Uzulu weZimbabwe useveze imbono etshiyeneyo phezu kwamazwi kaMongameli Emmerson Mnangagwa awokuthi uzasuka embusweni isikhathi sakhe esivunyelwa yisisekelo sombuso welizwe singafika ngo2028.
UMnangagwa utshele abahleli bamaphephandaba ngoMvulo ukuthi lanxa abalandeli bakhe befuna aqhelise umbuso wakhe, kasoze akwenze lokhu ngoba uyawuhlonipha umthetho.
Uthe abagqugquzela lokhu kungenzeka kube ngabazenzisi abalenjongo zabo abangayisiwo malunga eZanu PF. Wengeze wathi amalunga alelibandla aqotho kumele alandele umzekeliso wakhe.
UMnangagwa uthi ngo2028 lapho okuqgitshwa amahlandla akhe okubusa amabili avunyelwa yisisekelo sombuso, ibandla leZanu PF lizakhetha umholi omutsha.
Uthe, “Ngicace bha ukuthi ngilamahlandla amabili, futhi ngibusa ngentando yomphakathi. Uma isikhathi sami sesifike emaphetheleni ngizaphuma ibandla lami likhethe ozangelama. Lokho kucace njengosuku.”
UMnangagwa useke wawatsho lawamagama phambilini kodwa abanye abagoqela abenhlanganiso ezizimeleyo ezifana leyeCrisis in Zimbabwe Coalition bathi abamkholwa ngoba kakaze aphumele egcekeni etshela abasekeli bakhe ukuthi batshiyane lomkhankaso wabo.
Kodwa njengoba esewagcizelele amazwi akhe kungaba lotshintsho na?
“Nxa kuyikuthi abakhankasela uMnangagwa bayamlalela, kumele sibabone bethula, kodwa singabona beqhubeka ngomkhankaso wabo sizazibuza imibuzo eminengi,” kutsho umholi wenhlanganiso elwela amalungelo omphakathi eyeMatabeleland Institute for Human Rights uMnu Khumbulani Maphosa.
Ingcwethi ecubungula ezombusazwe uMnu Effie Dlela Ncube uthi amazwi kaMnangagwa mahle “kakhulu nxa engawagcina, kodwa nxa engaqinisanga kuzamlimaza ngoba kuzamenza umuntu engathembekanga.”
Owake wamela isigaba seBinga edale lePhalamende elilunga lebandla eliphikisayo eleCCC uMnu Prince Dubeko Sibanda uthi uMnangagwa ungumkhohlisi.
“Udaba lokuthi uzithulele esekela abantu bakhe besiyaphambili bekhuluma ngokuguqula isisekelo sombuso welizwe yena ethule engatsho lutho kutsho okunengi khonokho,” uSibanda utshele iStudio 7.
Kodwa ilunga leZanu PF uMnu Malaki Nkomo uthi, “Angiboni ukuthi kulokunye ukukhuluma okwedlula khonokhu okwenziwe nguMongameli; ukuthi athi uma ngesisekelo sombuso.”
Kulokufuthelana okukhulu kuZanu PF phakathi kwalabo abafuna kuguqulwe isisekelo sombuso welizwe ukuze uMnangagwa eqhelise umbuso wakhe lalabo abathi kumele atshiyele umsekeli wakhe uMnu Constantino Chiwenga.
Abanye abalwa impi yenkululeko abakhokhelwa nguMnu Blessed Geza bathi uMnangagwa kumele ehle embusweni khathesi ngoba usehlulekile ukulungisa indubo zabantu beZimbabwe kanti njalo ukhohlakele.
Kungenzeka uMnangagwa atshiye umbuso ngo2028 njengokuthembisa kwakhe ngubani ozakhethwa yiZanu PF ozancintisa emele lelibandla kukhetho?
Olandela ezombusazwe ezimele uMnu Difa Dube uthi lokho kusobala.
“Kuyatshengisela sobala ukuthi uChiwenga nguye ozangena ngoba nxa sikhangela emuva, waba leqhaza alidlalayo ekuthini uMnangagwa abe nguMongameli,” kutsho uDube.
“Ngakho ukukhangelele ukuthi njengoba sowatshiya isikhundla sakhe kubutho, ukhangelele ukuthi kube nguye ozangena abe nguMongameli weZimbabwe.”
UMnangagwa usolwa ngabanengi abathi usehlulekile ukulungisisa umnotho welizwe lokuhlonipha amalungelo, okuyizinto athembisa ukuziqakathekisa ekungeneni kwakhe embusweni ngemva kokugenqulwa kukaRobert Mugabe libutho.
Forum