Izakhamizi zeGwanda North sezidlela evalweni ngenxa yokutota lokutsha kwezilimo okudalwe lizulu elikhulu njalo lokungani kwalo kumaviki amabili edluleyo.
Zithi zilakho ukungavuni amabele kahle lonyaka njenganyakenye, okwabangelwa yisikhudumezi somkhathi ese-El Nino esadala isomiso esesabekayo eMatabeleland South lezinye izabelo eZimbabwe lemazweni atshiyeneyo
Kunengi okusinda abalimi esigabeni lesi. UNkosikazi Rose Dube oyisakhamuzi seDambashoko oleminyaka yokuzalwa engamatshumi ayisitshiyangalombili uthi lanxa izulu line kuhle kalathemba lokuthi uzathola izivuno esihle.
"Izulu linile sibili sabonga uNkulunkulu kodwa thina siphanjaniswe yikuluphula lokuswela okokulimisa,yikho okungacina kusenza ukuthi indlala ihlasele, lokwehluleka ukuqabanga ngoba abantu bebesenza okwamagodi thina esingakwanisiyo siyehlulekile."
Esinye isakhamuzi seDambashoko, uMnu. Ben Masango, uthi izulu lisuke laba linengi kakhulu okudale ukutota kwezilimo.
"Izulu linile kakhulu kwatota, kwaba lelanga okunye kwatsha, indlala ebantwini isesekhona kodwa kuzifuyo sekungcono, sesithembe ukuthi sesilamanzi sesizalima ezingandini sibone ngomnyaka ozayo."
UMnu. Michael Gumbo oyisakhamuzi seMasholomoshe uthi abalimi akumelanga belahle ithemba ngesimo sezilimo.
“Sizamile ukulima bekumile kuhle sibili, sokungani kulezinsuku izulu limile kodwa sikhangelele ukuthi lizabuya asikadeli kakhulu, silethemba lokuthi izulu lizakuna, balimi lingadeli."
Ukhansila kaWard 1, uMnu. Standford Nkala, uthi inengi lezakhamizi kalilimanga ngamandla ngenxa yokuswela okokulimisa njalo indlala lokhu ihlasele emakhaya.
UNkala obekhuluma eseNkazhe ngoLwesithathu lapho izakhamizi ebezihola inhlanyelo lemvundiso phansi kohlelo lwePresidential Input Scheme, uchothoze indlela loluhlelo oluphethwe ngayo.
Izifuyo ezibalisa inkomo ezife ngobunengi nyakenye seziqinile kulandela ukuhluma kotshani kanye lokugcwala kwamadamu osekulethe ithemba kubafuyi.
Forum