Abahlali beHwange bathi ukungani kuhle kwezulu, ukuhlaselwa kwezilimo yimihogoyi lokubhuquza kwenyamazana zendle emasimini sokusenza besabele ukuba bazabhekana leyinye njalo indlala lonyaka kulandela isomiso esikhulu nyakenye esadalwa yisikhudumezi somkhathi ese-El Nino.
Amasimu amanengi kawalinywanga lonyaka ezigabeni ezinengi zemhlubulweni weHwange duzane ledolobho leVictoria Falls, ngesizatho sokuba izulu laqala ukuna ngenyanga kaZibandlela kodwa lakho ukuna kwalo kwatshiya abalimi abanengi bengalimanga lutho.
UNkosikazi Sakheleni Dube uthi balime ezivandeni kuphela.
“Asikaze sichinse sesize sikuyonale inyanga. Akula ngitsho ikhomanane yindlala nje yodwa okufuze siyilungiselele lonyaka. Okwenza kubenzim njalo yikuba lomuntu wakhona awukatshakazi lezulu selizahamba.”
UNkosikazi Bongani Mlotshwa usobhuku weBH29 uthi kuvele nje akucaci okwezankala emasimini abo.
“Izulu lakhona alikho. Ikhaba likhona lodwa akukakhahleli.”
Uthi olunye uhlupho olukhona ngolwesibungu esiphehlayo, esibizwa ngokuthi yi-fallarmy worm kanye lokusilela kwemithi yokusibulala.
“Isibungu sikhona lemithi basipha eshotayo so kufuze uthenge ukuze ulaphela kukwane ingadi yonke. Sasiphiwa okuyimbhodlela kuthiwa sabelane siyimizi emithathu kumbe emine.”
UMnumzana Tynos Ncube yena uthi lonyaka abalimanga kangako emasimini ngesizatho sokudlelwa izilimo zinyamazana zendle.
“Sesehlulekile njengeminyaka yonke ngoba ungaze uzame indlovu zingena smziqale phansi. Ziyalothisa vele asivuni lutho njalo lezulu kalikkho. Indwangu lazo zenza okunye nxa sekuqala ukuvuthwa, yikho sayeka nje ukulima khatshana saqina ngengadi.”
Umnumzana Morris Sibanda laye ukhala ngenyamazana zendle.
“Endaweni yethu le silohlupho olukhulu ngoba lezifuyweni asiselandawo yokuthi singadlisela ngaphi ngoba izilwane lendlovu seziphila lathi. Akuselahlobo kumbe ubusika okuyikhuyji ukuhlala kwethu kulindawo sokubuhlungu kakhulu kuyoyonkinto.”
Ohola isabelo se Matebeleland North, uMnumzana Richard Moyo utshele lumsakazo ukuba njengohulumende bazasondela ezakhamizini, funa kubelenye indlala lonyaka.
Kulabanye njalo abalimi eKezi, Gwanda, Masvingo, Lupane lezinye izigaba abakhala ngemihogoyi edla izilimo.
EleZimbabwe beliphakathi kwesomiso esikhulu esidale ukuba kube labantu abedlula izigidi eziyisikhombisa – 7.7 million abalambayo. Kukhangelelwe ukuba kuzakuba lezinye izigaba lonyaka ezizaholisa uzulu ukudla ngenxa yokuswelakala kwezulu kumbe ukuna kwezulu elinengi kakhulu, ukuswela okokulimisa njalo lokusilela kwemvundiso yefertilizer eyokukhulisa izilimo.
Forum