Kulezulu elikhulu kwezinye izabelo kweleBotswana, South Africa leZimbabwe osokugcwele amanzi amanengi.
Abadabuka eZimbabwe abahlala eBotswana bathi sokugcwele amanzi emigwaqweni, emahofisini lezindlini njalo sokuvalwe amabhizimusi lezikolo.
Lokhu kwenzakala lakwezinye izigaba eGauteng njalo lendaweni ezitshiyeneyo eMatabeleland South.
Uhlangothi lukahulumende olubona ngezomkhathi luthi izulu leli likhangelelwe ukuba lizakuna kakhulu ngoLwesithathu ebusuku kusiya ngoLwesine emini ezigabeni ezitshiyeneyo.
Sixoxe ngodaba lolu lomnu. Khumbulani Magwaza Moyo ohlala eGaranyemba eMatabeleland South othi kune izulu elikhulu esigabeni sakhe.
“Kune izulu elikhulu kakhulu lapha. Ngehluleke lokutshaya izitina zababalisi. Akuhambeki phandle lapha ngoba liyana kakhulu izulu,” kutsho uMoyo.
Sixoxe njalo ngodaba lolu loMnu. Meluleki Mhlanga odabuka eZimbabwe ohlala eGaborone obeselamahola amathathu ezama ukuya endlini yakhe esuka edolobheni leli.
“Sengizame indlela zonke zokuyafika endlini yami kodwa kunzima. Imota sezigcwele lapha njalo akusakhanyi ukuba kuyiwa ngaphi,” kutsho uMhlanga.
AbeMeteorological Services Department bathi izulu leli lizakuna kakhulu kweleBotswana, Bulawayo, Gwanda, Midlands lezinye indawo.
Abantu baxywasiwa ukuba belimuke ngoba izulu leli lilakho ukuba lomoya omkhulu njalo lamanzi azagcwalisa imifula eminengi.
Forum