អគ្គនាយកដ្ឋានពន្ធនាគារបានច្រានចោលខ្សែវីដេអូខ្លីមួយដែលមានចំណងជើងថា «ជីវិតជាម្តាយក្នុងពន្ធនាគារ» ផលិតឡើងដោយអង្គការសិទ្ធិមនុស្សលីកាដូ កាលពីដើមសប្តាហ៍នេះ។ នេះបើតាមលិខិតបំភ្លឺចេញផ្សាយដោយអគ្គនាយកដ្ឋានពន្ធនាគារនៃក្រសួងមហាផ្ទៃ។
កាលពីថ្ងៃចន្ទ អង្គការសិទ្ធិមនុស្សលីកាដូ បានចេញផ្សាយជាសាធារណៈនូវវីដេអូខ្លីមួយដែលមានចំណងជើងថា «ជីវិតជាម្តាយក្នុងពន្ធនាគារ» និយាយពីស្ត្រីអតីតជនជាប់ឃុំម្នាក់ដែករំឭកអំពីផលវិបាកអំឡុងពេលខ្លួនស្ថិតក្នុងមន្ទីរឃុំឃាំងពេលដែលនាងមានផ្ទៃពោះនិងរហូតដល់សម្រាលកូនរួច។
មួយថ្ងៃបន្ទាប់មក អគ្គនាយកដ្ឋានពន្ធនាគារបានចេញលិខិតដោយនិយាយថា៖ «វាជាការគួរឲ្យសោកស្តាយដែលអង្គការ LICADHO បានផលិតខ្សែវីដេអូនិងចេញផ្សាយជាសាធារណៈពីបញ្ហានានាដូចបានលើកឡើងដោយស្ត្រីមួយរូប ដែលបានអះអាងថា ជាអតីតជនជាប់ឃុំ មិនបានឆ្លុះបញ្ចាំងពីការពិតនៃស្ថានភាពទូទៅក្នុងដំណើរការគ្រប់គ្រងពន្ធនាគារទូទាំងប្រទេសនាពេលបច្ចុប្បន្នឡើយ»។
អគ្គនាយកដ្ឋានពន្ធនាគារបន្ថែមនៅក្នុងលិខិតដែលចេញផ្សាយកាលពីថ្ងៃទី២៦ ខែវិច្ឆិកា ថាវីដេអូនោះ «បញ្ចេញទស្សនៈតែមួយជ្រុងជាសាធារណៈ»។
លោក នុត សវនា អគ្គនាយករងនិងអ្នកនាំពាក្យនៃអគ្គនាយកដ្ឋានពន្ធនាគារនៃក្រសួងមហាផ្ទៃបានបង្ហាញការមិនពេញចិត្តចំពោះការផ្សាយនេះដោយលោកថា មិនមានករណីនេះកើតឡើងក្នុងពន្ធនាគារបច្ចុប្បន្នដូចដែលអង្គការលីកាដូបានផ្សាយនោះទេ។
លោកបានប្រាប់ VOA តាមសារអេឡិចត្រូនិកថា៖
«បើលីកាដូនៅបន្តផ្សាយ វាជាសិទ្ធិបញ្ចេញមតិរបស់គេ ប៉ុន្តែលីកាដូត្រូវទទួលខុសត្រូវចំពោះមុខច្បាប់ បើអង្គភាពមានវិធានការផ្លូវច្បាប់ ដែលយើងគិតថាជាជម្រើសចុងក្រោយ។ លីកាដូគួរដឹងថា ទង្វើនេះប្រព្រឹត្តឡើងដើម្បីប៉ូលា profile របស់គេ ក្នុងពេលដែលសហគមន៍អន្តរជាតិកំពុងប្រារព្ធការចងចាំ នៃការរំលោភសិទ្ធិស្ត្រី»។
លីកាដូ បានផ្សាយវីដេអូស្តីពីជីវិតស្ត្រីជាម្តាយអំឡុងពេលជាប់ឃុំឃាំង នេះដើម្បីចូលរួមក្នុងយុទ្ធនាការ១៦ថ្ងៃដើម្បីបញ្ឈប់អំពើហិង្សាលើស្ត្រីនិងក្មេងស្រី ចាប់ពីថ្ងៃទី២៥ ខែវិច្ឆិកា ដល់ ថ្ងៃទី១០ ខែធ្នូ ឆ្នាំ២០១៩។
លោក អំ សំអាត នាយករងទទួលបន្ទុកផ្នែកឃ្លាំមើលនិងការពារសិទ្ធិមនុស្សនៃអង្គការលីកាដូ (Licadho) ប្រាប់ VOA ថា រដ្ឋាភិបាលមានការយល់ច្រឡំពីគោលបំណងនៃការចេញផ្សាយវីដេអូនោះដែលវាជាសាច់រឿងពិតរបស់ស្ត្រីដែលទើបតែចេញពីពន្ធនាគារថ្មីៗនេះ ហើយលោកថាការផ្សព្វផ្សាយនេះធ្វើឡើងដើម្បីឲ្យស្ត្រីនិងប្រជាពលរដ្ឋទូទៅយល់ដឹងអំពីផលវិបាកនៃជីវិតក្នុងពន្ធនាគារ។
លោក លោក អំ សំអាត បញ្ជាក់បន្ថែមថា៖ «ប៉ុន្តែអាវីដេអូដែលយើងចេញនេះគឺក្នុងបំណងរឿងស្ត្រីទេ ធ្វើយ៉ាងណាឲ្យប្រជាពលរដ្ឋគាត់គិតហើយកុំប្រព្រឹត្តអ្វីដែលខុសច្បាប់ អាចនឹងត្រូវជាប់ពន្ធនាគារ ហើយអាចនឹងជួបផលវិបាក អ្វីខ្លះ ហើយគាត់រស់នៅក្នុងពន្ធនាគារម៉េចៗ»។
ទោះយ៉ាងណា នេះមិនមែនជាលើកទីមួយឡើយដែលរដ្ឋាភិបាលនិងស្ថាប័នពាក់ព័ន្ធនឹងរដ្ឋាភិបាលច្រានចោលនិងបង្ហាញការមិនពេញចិត្តចំពោះរបាយការណ៍និងការរកឃើញអំពីបញ្ហាសិទ្ធិមនុស្សដែលចេញដោយអង្គការសិទ្ធិមនុស្សលីកាដូ។ កាលពីខែសីហាកន្លងទៅ នៅក្នុងឆ្នាំ២០១៩នេះ អ្នកស្រី ជា សេរី ដែលជាទេសាភិបាលរង និងជាអគ្គនាយកនៃអគ្គនាយកដ្ឋានបច្ចេកទេសនៃធនាគារជាតិនៃកម្ពុជាបាននិយាយថា របាយការណ៍ដែលបង្ហាញពីការរំលោភបំពានសិទ្ធិមនុស្សក្នុងវិស័យមីក្រូហិរញ្ញវត្ថុនៅកម្ពុជាធ្វើឡើងដោយមិនមានការពិនិត្យពិច្ច័យ។
ទោះបីជាយ៉ាងណាក្រុមអ្នកធ្វើការដើម្បីសិទ្ធិមនុស្សនិងតម្លាភាពបាននិយាយថា ការបដិសេធរបស់រដ្ឋាភិបាលចំពោះការរកឃើញរបស់អង្គការសិទ្ធិមនុស្សលីកាដូ គួរតែធ្វើឡើងដោយមានភស្តុតាងនិងការពន្យល់បន្ថែម។
លោក Phil Robertson អនុប្រធានប្រចាំតំបន់អាស៊ីនៃអង្គការឃ្លាំមើលសិទ្ធិមនុស្សអន្តរជាតិ Human Rights watch ប្រាប់ VOA ថា រដ្ឋាភិបាលកម្ពុជាតែងតែបដិសេធរបាយការណ៍ណាដែលផ្សាយពីកំហុសរបស់ខ្លួន ហើយឆ្លើយតបបែបវាយប្រហារទៅកាន់ស្ថាប័នដែលបានផ្សព្វផ្សាយរបាយការណ៍នោះ។
លោកបាននិយាយថា៖
«ជាថ្មីម្តងទៀត យើងសង្កេតឃើញថា នៅពេលដែលអង្គការសិទ្ធិមនុស្សលើកពីការព្រួយបារម្ភផ្នែកសិទ្ធិមនុស្ស ដោយផ្អែកលើឯកសារនិងរបាយការណ៍ ដែលបង្ហាញពីអ្វីដែលកំពុងកើតឡើង រដ្ឋាភិបាលមិនមានចម្លើយហេតុផលមួយសមស្រប ចំពោះអ្វីដែលពួកគេបានធ្វើ។ អ៊ីចឹងពួកគាត់វាយប្រហារអ្នកនាំសារនិងធ្វើការបំភិតបំភ័យ»។
ចំណែកលោក ព្រាប កុល នាយកប្រតិបត្តិនៃអង្គការតម្លាភាពកម្ពុជាដែលធ្វើការប្រឆាំងអំពើពុករលួយបានប្រាប់ VOA ថា៖
«មិនមែនចេះតែឮរបាយការណ៍ហើយយើងបដិសេធ ហើយប្រជាពលរដ្ឋគាត់ ទទួលស្គាល់ទេគាត់ប្រាកដជាមានសញ្ញាសួរ អ៊ីចឹងទៅខ្ញុំថា យល់ល្អកាលណាមានរបាយការណ៍ឬក៏មានការសិក្សាអីមួយ ត្រូវតែមានការឆ្លើយតបដោយមានការសិក្សាតបវិញដែរ»។
កាលពីខែកញ្ញាកន្លងទៅ រដ្ឋាភិបាលបានកោះហៅអង្គការក្រៅរដ្ឋាភិបាលចំនួនបីគឺសមាគមន៍ធាងត្នោត អង្គការលីកាដូ និងអង្គការតម្លាភាពកម្ពុជា ដើម្បីមកជួបពិភាក្សាអំពីរបាយការណ៍និងការអត្ថាធិប្បាយដែលពួកគេបានផ្សាយ។
ប៉ុន្តែអ្នកនាំពាក្យរដ្ឋាភិបាលលោក ផៃ ស៊ីផាន ប្រាប់ VOA ថា រដ្ឋាភិបាលកម្ពុជានឹងទទួលស្គាល់របាយការណ៍របស់អង្គការក្រៅរដ្ឋាភិបាលបើសិនវាជារបាយការណ៍ពិត។ លោកបន្ថែមថា ការចេញលិខិតបដិសេធរបាយការណ៍ឬជំនួបជាមួយមន្ត្រីតំណាងអង្គការក្រៅរដ្ឋាភិបាលគឺដើម្បីតែជជែកវែកញែករកការពិតប៉ុណ្ណោះមិនមែនជាការបំភិតបំភ័យនោះទេ។
លោកបាននិយាយថា៖
«យើងគ្រាន់តែចង់បង្ហាញនិងប្រជុំបន្ថែមទៀតនូវអ្វីទៅដែលជាទិន្នន័យដែលជាផ្លូវការតែប៉ុណ្ណឹងទេ ហើយគាត់និយាយអីនិយាយទៅជារឿងរបស់គាត់។ ហើយកាលណាគាត់និយាយទិន្នន័យដែលគាត់ប្រឌិតខ្លួនគាត់ អាហ្នឹងជា Fake news ជាព័ត៌មានមិនពិត»។
អង្គការ Freedom House ដែលមានមូលដ្ឋាននៅសហរដ្ឋអាមេរិកបានឲ្យដឹងថាក្នុងឆ្នាំ២០១៩ ស្ថានភាពសិទ្ធិសេរីភាពក្នុងប្រទេសកម្ពុជាបានធ្លាក់ចុះយ៉ាងខ្លាំងខណៈសហគមន៍អន្តជាតិកំពុងដាក់សម្ពាធនិងបន្តអំពាវនាវឲ្យកម្ពុជាលើកស្ទួយការគោរពសិទ្ធិមនុស្ស ក៏ដូចជាលទ្ធិប្រជាធិបតេយ្យឡើងវិញនៅផងដែ៕
