Kulamalunga ebandla leZanu PF aqhubekela phambili esithi afisa ukuba uMongameli Emmerson Mnangagwa aqhubeke esesikhundleni loba etshele abahleli bezindaba kuyonale iviki ukuba uzasuka embusweni ngomnyaka ka2028, okugqitshwa khona amahlandla amabili ombuso wakhe njengalokhu okulawulwa yisisekelo sombuso welizwe.
Amanye amalunga ebandla leli asethuka abaphikisa ukuba uMnangagwa aqhubeke esembusweni.
Kodwa abakuphikisayo bathi akumelanga kuguqulwe isisekelo sombuso welizwe ukuze uMnangagwa ahlale esikhundleni kuze kuyefika umnyaka ka2030.
Ekhuluma labahleli bezindaba eHarare kuyonale iviki, uMnangagwa uthe labo abafisa ukuba aqhubeke esembusweni ngabantu abaphandle kwebandla leZanu PF njalo abazidingela abakufunayo.
Ukuhlaziya loludaba, sixoxe loMnu. Fortune Mlalazi olandela ezombusazwe ezimele loMnu. Joseph Tshuma okudale leZanu PF Central Committee.
UMlalazi uthi banengi abafisa ukuthi uMnangagwa aqhubeke esembusweni ngoba “bafuna ukutshontsha igolide lamanye amatshe aligugu njalo lokukholisa ubukhosi.”
UTshuma yena uthi, “Umuntu wonke ulelungelo lokukhuluma akufunayo. Ngibona engani kumele sixoxe ngokuthuthukisa umnotho hatshi okombuso kaMnangagwa esizabhekana lakho kumhlangano weCongress ngomnyaka ka2027.”
UMnangagwa, osesele yedwa phakathi wamalunga edale leCabinet lakuqala elakhethwa ngumuyi uRobert Mugabe eleZimbabwe lisanda kuthola uzibuse, wangena esikhundleni sikamongameli ngomnyaka ka2017 kulandela ukugenqulwa kuka Mugabe libutho.
Forum