ប្រធានាធិបតីអ៊ុយក្រែនលោក Volodymyr Zelenskyy បាននិយាយកាលពីថ្ងៃសុក្រថាលោកត្រៀមរួចរាល់ក្នុងការចរចាដោយផ្ទាល់ជាមួយរុស្ស៊ី នៅពេលណាដែលអ៊ុយក្រែនសម្រេចបាននូវគោលជំហររួមជាមួយសហរដ្ឋអាមេរិកនិងអឺរ៉ុបលើវិធីបញ្ចប់សង្គ្រាមរយៈពេល ៣ ឆ្នាំនេះ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AFP។
លោក Zelenskyy ក៏បានបញ្ជាក់ផងដែរថា ប្រធានាធិបតីអាមេរិកលោក Donald Trump មិនទាន់សម្រេចចុងក្រោយលើផែនការរបស់លោកអំពីវិធីដែលលោកចង់បញ្ចប់សង្គ្រាមនេះនៅឡើយទេ។ លោក Zelenskyy ថ្លែងដូច្នេះក្នុងពេលពីរថ្ងៃក្រោយមកបន្ទាប់ពីលោក Trump បានសន្ទនាតាមទូរស័ព្ទដាច់ដោយឡែកពីគ្នាជាមួយលោកនិងជាមួយប្រធានាធិបតីរុស្ស៊ីលោក Vladimir Putin។
លោក Zelenskyy និយាយថា៖ «យើងត្រៀមរួចរាល់សម្រាប់ការសន្ទនាណាមួយជាមួយអាមេរិកនិងសម្ព័ន្ធមិត្តរបស់យើង»។
លោកបានបន្ថែមថា៖ «ប្រសិនបើពួកគេផ្ដល់ឲ្យយើងនូវចម្លើយជាក់លាក់ចំពោះសំណើជាក់លាក់របស់យើង និងការយល់រួមគ្នាថាលោក Putin ជាមនុស្សគ្រោះថ្នាក់ នោះដោយសារការយល់រួមគ្នារបស់យើង យើងនឹងត្រៀមរួចរាល់សម្រាប់ការចរចាជាមួយនឹងរុស្ស៊ី»។
បំណងប្រាថ្នារបស់លោក Trump ដែលចង់ឲ្យបញ្ចប់សង្គ្រាមនេះឆាប់ៗ ការរិះគន់ម្ដងហើយម្ដងទៀតរបស់លោកលើជំនួយសម្រាប់អ៊ុយក្រែន និងការសន្ទនាតាមទូរស័ព្ទដ៏យូររបស់លោកជាមួយលោក Putin នៅដើមសប្ដាហ៍នេះបានធ្វើឲ្យអ៊ុយក្រែនព្រួយបារម្ភថាខ្លួនអាចត្រូវបានបង្ខំឲ្យទទួលយកកិច្ចព្រមព្រៀងសន្តិភាពតាមលក្ខខណ្ឌរបស់រុស្ស៊ី៕
វេទិកាបញ្ចេញមតិ