បេក្ខភាពអនុប្រធានាធិបតីអាមេរិកខាងគណបក្សសាធារណរដ្ឋលោក JD Vance មានប្រវត្តិផ្លាស់ប្ដូរឈ្មោះជាបន្តបន្ទាប់។
សមាជិកព្រឹទ្ធសភាខាងបក្សសាធារណរដ្ឋតំណាងរដ្ឋ Ohio រូបនេះបានធ្វើឱ្យសាធារណជនស្គាល់លោកនៅឆ្នាំ ២០១៦ នៅពេលលោកបោះពុម្ពផ្សាយសៀវភៅកំណត់ប្រវត្តិផ្ទាល់ខ្លួនដែលលក់ដាច់ខ្លាំងមួយឈ្មោះថា «Hillbilly Elegy» ដោយប្រើឈ្មោះ J.D. Vance ដែលពាក្យពេញនៃពាក្យ J.D. គឺ James David។
មកទល់នឹងអាយុ ៣៩ ឆ្នាំនេះ ឈ្មោះ ឈ្មោះកណ្តាល និងនាមត្រកូលរបស់លោក Vance បានផ្លាស់ប្តូរជាបន្តបន្ទាប់។ នៅពេលដែលលោក Vance ត្រូវបានណែនាំទៅកាន់អ្នកបោះឆ្នោតទូទាំងប្រទេសថាជាបេក្ខភាពអនុប្រធានាធិបតីខាងគណបក្សសាធារណរដ្ឋ ឈ្មោះរបស់លោកបានក្លាយជាប្រភពនៃការងឿងឆ្ងល់។
លោកកើតនៅក្នុងទីក្រុង Middletown រដ្ឋ Ohio នៅថ្ងៃទី ២ ខែសីហា ឆ្នាំ ១៩៨៤។ ឈ្មោះកំណើតរបស់លោកគឺ James Donald Bowman ដោយឈ្មោះកណ្តាលនិងនាមត្រកូលរបស់លោកគឺដូចឈ្មោះឪពុកបង្កើតរបស់លោកដែលមានឈ្មោះថា Donald Bowman។
លោកបានសរសេរថា ឪពុកម្តាយរបស់លោកបានលែងលះគ្នាក្នុងអំឡុងពេលលោកចាប់ផ្តើមចេះដើរ។ នៅពេលលោកមានអាយុប្រមាណ ៦ ឆ្នាំ ម្តាយរបស់លោក អ្នកស្រី Beverly បានរៀបការជាលើកទីបី។ លោកមានឪពុកចុងថ្មីឈ្មោះ Robert Hamel ហើយម្តាយរបស់លោកបានដាក់ឈ្មោះថ្មីឱ្យលោកថា James David Hamel។
លោក Vance បានប្រើឈ្មោះ James David «J.D.» Hamel អស់រយៈពេលជាងពីរទសវត្សរ៍។ នេះជាឈ្មោះដែលលោកប្រើពេលរៀនចប់ពីវិទ្យាល័យ Middletown ពេលចូលបម្រើការជាទាហានម៉ារីននៅអ៊ីរ៉ាក់ ពេលទទួលបានសញ្ញាប័ត្រផ្នែកវិទ្យាសាស្រ្តនយោបាយនៅសាកលវិទ្យាល័យ Ohio State University និងពេលជានិស្សិតវ័យ ២៦ ឆ្នាំនៅមហាវិទ្យាល័យច្បាប់នៃសាកលវិទ្យាល័យ Yale។
ប៉ុន្តែស្ថានភាពបានធ្វើឱ្យលោកវិលវល់ ជាពិសេសបន្ទាប់ពីម្តាយនិងឪពុកចុងរបស់លោកបានលែងលះគ្នា។ ដូច្នេះ លោកបានចាប់ផ្តើមផ្លាស់ប្តូរឈ្មោះសារជាថ្មីទៅជា Vance។ ឈ្មោះ Vance នេះគឺជានាមត្រកូលរបស់ជីដូនជាទីគោរពស្រឡាញ់របស់លោក ដែលបានចិញ្ចឹមបីបាច់រូបលោក។
លោក Vance បានប្រើឈ្មោះថ្មីនេះនៅពេលលោកចាប់ផ្ដើមអាជីពជាមេធាវីនិងជាអ្នកនិពន្ធ។ ក្រៅពីប្រើឈ្មោះ Vance នេះនៅលើសៀវភៅដែលលោកនិពន្ធ លោកក៏ប្រើឈ្មោះនេះផងដែរដើម្បីចុះឈ្មោះប្រឡងជាមេធាវី រៀបការ និងចូលក្នុងពិភពវិនិយោគហិរញ្ញប្បទានបែបកម្មសិទ្ធិឯកជននៅតំបន់ Silicon Valley និងនៅពេលលោកបានក្លាយជាឪពុក។
បន្ទាប់ពីនេះមក ឈ្មោះរបស់លោកក៏មានការផ្លាស់ប្ដូរម្តងទៀតដែរ។
នៅពេលលោក Vance ឈានចូលក្នុងឆាកនយោបាយនៅខែកក្កដា ឆ្នាំ ២០២១ លោកបានលុបសញ្ញា «ចុច» ចេញពីឈ្មោះកាត់ J.D.។ លោកតែងប្រើឈ្មោះសរសេរខ្លីថា JD ជាប់រហូតមក។
នៅពេលទីភ្នាក់ងារសារព័ត៌មាន AP សួរនៅពេលនោះថាតើនេះគឺជាការផ្លាស់ប្តូរផ្លូវការឬគ្រាន់តែជារបៀបនៃការសរសេរ យុទ្ធនាការឃោសនាបោះឆ្នោតរបស់លោកបានបញ្ជាក់ថា នេះជារបៀបដែលលោកចង់បានពេលសរសេរឈ្មោះនៅលើឯកសារផ្សេងៗ។
ប៉ុន្តែ ទោះបីជាឈ្មោះផ្លូវការស្របច្បាប់របស់លោកគឺ James David Vance ក៏ដោយ លោកនៅតែសរសេរឈ្មោះរបស់លោកជា JD Vance នៅលើវេបសាយសមាជិកព្រឹទ្ធសភារបស់លោក នៅក្នុងសេចក្តីថ្លែងការណ៍ព័ត៌មាន និងនៅក្នុងឯកសារឃោសនាបោះឆ្នោតនិងឯកសារអាជីវកម្មមួយចំនួន៕
ប្រែសម្រួលដោយលោក ណឹម សុភ័ក្រ្តបញ្ញា
