Umanyano weSouthern African Development Community (SADC) uthi kumele kuhanjiswe ngokutshetsha kweleDemocratic Republic of Congo (DRC) inkokheli yamabutho amazwe akumanyano lo labaphathintambo babohulumende ababona ngezomvikela kanye labamele amabutho akwamanye amazwe alondoloza ukuthula akulelolizwe ukwenzela ukuba kuyehlolisiswa isimo sempi yomvukela eyesabekayo eDRC, okulabahlamuki beMarch 23 (M23) asebehluthune ingxenye yedolobho leGoma njalo abathembisa ukuba bazahlasela lesigodlo sakulelolizwe, iKinshansa.
Lokhu kwethulwe yinkokheli yeSADC ngoLwesihlanu ntambama ebithe gwaqa eHarare lapho ebihlolisisa isimo sempi yomvukela eDRC kulandela ukuhlaselana okumangalisayo phakathi kwebutho lakulelolizwe, iM23 kanye leRwanda Defense Forces, okubikwa ukuba isekela abahlamuki laba.
Izithunywa zomanyano lo zikhangelelwe ukuba zizahlolisisa ukuba amabutho akumanyano weSADC
Mission in the Democratic Republic of Congo (SAMIDRC), akusimo sokuzivikela kumbe hatshi njalo lokulungiselela ukuthwalwa kwezidumbu zamasotsha amazwe agoqela eleSouth Africa, Malawi leleTanzania abulewe yiM23.
Inkokheli yeSADC income imizamo eyenziwa ngomlamlankunzi uMongameli William Ruto lowayengumongameli uMnu. Uhuru Kenyatta bakweleKenya loMongameli João Lourenço wakweleAngola labanye abazama ukumisa impi le, esidale ukuba abantu abafika inkulungwane ezingamakhulu amathathu – 300,000 bebaleke emizini yabo beyedinga indawo zokuphephela.
Umanyano lo ucele uhlangothi lwezomvikela olomanyano lo olweSADC Troika on Defense, Peace and Security. olukhokhelwa nguNkosikazi Hassan, ukuthi lukhulumisana labo bonke abaphakathi kwempi le ukwenzela ukuba kubekwe phansi izikhali, abantu ababalekela impi le bethole uncedo olufana lokudla, indawo zokuhlala, amani lokunye.
Umanyano lo uphinde wathi kumele kulandelwe isivumelwano esalotshelwana phakathi kwabahlamuki beM23 leleDRC eseLuanda Process lalokhu okwenziwa khonamanje elizweni leli ngumanyano webutho oweUnited Nations Organization Stabilization Mission in the Democratic Republic of Congo (MONUSCO).
Abanye abangene umhlangano lo ngomongameli Cyril Ramaphosa (South Africa) okewaxabana loKagame ngokwenzakala kweleDRC, uDaniel Chapo (Mozambique), Hakainde Hichelema (Zambia), Félix Tshilombo Antoine Tshisekedi (DRC), Duma Boko (Botswana), Andry Rajoelina (Madagascar), loSamia Suluhu Hassan (Tanzania) okhokhela uhlangothi lweSADC Troika on Defense, Peace and Security. EleLesotho, Eswatini, Angola, Malawi leleNamibia abamelwe yiziphathamandla zabohulumende.
UKagame uthi akuqedakali okwenziwa ngeleSouth Africa, Malawi, Tanzania lamanye amazwe eDRC. Kwelinye icele uRamaphosa uthi uKagame kukhanya engani nguye otshotshozela impi le. UKagame uphendule uRamaphosa esithi ukhuluma amanga aluhlaza tshoko ngokwenzakala eDRC lapho okulebutho lakhe elixokozela okumangalisayo lamanye avela emazweni atshiyeneyo.
Forum