រដ្ឋមន្ត្រីការបរទេសចិនលោក Qin Gang បាននិយាយនៅថ្ងៃអង្គារនេះថា ប្រទេសរបស់លោកចង់ដើរតួនាទីនៅក្នុងការបញ្ចប់សង្គ្រាមរវាងរុស្ស៊ីនិងអ៊ុយក្រែន។ ចិនគឺជាប្រទេសដែលបានផ្ដល់ការគាំទ្រផ្នែកនយោបាយដ៏ខ្លាំងក្លាដល់រុស្ស៊ីសម្រាប់ការឈ្លានពានរបស់រុស្ស៊ីលើអ៊ុយក្រែន។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AP។
លោក Qin បានប្រាប់អ្នកចូលរួមនៅក្នុងសន្និសីទមួយក្នុងទីក្រុងប៉េកាំងស្ដីពីសន្តិសុខថា ប្រទេសចិនមានក្ដីបារម្ភថា សង្គ្រាមរវាងរុស្ស៊ីនិងអ៊ុយក្រែនជិតមួយឆ្នាំកន្លងមកនេះអាចរីករាលដាលបន្ថែមទៀតដោយ«មិនអាចគ្រប់គ្រងបាន»។
លោកបាននិយាយថា ប្រទេសចិននឹងបន្តជំរុញឱ្យមានការចរចាសន្តិភាពនិងផ្ដល់នូវ«គតិបណ្ឌិត» ដើម្បីស្វែងរកដំណោះស្រាយនយោបាយចំពោះសង្គ្រាមនេះ។
លោក Qin បានថ្លែងថា៖ «នៅពេលជាមួយគ្នានេះដែរ យើងជំរុញប្រទេសពាក់ព័ន្ធឱ្យបញ្ឈប់ជាបន្ទាន់នូវការបន្ថែមប្រេងលើភ្លើង បញ្ឈប់ការរិះគន់លើប្រទេសចិន និងបញ្ឈប់ការរំជើបរំជួលអំពីការពិភាក្សារឿងអ៊ុយក្រែននៅពេលបច្ចុប្បន្ន និងរឿងតៃវ៉ាន់នៅពេលអនាគត»។
លោក Qin បានលើកឡើងដូច្នេះដោយហាក់ដូចជាយោងទៅលើការគាំទ្រផ្នែកយោធាដែលសហរដ្ឋអាមេរិកនិងសម្ព័ន្ធមិត្តរបស់អាមេរិកផ្ដល់ឱ្យអ៊ុយក្រែន ក៏ដូចជាក្ដីបារម្ភដែលថា ប្រទេសចិនកំពុងត្រៀមលក្ខណៈដើម្បីធ្វើតាមការគំរាមកំហែងរបស់ខ្លួននៅក្នុងការប្រើកម្លាំងដើម្បីគាំទ្រការអះអាងរបស់ខ្លួនលើរឿងតៃវ៉ាន់ ដែលជាកោះប្រជាធិបតេយ្យគ្រប់គ្រងដោយខ្លួនឯង។
កន្លងមក ប្រទេសចិនបានបដិសេធមិនធ្វើការថ្កោលទោសការឈ្លានពាន ឬក៏អំពើឃោរឃៅរបស់រុស្ស៊ីដែលបានប្រព្រឹត្តលើជនស៊ីវិលអ៊ុយក្រែន និងបានរិះគន់យ៉ាងខ្លាំងក្លាលើការដាក់ទណ្ឌកម្មសេដ្ឋកិច្ចរបស់ក្រុមបស្ចិមប្រទេសលើរុស្ស៊ី។ នៅក្នុងការថ្លែងយោងដល់រុស្ស៊ី ចិនមិនទាន់បានហៅសង្គ្រាមនេះថាជាការឈ្លានពាននៅឡើយទេ។
ប្រទេសចិននិងរុស្ស៊ីបានចងសម្ព័ន្ធគោលនយោបាយការបរទេសរបស់ពួកគេជាមួយគ្នាដើម្បីប្រឆាំងនឹងសហរដ្ឋអាមេរិក ហើយក្នុងពេលជាច្រើនសប្ដាហ៍មុនពេលរុស្ស៊ីឈ្លានពានអ៊ុយក្រែន មេដឹកនាំរបស់ចិននិងរុស្ស៊ីបានប្រកាសអំពីភាពជាដៃគូ«គ្មានព្រំដែន»។ ប្រទេសចិនក៏បានបញ្ជាក់ផងដែរថា រុស្ស៊ីត្រូវបានបញ្ឆេះឱ្យប្រើកម្លាំងយោធាដោយសារការពង្រីករបស់អង្គការអូតង់ (NATO) ទៅទិសខាងកើត។
ទោះបីជាដូច្នេះក៏ដោយ លោក Qin បានបញ្ជាក់ជាថ្មីនូវការអះអាងរបស់ចិនដែលថា ខ្លួន «តែងតែប្រកាន់ជំហរសត្យានុម័ត និងមិនលំអៀងផ្អែកលើភាពល្អត្រឹមត្រូវនៃបញ្ហានេះ»។
ប្រទេសចិនបានជំទាស់ទៅនឹងការរិះគន់លើប្រទេសរុស្ស៊ីនៅឯអង្គការសហប្រជាជាតិ ហើយស្របពេលនោះដែរទទូចថា អធិបតេយ្យភាពនិងបូរណភាពទឹកដីនៃប្រទេសទាំងអស់ត្រូវតែគោរព៕
ចិនថា ខ្លួនចង់ដើរតួនាទីនៅក្នុងការស្វែងរកសន្តិភាពសម្រាប់សង្គ្រាមនៅអ៊ុយក្រែន
ទីក្រុងប៉េកាំង —
