ពួកមេដឹកនាំអារ៉ាប់ នឹងជួបគ្នានៅក្នុងប្រទេសអារ៉ាប់ប៊ីសាអូឌីតនៅថ្ងៃសុក្រនេះដើម្បីទប់ទល់ផែនការរបស់ប្រធានាធិបតីលោក Donald Trump សម្រាប់សហរដ្ឋអាមេរិកត្រួតត្រាតំបន់ហ្កាហ្សាហើយនិងការបណ្តេញប្រជាពលរដ្ឋរបស់តំបន់នោះ។ នេះបើតាមប្រភពអ្នកការទូតនិងរដ្ឋាភិបាលហើយត្រូវបានរាយការណ៍ដោយទីភ្នាក់ងារសារព័ត៌មាន AFP។
ផែនការនេះបានធ្វើឱ្យបណ្តាប្រទេសអារ៉ាប់រួបរួមប្រឆាំង ក៏ប៉ុន្តែ ការខ្វែងគំនិតនៅតែមានអំពីតើនរណាត្រូវគ្រប់គ្រងដែនដីប៉ាឡេស្ទីនដែលហែកហួរដោយសង្គ្រាមហើយនឹងថាតើត្រូវផ្តល់ថវិកាសម្រាប់ស្ថាបនាតំបន់នោះឡើងវិញយ៉ាងដូចម្តេច។
លោក Umer Karim ជាអ្នកជំនាញគោលនយោបាយការបរទេសអារ៉ាប់ប៊ីសាអូឌីតបានហៅសន្និសីទកំពូលនេះថាជា«បញ្ហាសំខាន់បំផុត»ក្នុងប៉ុន្មានទសវត្សរ៍នេះសម្រាប់ពិភពអារ៉ាប់និងបញ្ហាប៉ាឡេស្ទីន។
លោកប្រធានាធិបតី Trump បានធ្វើឱ្យមានកំហឹងក្រេវក្រោធនៅពេលដែលលោកបានស្នើឱ្យសហរដ្ឋអាមេរិក«កាន់កាប់តំបន់ហ្កាហ្សា»ហើយថាប្រជាពលរដ្ឋ២លាន៤សែននាក់នៅក្នុងតំបន់នោះនឹងត្រូវតាំងទីលំនៅកន្លែងថ្មីក្នុងប្រទេសអេហ្ស៊ីបនិងហ្សកដានីដែលជាប្រទេសជិតខាង។
ប្រភពមួយដែលស្និទ្ធនឹងរដ្ឋាភិបាលអារ៉ាប់ប៊ីសាអូឌីតបានប្រាប់ទីភ្នាក់ងារសារព័ត៌មាន AFP ថាពួកមេដឹកនាំអារ៉ាប់ នឹងពិភាក្សា«ផែនការស្ថាបនាឡើងវិញដើម្បីទប់ទល់នឹងផែនការរបស់លោកប្រធានាធិបតី Trump សម្រាប់តំបន់ហ្កាហ្សា»។
ជំនួបជាមួយលោកប្រធានាធិបតី Trump នៅក្នុងរដ្ឋធានីវ៉ាស៊ីនតោនកាលពីថ្ងៃទី១១ ខែកុម្ភៈ ព្រះមហាក្សត្រ Abdullah II នៃប្រទេសហ្សកដានីបានមានព្រះបន្ទូលថាអេហ្ស៊ីបនឹងបង្ហាញផែនការសម្រាប់តំបន់ហ្កាហ្សា។
ទីភ្នាក់ងារព័ត៌មានផ្លូវការណ៍នៃប្រទេសអារ៉ាប់ប៊ីសាអូឌីតបានដកស្រង់សម្តីម្នាក់មកបញ្ជាក់កាលពីថ្ងៃព្រហស្បតិ៍ថាអេហ្ស៊ីបនិងហ្សកដានីនឹងចូលរួមក្នុងសន្និសីទកំពូលនៅរាជធានីរីយ៉ាដរួមជាមួយប្រទេស៦ផ្សេងទៀតដែលជាសមាជិកនៃក្រុមប្រឹក្សាកិច្ចសហប្រតិបត្តិការតំបន់ឈូងសមុទ្រពែកដែលមានគោលបំណងពង្រឹងកិច្ចសហប្រតិបត្តិការនិងចំណាត់ការរួមគ្នារបស់ប្រទេសអារ៉ាប់»៕
វេទិកាបញ្ចេញមតិ