រដ្ឋាភិបាលរុស្ស៊ីបានស្វាគមន៍អ្វីដែលខ្លួនហៅនៅថ្ងៃអង្គារនេះថាជាជំហរ «មានតុល្យភាពជាងមុន» របស់សហរដ្ឋអាមេរិកលើអ៊ុយក្រែន បន្ទាប់ពីសហរដ្ឋអាមេរិកបានជំរុញឲ្យមានការគាំទ្រលើសេចក្ដីសម្រេច «មាគ៌ាដើម្បីសន្តិភាព» របស់ខ្លួននៅក្រុមប្រឹក្សាសន្តិសុខអង្គការសហប្រជាជាតិ ទោះបីជាមានការជំទាស់ពីចក្រភពអង់គ្លេសនិងសម្ព័ន្ធមិត្តអឺរ៉ុបក៏ដោយ។
អ្នកនាំពាក្យរដ្ឋាភិបាលរុស្ស៊ីលោក Dmitry Peskov បាននិយាយថា ជំហររបស់សហរដ្ឋអាមេរិកបានបង្ហាញឲ្យឃើញនូវអ្វីដែលលោកហៅថា «សេចក្ដីប្រាថ្នាពិតប្រាកដក្នុងការរួមចំណែកស្វែងរកដំណោះស្រាយ»។
សេចក្តីព្រាងដែលមាន ៤ ប្រយោគរបស់សហរដ្ឋអាមេរិកបង្ហាញពីការកាន់ទុក្ខការបាត់បង់ជីវិតមនុស្ស «នៅក្នុងសង្គ្រាមរវាងរុស្ស៊ីនិងអ៊ុយក្រែន» និងបញ្ជាក់ថាគោលបំណងចម្បងរបស់អង្គការសហប្រជាជាតិ «គឺរក្សាសន្តិភាពអន្តរជាតិនិងសន្តិសុខនិងដោះស្រាយជម្លោះដោយសន្តិវិធី»។ សេចក្តីព្រាងនេះក៏ «ស្នើ» ផងដែរ «ឲ្យមានការបញ្ចប់សង្គ្រាមនេះឲ្យបានឆាប់និងជំរុញបន្ថែមឲ្យមានសន្តិភាពយូរអង្វែងរវាងអ៊ុយក្រែននិងរុស្ស៊ី»។
សេចក្ដីសម្រេចនេះត្រូវបានអនុម័តដោយមានសំឡេងគាំទ្រចំនួន ១០ ដែលក្នុងនោះរួមមានទាំងរុស្ស៊ីនិងចិនដែលបោះឆ្នោតជាមួយនឹងសហរដ្ឋអាមេរិកផងដែរ។ ចក្រភពអង់គ្លេសនិងប្រទេសអឺរ៉ុប ៤ ទៀតនៃក្រុមប្រឹក្សាសន្តិសុខអង្គការសហប្រជាជាតិបានបោះឆ្នោតអនុប្បវាទ។ គ្មានសមាជិកណាមួយបោះឆ្នោតប្រឆាំងនោះទេ។
ប្រទេសបារាំងនិងចក្រភពអង់គ្លេសបានព្យាយាមឲ្យមានការពន្យារពេលការបោះឆ្នោតនេះប៉ុន្តែបានបរាជ័យ។ បន្ទាប់មក ប្រទេសទាំងពីររួមទាំងដាណឺម៉ាក ក្រិក និងស្លូវេនីផងដែរ ចង់ឲ្យមានការកែប្រែសំណេររបស់សហរដ្ឋអាមេរិកនោះ ដែលក្នុងនោះរួមមានទាំងការកែពាក្យ «សង្គ្រាមរវាងរុស្ស៊ីនិងអ៊ុយក្រែន» ទៅជាពាក្យ «ការឈ្លានពានពេញទំហឹងរបស់សហព័ន្ធរុស្ស៊ីលើអ៊ុយក្រែន» ផងដែរ៕
រុស្ស៊ីសរសើរជំហររបស់អាមេរិកថាមានតុល្យភាពជាងមុនលើអ៊ុយក្រែន
វេទិកាបញ្ចេញមតិ