UMongameli Emmerson Mnangagwa usefikile kweleEthiopia okuzaqhutshwa umhlangano omkhulu oweAfrican Union edolobheni le Addis Ababa lapho okuzahlaziywa khona impi yomvukelwa ekweleDemocratic Republic of Congo, ukuhlawulwa kwamazwe ezwekazi leAfrica ahluthunwa ngabamhlophe, ukukhudumala komkhathi, eziphathelane labantwana labesifazana lokunye okuhlupha uzulu.
UMnangagwa uzangena umhlangano lo labanye bakhe abavela emazweni atshiyeneyo okuzakhulunywa njalo ngokuqakatheka kokubambana kuzwekazi leAfrica.
Umhlangano lo uqhutshwa ngesikhathi kulokulwisana okwesabekayo phakathi kwebutho likaMongameli Felix Tshisekedi labalwecatsha beM23, asebehluthune idolobho leGoma njalo abafuna ukuhluthuna izigaba ezinengi esabelweni seNoth Kivu.
Inhlanganiso yeAU ikhangelelwe ukuba izasekela imizamo yeSouthern African Development Community leye East Africa Community eyokuzama ukumisa impi le osokubulewe abantu abedlula inkulungwane ezintathu.
Kulabanye banye njalo abahlamuke kubutho leDRC abavalelwe entilongweni. Bazathonisiwa amacala okudlwengula abesifazana lamankazana, ukubulala abantu mahlayana, ukutshontsha lokunye.
Ukuhlaziya loludaba, sixo loMnu. Mlungisi Dube, olandela ezombusazwe ezimele, othi kumele kumiswe impi le elakho ukuqhamuka emazweni afana leRwanda, okuthiwa lisekela iM23.
Forum