Bam ya tashi ya hallaka wasu mutane biyu da ake kyautata zaton ‘yan kungiyar nan ce ta Boko Haram, ya kuma raunata sojoji biyu a cikin daren nan da ya shige, a lokacin da wasu zaratan sojoji na Najeriya suka kai sumame kan wani gida a Sabuwar Gandu dake yankin karamar hukumar Kumbotso a Jihar Kano.
Hukumomin soja a Kano, sun kuma ce an kama mata guda 4 da yara kanana su 8 a cikin gidan, a bayan da mazajen dake cikinsa suka tayar da bam cikin wata mota a lokacin da sojoji suka yi kokarin kutsawa cikin wannan gida.
Haka kuma, an samu durom-durom wadanda ake kokarin maida su bama-bamai a cikin gidan.
Kwamandan runduna ta 3 ta sojojin Najeriya a Kano, Birgediya Janar Iliyasu Isa Abba, ya zagaya da manema labarai wannan gida dake Sabuwar Gandu, inda suka ganewa idanunsu wannan wuri, kamar yadda za a iya gani cikin wadannan hotuna dake kasa, za a kuma iya jin bayani a sama a gefen dama.
