UMongameli Emmerson Mnangagwa uhlangane labosomabhizimusi koBulawayo ngoLwesine njalo wethekelela inkampani ethunga impahla zokugqoka eyeCorousel Manufacturing ngesikhathi amabhizimusi amanengi ekhala ngokutshabalala komnotho lokusilela kwamandla kagetsi elizweni.
UMnangagwa utshele intathelizindaba ukuthi uyajabula ngomsebenzi oqhutshwa yinkampani le lamanye lamabhizimusi, esithi lokhu kuveza sobala ukuthi idolobho lakoBulawayo yilo insika yamabhizimusi eZimbabwe.
UMnangagwa ukhulume njalo emhlanganweni wamabhizimusi oweCompetitiveness Summit, wathembisa ukuthi uhulumende wakhe uzaqhubeka esebenza ngokuzikhandla ukuthuthukisa amabhizimusi.
Amankampani amakhulu afana leN Richards leOK asevalile ezinye izitolo zawo ngenxa yokubhidlika komnotho.
Ocubungula ezenotho uMnu Reggie Shoko utshele iStudio 7 ukuthi amabhizimusi amanengi ayasadalala eZimbabwe, waxwayisa ukuthi uhulumende kumele athathe amanyathelo okuvuselele umnotho alohlonzi.
Forum