រដ្ឋមន្ត្រីការពារជាតិអ៊ុយក្រែនលោក Rustem Umerov បាននិយាយថា សម្ព័ន្ធមិត្តដែលជួបប្រជុំគ្នានៅថ្ងៃពុធនេះក្នុងទីក្រុងព្រុចសែលនៃប្រទេសបែលហ្ស៊ិកនឹងពិភាក្សាគ្នាអំពីការផ្គត់ផ្គង់ជំនួយយោធាដល់អ៊ុយក្រែន ដែលក្នុងនោះរួមមានទាំងការពន្លឿនការដឹកជញ្ជូនសព្វាវុធសំខាន់ៗដូចជាប្រព័ន្ធការពារដែនអាកាសផងដែរ។
លោក Umerov បានលើកឡើងដូចនេះនៅមុនការប្រជុំថ្មីចុងក្រោយបង្អស់របស់ក្រុមទំនាក់ទំនងការពារអ៊ុយក្រែន ដែលមានប្រទេស ៥០ ជាសមាជិកដែលបានសម្របសម្រួលផ្គត់ផ្គង់សព្វាវុធដល់អ៊ុយក្រែនតាំងពីពេលដែលរុស្ស៊ីបានឈ្លានពានអ៊ុយក្រែននៅឆ្នាំ ២០២២ មក។
លោក Umerov បាននិយាយថា ការពិភាក្សានៅថ្ងៃពុធនេះក៏នឹងរួមមានផងដែរនូវប្រធានបទអំពីការវិនិយោគលើវិស័យការពារជាតិរបស់អ៊ុយក្រែននិងកិច្ចសហប្រតិបត្តិការលើគម្រោងផ្សេងៗជាមួយដៃគូនានានៅអឺរ៉ុប។
រដ្ឋមន្ត្រីការពារជាតិអាមេរិកថ្មីគឺលោក Pete Hegseth គ្រោងនឹងថ្លែងសុន្ទរកថានៅក្នុងកិច្ចប្រជុំនេះនៅទីស្នាក់ការកណ្ដាលអង្គការអូតង់ (NATO)។ កិច្ចប្រជុំនេះធ្វើឡើងមួយថ្ងៃមុនពេលជំនួបរបស់បណ្ដារដ្ឋមន្ត្រីការពារជាតិនៃអង្គការអូតង់ធ្វើឡើង ដែលនៅទីនោះលោក Hegseth បាននិយាយថាលោកនឹងជំរុញឲ្យសម្ព័ន្ធមិត្តបង្កើនការចំណាយផ្នែកការពាររបស់ខ្លួន។
បញ្ហាអ៊ុយក្រែននឹងនៅតែជាការផ្ដោតនៅថ្ងៃសុក្រខាងមុខ ដែលនៅពេលនោះអនុប្រធានាធិបតីអាមេរិកលោក JD Vance គ្រោងនឹងជួបជាមួយនឹងប្រធានាធិបតីអ៊ុយក្រែនលោក Volodymyr Zelenskyy នៅក្នុងសន្និសីទសន្តិសុខក្រុង Munich ប្រទេសអាល្លឺម៉ង់៕
ព័ត៌មានខ្លះនៃសេចក្តីរាយការណ៍នេះត្រូវបានផ្តល់ដោយទីភ្នាក់ងារព័ត៌មាន AFP និង Reuters
វេទិកាបញ្ចេញមតិ