បណ្ដាមេដឹកនាំនៃសហភាពអឺរ៉ុបដែលបានជួបប្រជុំគ្នាក្នុងទីក្រុងព្រុចសែល ប្រទេសបែលហ្ស៊ិក បានព្រមានកាលពីថ្ងៃចន្ទថាបើមានសង្គ្រាមពាណិជ្ជកម្មជាមួយសហរដ្ឋអាមេរិក នោះនឹងគ្មានអ្នកឈ្នះទេ និងបានទទូចថាពួកគេនឹងតបតវិញ បើប្រធានាធិបតីអាមេរិកលោក Donald Trump ដាក់ពន្ធគយ។ នេះបើយោងតាមទីភ្នាក់ងារសារព័ត៌មាន AFP។
ប្រធានាធិបតីបារាំងលោក Emmanuel Macron បាននិយាយថា សហភាពអឺរ៉ុបត្រូវតែបង្ហាញសាច់ដុំរបស់ខ្លួន បើលោក Trump ពិតជាធ្វើតាមការគំរាមក្នុងការដៅពន្ធគយលើសហភាពអឺរ៉ុបមែន។
លោក Macron បាននិយាយថា៖ «បើយើងរងការវាយប្រហារខាងពាណិជ្ជកម្ម សហភាពអឺរ៉ុបក្នុងនាមជាមហាអំណាចពិតប្រាកដមួយដែរនឹងត្រូវតែក្រោកឈរការពារខ្លួន»។
ក្រុមមេដឹកនាំនៃបណ្តាប្រទេសទាំង ២៧ នៃសហភាពអឺរ៉ុបកំពុងប្រមូលផ្តុំគ្នាក្នុងរាជធានីរបស់បែលហ្ស៊ិក ដោយនាយករដ្ឋមន្ត្រីចក្រភពអង់គ្លេសនិងមេដឹកនាំអង្គការអូតង់ពិភាក្សាគ្នាអំពីកិច្ចប្រឹងប្រែងក្នុងការពង្រឹងការការពារខ្លួនរបស់អឺរ៉ុបដែលប្រឈមនឹងរុស្ស៊ី ស្របពេលលោក Trump ទាមទារឲ្យសហភាពអឺរ៉ុបដែលជាសម្ព័ន្ធមិត្តរបស់អាមេរិកចំណាយឲ្យបានច្រើនជាងមុន។
តែការពិភាក្សានោះត្រូវបានលុបលើដោយការសម្រេចចិត្តរបស់លោក Trump ក្នុងការដាក់ពន្ធគយលើប្រទេសកាណាដា ម៉ិកស៊ិក និងចិន ដោយលោក Trump គំរាមថាសហភាពអឺរ៉ុបគឺជាគោលដៅបន្ទាប់។
នាយករដ្ឋមន្ត្រីប៉ូឡូញលោក Donald Tusk ដែលប្រទេសរបស់លោកធ្វើជាប្រធានផ្លាស់វេនរបស់សហភាពអឺរ៉ុប បាននិយាយថាអឺរ៉ុបត្រូវតែធ្វើអ្វីៗគ្រប់បែបយ៉ាងដើម្បីបញ្ចៀសសង្គ្រាមពាណិជ្ជកម្ម «ដ៏ឡប់ឆ្កួតនិងមិនចាំបាច់ទាល់តែសោះ»។
ក្រោយពីបានដាក់ពន្ធលើប្រទេសជិតខាងរបស់ខ្លួនក្នុងទ្វីបអាមេរិកខាងជើងនិងប្រទេសចិនហើយ លោក Trump បានបង្កើនវោហារសាស្ត្រកាលពីថ្ងៃអាទិត្យដោយនិយាយថាលោក «ប្រាកដ» ជាគ្រោងដៅលើសហភាពអឺរ៉ុបក្នុងពេលអនាគត៕
វេទិកាបញ្ចេញមតិ