Izulu elikhulu selidale umonakalo omangalisayo kwamanye amalokishi koBulawayo okulezakhamizi esezizama ukufihla impahla ngokuyiphanyeka ephahleni phakathi kwezindlu. Kwezinye indawo sokugcwele amanzi alengcekeza yabantu.
Elokitshini lePumula East koBulawayo ukubona lokunukelwa yingcekeza igelezela endlini ephuma empompini ezithwala ingcekeza kazulu, sokuyinto yansukuzonke ngenxa yezulu elinengi. UNkosazana Patience Sibanda ngomunye wabakhala kakhulu ngamanzi ezulu lengcekeza yabantu esingena endlini.
"Lawa ngamanzi ezulu lama suweji avelela ngemuva ngale kulesititshi so singadubuka ayaphenduka nje konke lapha kugcwale. Sihlezi sisevalweni sihlalahlale lezisu zikezisibambe asisakwazi ukuthi okuyikho yikuyini. Kubi kakhulu seyesaba kodwa akulanto esingayenza ngoba kuyabe kumele siphume siyephanda impilo.”
UGogo uMaNyathi laye uthi bathwele nzima ngengcekeza esigcwele endlini yakhe.
"Sicela kuye uCity Council ukubana abuye ezosincedisa. ICity Council iyabuya ithi ‘hayi ngiyaphenduka’ kube ngama swireji uyabuya athi thathani inumber it’s noted ahambe kabuyi kodwa esesikucela yikuthi kambe kunguwe wena ungahlala yini. Kufake ezicathulweni zakho uhlala phakathi kwendlu enje empilweni yakho awuphefumuli, awudli, awusaphumi phandle uhlale lawe egumeni lakho eyadini yakho njengezinye izakhamizi ngohlupho lolu osolulapha phakathi kwalo umuzi."
Banengi abakusimo lesi esidalwe yikuna kakhulu kwezulu lokuswelakala kwemigelo yokuthwala amanzi kanye lezititshi zengcekeza ezingasebenzi kahle. UPreymore Jele laye uthi ingcekeza yabantu isingena endlini yakhe ePumula.
"Akwenzi kahle ama suweji akhona awaflashi kumele ukuthi uthele ama thousand litres amanzi wonke ibill lonke liphele … Haaaa kubuhlungu, kubuhlungu, kubuhlungu, kubuhlungu ngendlela okwenzakala ngayo, akusa phileki."
UMnu. Brian Samanyanga ohlala ePumula East uthi ingcekeza igcwele endlini yakhe.
"Ma uflusher ngale ibuya la igcwale iqonge ibuye phezulu even ngapha next door lakho kugcwele ma kugcwala, kugcwala konke la. Silabamntwana abancame badlalisa babambe, it’s not healthy ebantwanweni abancane into le ya ripotwa bahamba omakhelwane mina ngise msebenzini baya repoter ukuthi bebuye iCity Council akulanto eyenziwayo so vele kumele bezovula umgelo wabo uvuleke into yabo le isureji ivuleke into lezi zihamba cause angeke sahlala kunje this is very bad yi-emergency le."
Sixoxe ngodaba lolu loMnu. Edwin Ndlou umsekeli kameya wakoBulawayo othi kumele kulungiswe impompi ezithwala ingcekeza lemigelo yamanzi ezulu.
Kukhangelelwe ukuba udubo lolu luzaqhubekela phambili ngesikhathi sezulu lonyaka leminyaka ezayo uma kungalungiswanga impompi zokuthwala ingcekeza kazulu njalo lamanzi ezulu.
Forum