អ៊ុយក្រែននិងសហរដ្ឋអាមេរិកកំពុងពិចារណាកិច្ចព្រមព្រៀងរ៉ែដ៏សំខាន់មួយនៅឯសន្និសីទសន្តិសុខក្រុង Munich នៅសប្តាហ៍នេះ។ នេះបើតាមពួកមន្ត្រីមកពីប្រទេសទាំង២។
បន្ទាប់ពីជំនួបជាមួយប្រធានាធិបតីអ៊ុយក្រែនលោក Volodymyr Zelenskyy រដ្ឋមន្ត្រីក្រសួងហិរញ្ញវត្ថុសហរដ្ឋអាមេរិកលោក Scott Bessent បានពណ៌នាកិច្ចព្រមព្រៀងដែលស្នើឡើងនោះថាជា«ខែលការពារសន្តិសុខរយៈពេលវែង»ដ៏ខ្លាំងមួយសម្រាប់អ៊ុយក្រែននៅពេលដែលសង្គ្រាមរបស់ខ្លួនជាមួយរុស្ស៊ីដល់ទីបញ្ចប់។
លោកប្រធានាធិបតី Zelenskyy បានបញ្ជាក់ថាអ៊ុយក្រែនបានទទួលសេចក្តីព្រៀងកិច្ចព្រមព្រៀងលើកដំបូងហើយបានសម្តែងនូវក្តីសង្ឃឹមថាកិច្ចព្រមព្រៀងផ្តាច់ព្រាត់អាចត្រូវធ្វើឡើងនៅក្នុងទីក្រុង Munich។ អ៊ុយក្រែនមានបំណងទទួលបានការបន្តការជួយឧបត្ថម្ភរបស់សហរដ្ឋអាមេរិកនៅពេលដែលខ្លួនព្យាយាមងើបឈរដ៏ខ្លាំងប្រឆាំងនឹងការឈ្លានពានរបស់រុស្ស៊ីកំពុងបន្តកើតឡើង។
ក្នុងខណៈនោះ ប្រធានាធិបតីសហរដ្ឋអាមេរិកលោក Donald Trump បានថ្លែងថាបំណងរបស់លោកធ្វើកិច្ចព្រមព្រៀងសម្រាប់ធនធានរ៉ែកម្ររបស់អ៊ុយក្រែននៅក្នុងការដោះដូរការបន្តការគាំទ្ររបស់សហរដ្ឋអាមេរិកនៃការខំប្រឹងប្រែងធ្វើសង្គ្រាមរបស់អ៊ុយក្រែន។
លោកប្រធានាធិបតី Trump បានប្រាប់បណ្តាញទូរទស្សន៍ Fox News នៅក្នុងកិច្ច សម្ភាសន៍មួយដែលបានផ្សាយកាលពីថ្ងៃចន្ទថា«ខ្ញុំបានប្រាប់អ៊ុយក្រែនថាខ្ញុំចង់បានរ៉ែកម្រដែលមានតម្លៃ៥រយពាន់លានដុល្លារ»។
ការប្រកួតប្រជែងសាកលលោកសម្រាប់វត្ថុធាតុដើមដ៏សំខាន់នេះជាការសំខាន់សម្រាប់ឧស្សាហកម្មបានរីកកាន់តែធំឡើងក្នុងប៉ុន្មានឆ្នាំថ្មីៗនេះ។ ធនធានសំខាន់ៗរួមមានអ៊ុយរ៉ានីញ៉ូម ទីតានីញ៉ូម លីចូម ធ្យូងថ្ម នីកែលនិងអាលុយមីញ៉ូមក៏ដូចជារ៉ែកម្រដែលប្រើប្រាស់សម្រាប់ឧបករណ៍បច្ចេកវិទ្យាជាន់ខ្ពស់។
នៅពេលបច្ចុប្បន្ននេះ ចិនជាអ្នកផ្គត់ផ្គង់កំពូលនៃរ៉ែកម្ររបស់ពិភពលោក។ នេះបើតាមរបាយការណ៍របស់វេទិកាសេដ្ឋកិច្ចពិភពលោកកាលពីពេលថ្មីៗនេះ។ ចិនផ្គត់ផ្គង់ប្រហែល៤០ភាគរយនៃតម្រូវការរបស់សហភាពអឺរ៉ុបសម្រាប់ធនធានទាំងនោះ។ ប្រទេសផ្គត់ផ្គង់សំខាន់ៗផ្សេងទៀតរួមមានអូស្ត្រាលី អាហ្វ្រិកខាងត្បូង កាណាដានិងប្រេស៊ីល៕
វេទិកាបញ្ចេញមតិ