេញប៉ុស្តិ៍ (The Phnom Penh Post) ក៏បានធ្វើសេចក្តីរាយការណ៍អំពីការស្នើឲ្យផ្តិតមេដៃនេះដែរ ហើយកាសែតដដែលនេះបានស្រង់ប្រសាសន៍លោក ជា សុផារ៉ា រដ្ឋមន្ត្រីក្រសួងរៀបចំដែន ដែលបានថ្លែងថា លោកមិនចង់ឃើញស្ថានភាពតវ៉ានេះតទៅទៀតទេ។ កាសែតឌឹ ភ្នំពេញប៉ុស្តិ៍ បានរាយការណ៍បន្តថា លោកជា សុផារ៉ា ក៏បានស្នើឲ្យជនរងគ្រោះនៃទំនាស់ដីធ្លីនេះ ចុះកិច្ចសន្យាបញ្ចប់ការតវ៉ានានាពីពេលនេះតទៅទៀតផង៕
