ឪពុករបស់ក្មេងស្រីកម្ពុជាដែលមានអាយុ១១ឆ្នាំហើយដែលបានស្លាប់ដោយសារជំងឺគ្រុនផ្តាសាយបក្សីក្នុងសប្តាហ៍នេះ បានធ្វើតេស្តរកឃើញឆ្លងវីរុសនេះ។ នេះបើតាមមន្ត្រីសុខភាពកម្ពុជាដែលបាននិយាយនៅថ្ងៃសុក្រនេះ ហើយដែលត្រូវចេញផ្សាយដោយទីភ្នាក់ងារព័ត៌មាន AFP។
ក្មេងស្រីដែលបានស្លាប់នោះបានធ្លាក់ខ្លួនឈឺកាលពីថ្ងៃទី១៦ ខែកុម្ភៈកន្លងទៅដោយមានអាការៈគ្រុនក្តៅ ក្អក និងឈឺបំពង់ករ ហើយបានស្លាប់កាលពីថ្ងៃពុធកន្លងទៅ ដោយឆ្លងវីរុសជំងឺផ្តាសាយបក្សី H5N1។ នេះបើតាមក្រសួងសុខាភិបាលកម្ពុជាដែលបាននិយាយនៅក្នុងសេចក្តីថ្លែងការណ៍។
ពួកអាជ្ញាធរកម្ពុជាបានប្រមូលសំណាកឈាមពីមនុស្ស១២នាក់កាលពីថ្ងៃព្រហស្បតិ៍ម្សិលមិញដែលបានទាក់ទង ឬនៅជិតក្មេងស្រីនោះ។
ឪពុករបស់ក្មេងស្រីនេះអាយុ៤៩ឆ្នាំជាមនុស្សតែម្នាក់គត់ក្នុងចំណោមអ្នកដែលបានធ្វើតេស្តហើយរកឃើញវិជ្ជមានឆ្លងជំងឺនេះ។ បើទោះបីជាយ៉ាងនេះក្តី ក៏ឪពុកក្មេងស្រីនេះ មិនមានរោគសញ្ញាអ្វីនោះឡើយមកដល់ពេលនេះ។ នេះបើតាមក្រុមអាជ្ញាធរកម្ពុជា។
ក្រុមមន្ត្រីសុខភាពកម្ពុជា កំពុងស្រាវជ្រាវរកប្រភពនៃការផ្ទុះឡើងនេះជំងឺនេះ។
មានសត្វស្លាបមួយចំនួនត្រូវបានគេប្រទះឃើញងាប់នៅបឹងមួយកន្លែងក្បែរផ្ទះក្មេងស្រីក្នុងភូមិដាច់ស្រយាលមួយ។
ជាធម្មតាជំងឺគ្រុនផ្តាសាយបក្សីនេះ ឆ្លងពីសត្វទៅមនុស្សតាមរយៈការប៉ះពាល់ដោយផ្ទាល់ជាមួយសត្វ។
អង្គការសុខភាពពិភពលោកបានអំពាវនាវឱ្យមានការប្រុងប្រយ័ត្ន ក្រោយពីបានរកឃើញជំងឺគ្រុនផ្តាសាយបក្សីនៅលើសត្វពាហនៈកាលពីដើមខែនេះ ប៉ុន្តែបានបញ្ជាក់ថា ហានិភ័យដែលអាចឆ្លងទៅមនុស្សមានកម្រិតទាប៕
ឪពុកក្មេងស្រីដែលស្លាប់ដោយជំងឺគ្រុនផ្តាសាយបក្សីធ្វើតេស្តរកឃើញវិជ្ជមាននៃជំងឺនេះ
ភ្នំពេញ —
